ភ្នំពេញ ៖ យុវជនម្នាក់ បានស្លាប់ភ្លាមៗ នៅនឹងកន្លែងកើតហេតុ រីឯមនុស្សចំនួន ៤នាក់ទៀត បានរង របួសធ្ងន់ធ្ងរ ដោយសារតែពួកគេ ជិះម៉ូតូ២គ្រឿង បុកគ្នាពេញទំហឹង កាលវេលាម៉ោង ១២និង៣០នាទី រំលងអាធ្រាត្រ ឈានចូលថ្ងៃទី១៤ ខែសីហា ឆ្នាំ២០១៤ ស្ថិតនៅចំណុចស្ពានអាកាសស្ទឹងមាន

ជ័យ សង្កាត់ស្ទឹងមានជ័យ ខណ្ឌមានជ័យ ។

សាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញយុវជន ២នាក់ ជិះម៉ូតូមួយគ្រឿងម៉ាក សេ១២៥ ពណ៌ខ្មៅ ពាក់ស្លាកលេខ ភ្នំពេញ 1X-2429 ធ្វើដំណើរតាមបណ្តោយផ្លូវមុន្នីរ៉េត ក្នុងទិសដៅ ពីកើតទៅលិច ឆ្លងស្ពានស្ទឹងមានជ័យ ខណៈមកដល់ចំណុចពាក់កណ្តាលស្ពាន ស្រាប់តែមានយុវជន ៣ នាក់ ជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1AG-1641 ធ្វើដំណើរក្នុងល្បឿនលឿន និងបញ្ច្រាសផ្លូវ បានបុកគ្នា ចំពីមុខពេញទំហឹង បណ្តាលឲ្យអ្នកបើកម៉ូតូសេ១២៥ ស្លាប់ភ្លាមៗ នៅកន្លែងកើតហេតុ និងម្នាក់ទៀត ដែលរួមដំណើររងរបួសស្រាល ចំណែកម្ខាងទៀត រង របួសធ្ងន់ ៣នាក់ ។

សមត្ថកិច្ចបានឲ្យដឹងថា ជនរងគ្រោះ ដែលស្លាប់នៅនឹងកន្លែងឈ្មោះ រៀម យ៉ាន អាយុ ២១ឆ្នាំ ស្នាក់ នៅផ្ទះជួល ក្នុងសង្កាត់ស្ទឹងមានជ័យ មានមុខរបរជាជាងដែក និងមានស្រុកកំណើត នៅស្រុកខ្សាច់ កណ្តាល ខេត្តកណ្តាល ។

ក្រោយពេលកើតហេតុ ជនរងគ្រោះដែលរបួសធ្ងន់ ត្រូវបានរថយន្តសង្គ្រោះ ដឹកទៅមន្ទីរពេទ្យ រីឯសពសមត្ថកិច្ចស្រាវជ្រាវ រកក្រុមគ្រួសារ មកទទួលយកទៅធ្វើបុណ្យ តាមប្រពៃណី នៅឯស្រុកកំណើត ចំណែកម៉ូតូ សមត្ថកិច្ចយកទៅរក្សាទុក នៅអធិការដ្ឋានគរបាលខណ្ឌមានជ័យ ដើម្បីរង់ចាំដោះស្រាយតាមច្បាប់ ៕

__________________

ផ្តល់សិទ្ទិដោយ៖dap-news