លោក សម រង្ស៊ី មិនមានឈ្មោះនៅ ក្នុងសមាសភាព ដឹកនាំរដ្ឋសភា
រដ្ឋសភា
ជាតិ គ្រោងនឹងបើកសម័យប្រជុំវិសាមញ្ញ នៅថ្ងៃអង្គារ សប្ដាហ៍ក្រោយ
ដើម្បីបោះឆ្នោតជ្រើសតាំងក្បាលម៉ាស៊ីនដឹកនាំថ្មី។
អ្នកតំណាងរាស្ត្រនៃគណបក្សសង្គ្រោះជាតិ
អាចនឹងក្លាយជាប្រធានគណៈកម្មការមួយចំនួនក្នុងចំណោមគណៈកម្មការទាំង
១០។ ចំណែក លោក សម រង្ស៊ី
មិនមានឈ្មោះនៅក្នុងសមាសភាពដឹកនាំរដ្ឋសភានេះទេ។
រដ្ឋសភា
នឹងបើកកិច្ចប្រជុំបោះឆ្នោតជ្រើសតាំងក្បាលម៉ាស៊ីនដឹកនាំថ្មីនៃ
រដ្ឋសភា នៅថ្ងៃអង្គារ ទី២៦ ខែសីហា
ជាការបោះឆ្នោតរុះរើក្បាលម៉ាស៊ីនដឹកនាំរដ្ឋសភា
ទៅតាមសំណើរបស់គណបក្សប្រជាជនកម្ពុជា និងគណបក្សសង្គ្រោះជាតិ។
នៅក្នុងសម័យប្រជុំនោះ
នឹងមានរបៀបវារៈបីសំខាន់ដែលត្រូវដាក់អោយរដ្ឋសភាអនុម័ត
ក្នុងនោះមាន ទី១ ការបោះឆ្នោតជ្រើសតាំង លោក ងួន ញ៉ិល
ជាអនុប្រធានទី២នៃរដ្ឋសភា មកពីគណបក្សប្រជាជនកម្ពុជា។ ទី២
ការបោះឆ្នោតជ្រើសតាំង លោក កឹម សុខា ជាអនុប្រធានទី១នៃរដ្ឋសភា
ពីគណបក្សសង្គ្រោះជាតិ និងរបៀបវារៈ ទី៣ ការបោះឆ្នោតជ្រើសតាំងជំនួស
និងបំពេញបន្ថែមសមាជិកគណៈកម្មការទាំង១០ នៃរដ្ឋសភា។
អនុប្រធានគណបក្សសង្គ្រោះជាតិ លោក កឹម សុខា
មានប្រសាសន៍ថា
គណបក្សបានផ្ញើឈ្មោះដែលចូលជាសមាជិកគណៈកម្មការទាំង១០ទៅរដ្ឋសភា
ដែលមានគណៈកម្មការចំនួន៥ ជាប្រធាន និង ៥ ជាអនុប្រធាន ក្នុងនោះមាន
លោក អេង ឆៃអ៊ាង នឹងក្លាយជាប្រធានគណៈកម្មការទី១
ដោះស្រាយទទួលពាក្យបណ្ដឹង និងសិទ្ធិមនុស្ស។ លោក ប៉ុល ហំម
ជាប្រធានគណៈកម្មការទី៣ ដែលទទួលផែនការ កិច្ចការវិនិយោគ កសិកម្ម។ លោក
យ៉ែម បុញ្ញឫទ្ធិ ជាប្រធានគណៈកម្មការទី៧ ទទួលបន្ទុកកិច្ចការអប់រំ
យុវជន និងកិច្ចការសាសនា។ លោកស្រី មូរ សុខហួរ ជាប្រធានគណៈកម្មការទី៨
ទទួលបន្ទុកផ្នែក សុខាភិបាល សង្គមកិច្ច និងលោក យឹម សុវណ្ណ
ជាប្រធានគណៈកម្មការទី១០ ទទួលបន្ទុកអង្កេត និងប្រឆាំងអំពើពុករលួយ។
រីឯសមាសភាពអនុប្រធានគណៈកម្មការជំនាញវិញ
រួមមាន លោក សុន ឆ័យ ជាអនុប្រធានគណៈកម្មការទី២
ទទួលកិច្ចការសេដ្ឋកិច្ច និងហិរញ្ញវត្ថុ។ លោក ឡុង រី
អនុប្រធានគណៈកម្មការទី៤ មហាផ្ទៃ ការពារជាតិ។ លោកស្រី ជូឡុង សូមួរ៉ា
អនុប្រធានគណៈកម្មការទី៥ ទទួលបន្ទុកកិច្ចការបរទេស។ លោក អ៊ូ
ច័ន្ទឫទ្ធិ ជាអនុប្រធានគណៈកម្មការទី៦ មើលទៅលើនីតិកម្ម
និងយុត្តិធម៌ និងលោក ម៉ៅ មុនីវណ្ណ ជាអនុប្រធានគណៈកម្មការទី៩
ទទួលបន្ទុកសាធារណការ និងដឹកជញ្ជូន។
លោក កឹម សុខា បន្តថា
តួនាទីរបស់លោកដែលនឹងក្លាយជាអនុប្រធានទី១សភា
មិនមែនជារឿងចៃដន្យទេ វាជាតួនាទីបានមកពីកិច្ចព្រមព្រៀងនយោបាយ៖ «នេះ
យោងកិច្ចព្រមព្រៀង២ ទី១ កិច្ចព្រមព្រៀងរវាងគណបក្ស សម រង្ស៊ី
និងគណបក្សសិទ្ធិមនុស្ស នៅទីក្រុងម៉ានីល ប្រទេសហ្វីលីពីន
ដែលរួបរួមគ្នានៅឆ្នាំ២០១២ ហ្នឹង បានបញ្ជាក់ថា លោក សម រង្ស៊ី
នឹងដឹកនាំស្ថាប័ននីតិប្រតិបត្តិ ខ្ញុំដឹកនាំនីតិប្បញ្ញត្តិ
នៅពេលដែលបោះឆ្នោតអាណត្តិទី៥ហ្នឹង។ ទី២
ការព្រមព្រៀងគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិ
តួនាទីអនុប្រធានទី១ ត្រូវបានមកគណបក្សសង្គ្រោះជាតិ
ទោះបីថាបោះមិនបាន ក៏នៅតែត្រូវបានដែរ
ពីព្រោះវាជាកិច្ចព្រមព្រៀងនយោបាយ»។
លោក កឹម សុខា បញ្ជាក់ថា លោក សម រង្ស៊ី
មិនមានឈ្មោះនៅក្នុងសមាសភាពដឹកនាំក្បាលម៉ាស៊ីនរដ្ឋសភាថ្មីនេះទេ
ព្រោះលោកជាប្រធានគណបក្ស
ដែលចាំបាច់ត្រូវគ្រប់គ្រងអ្នកតំណាងរាស្ត្រនៃគណបក្សលោកទាំងមូល។
តំណាងរាស្ត្រគណបក្សប្រជាជនកម្ពុជា លោក ញ៉ែម
ថ្ថារី បានឲ្យដឹងថា មានគណៈកម្មការចំនួន៥ ជាប្រធាន និង
៥ទៀតជាអនុប្រធាន។ ៥ជាប្រធាន គឺមាន លោក ជាម យៀប
ជាប្រធានគណៈកម្មការទី២ លោក ហ៊ុន ណេង ប្រធានគណៈកម្មការទី៤ លោក ឈាង
វុន ប្រធានគណៈកម្មការទី៥ លោក ប៉ែន បញ្ញា ប្រធានគណៈកម្មការទី៦
ប្រធានគណៈកម្មការទី៩ គឺលោកជំទាវ និន សាផុន។ ចំណែក ៥ទៀត ជាអនុប្រធាន
គឺមាន លោក សុខ ឥសាន អនុប្រធានគណៈកម្មការទី១ លោក ហ៊ូ ស៊្រី
អនុប្រធានគណៈកម្មការទី៣ លោក ហែម ខន អនុប្រធានគណៈកម្មការទី៧ លោក
ប៉ាល់ សំអឿន អនុប្រធានគណៈកម្មការទី៨ និងលោក ស៊ិក ប៊ុនហុក
អនុប្រធានគណៈកម្មការទី១០។
ការបោះឆ្នោតរៀបចំក្បាលម៉ាស៊ីនដឹកនាំ
ថ្មីនៃរដ្ឋសភានេះ
ដោយមានដាក់បញ្ចូលអ្នកតំណាងរាស្ត្រមកពីគណបក្សសង្គ្រោះជាតិ
គឺស្របតាមកិច្ចព្រមព្រៀងបញ្ចប់ភាពជាប់គាំងនយោបាយដែលបានចរចា
គ្នាកាលពីថ្ងៃទី២២ ខែកក្កដា ឆ្នាំ២០១៤ រវាងគណបក្សទាំងពីរ
គឺគណបក្សប្រជាជនកម្ពុជា និងគណបក្សសង្គ្រោះជាតិ
ដោយបានបែងចែកតួនាទីដឹកនាំនៅក្នុងគណៈកម្មាធិការអចិន្ត្រៃយ៍នៃ
រដ្ឋសភា និងការបង្កើតបន្ថែមនូវគណៈកម្មការជំនាញថ្មីមួយទៀត៕
_______________________
ប្រភពព័ត៌មានពី៖ អាស៊ីសេរី
ប្រភពព័ត៌មានពី៖ អាស៊ីសេរី
