ប៉ូលិសប៉ុស្តិ៍កំពង់ ព្រះគគីរខឹងទារលុយ ១០០ ដុល្លារ មិនបាន កាប់លបប្រជាពលរដ្ឋចោល
កំពង់ឆ្នាំង: មន្ត្រីប៉ូលិស
ប៉ុស្តិ៍រដ្ឋបាលកំពង់ព្រះគគីរ ស្រុកបរិបូរណ៍ ២ នាក់
បានចុះទៅកាប់បំផ្លាញឧករណ៍នេសាទរបស់ប្រជាពលរដ្ឋ
និងបានយកឧបករណ៍មួយចំនួនទៀត មករក្សាទុកនៅផ្ទះរបស់ខ្លួន
ដោយសារតែខឹងទារលុយ ១០០ ដុល្លារ មិនបាន។
ប្រជានេសាទម្នាក់ឈ្មោះ ជា មានទីលំនៅភូមិកោះកែវ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង បានអោយដឹងថា កាលពីថ្ងៃទី៩ ខែសីហា ឆ្នាំ២០១៤ មានមន្ត្រីប៉ូលិសប៉ុស្តិ៍រដ្ឋបាល ឃុំកំពង់ព្រះគគីរ ស្រុកបរិបូរណ៍ ចំនួន ២ នាក់ ក្នុងនោះ ម្នាក់ឈ្មោះ ទុំ សារ៉ុន និងម្នាក់ទៀត ឈ្មោះ ញ៉ែម សារី បានចុះទៅកាប់របាំងព្រួល និងឡុក ដែលគាត់ដាក់ចាប់ត្រី នៅត្រង់ចំណុច ឃុំកំពង់ព្រះគគីរ ស្រុកបរិបូរណ៍។ ក្រៅពីកាប់បំផ្លាញឧបករណ៍ទាំងនេះ មន្ត្រីប៉ូលិសខាងលើ បានយកលបចំនួន ៣ ទៅរក្សាទុកនៅផ្ទះរបស់ខ្លួន។
ប្រជានេសាទខាងលើ បានអោយដឹងទៀតថា ការចុះទៅកាប់បំផ្លាញឧបករណ៍នេសាទរបស់គាត់ ក្នុងពេលនោះ មន្ត្រីប៉ូលិសទាំង ២ នាក់នេះ មិនបានសហការជាមួយអាជ្ញាធរ មន្ត្រីជំនាញជលផល និងសហគមន៍នេសាទឡើយ គឺពួកគេធ្វើដោយកំហឹង បន្ទាប់ពីជម្រិតទារលុយពីគាត់ចំនួន ១០០ ដុល្លារ មិនបាន។
ប្រជានេសាទរូបនេះ បានអោយដឹងទៀតថា នៅមុនពេលប៉ុន្មានថ្ងៃ ដែលមន្ត្រីប៉ូលិសទាំងនោះ ចុះទៅកាប់បំផ្លាញឧបករណ៍នេសាទរបស់គាត់ គឺលោក ប៉ាង ពុំសែន ដែលជានាយប៉ុស្តិ៍រដ្ឋបាលកំពង់ព្រះគគីរ បានទូរស័ព្ទទៅទារលុយគាត់ ចំនួន ១០០ ដុល្លារ ប៉ុន្តែគាត់គ្មានលុយអោយ សុំអង្វរត្រឹម ៥០ ដុល្លារ ប៉ុន្តែលោកមេប៉ុស្តិ៍ មិនព្រម ក៏បញ្ជាកូនចៅអោយចុះទៅកាប់បំផ្លាញឧបករណ៍នេសាទរបស់គាត់ចោលតែម្តង ។
ក្រោយពីមានហេតុការណ៍នេះកើតឡើង នៅថ្ងៃទី១០ ខែសីហា ឆ្នាំ២០១៤ លោក ឃួន សៅរ៉ុម ដែលជាអភិបាលស្រុកបរិបូរណ៍ លោកមេឃុំកំពង់ព្រះគគីរ និងមន្ត្រីសហគមន៍នេសាទមួយចំនួនទៀតបានចុះទៅដោះស្រាយដោយកំណត់អោយ មន្ត្រីប៉ុស្តិ៍ ប្រគល់ឧបករណ៍លបចំនួន៣គ្រឿង ទៅអោយម្ចាស់ឈ្មោះ ជា វិញ និងបានហាមមិនអោយមន្ត្រីប៉ូលិសប៉ុស្តិ៍កំពង់ព្រះគគីរ ចុះធ្វើសកម្មភាពកាប់បំផ្លាញឧបករណ៍នេសាទរបស់ប្រជាពលរដ្ឋ ដោយមិនមានកិច្ចសហការជាមួយអាជ្ញាធរដែនដី និងមន្ត្រីជំនាញទៀតឡើយ។
ប្រជាពលរដ្ឋនៅក្នុងឃុំកំពង់ព្រះគគីរ ស្រុកបរិបូរណ៍ បាននិយាយអោយដឹង សព្វថ្ងៃនេះ លោកនាយប៉ុស្តិ៍ ប៉ាង ពុំសែន បានធ្វើអោយប្រជាពលរដ្ឋនៅក្នុងមូលដ្ឋាននេះជាច្រើន មិនសប្បាយចិត្ត ដោយសារតែគាត់មិនបានយកចិត្តទុកដាក់ចំពោះបញ្ហាសន្តិសុខ នៅក្នុងមូលដ្ឋានឡើយ គឺលោកនាយប៉ុស្តិ៍រូបនេះពួកែតែម្យ៉ាងគត់ គឺដើរជម្រិតលុយពីប្រជានេសាទ និងបានបង្កនូវរឿងអាស្រូវជាច្រើនផងដែរ។
ករណីនេះ ប្រជាពលរដ្ឋបានសំណូមពរ ដល់លោកស្នងការ និង លោកអភិបាល ខេត្តកំពង់ឆ្នាំង មេត្តាជួយមានវិធានការ ចំពោះលោកមេប៉ុស្តិ៍ឈ្មោះ ប៉ាង ពុំសែន នេះផង ពីព្រោះសព្វថ្ងៃលោកមេប៉ុស្តិ៍ម្នាក់នេះ បានបង្កភាពក្តៅក្រហាយដល់ប្រជាពលរដ្ឋជាច្រើន។
លោក ប៉ាង ពុំសែន នាយប៉ុស្តិ៍រដ្ឋបាលកំពង់ព្រះគគីរ បានបញ្ជាក់ប្រាប់តាមទូរស័ព្ទថា លោកបានបញ្ជាមែន ប៉ុន្តែមិនបានទៅកាប់បំផ្លាញទេ គ្រាន់តែទៅកាត់យកលបមកទុកអោយគាត់មកជួប ដើម្បីណែនាំគាត់ អោយគាត់បញ្ឈប់សកម្មភាពនេសាទ ពីព្រោះរដូវនេះ គឺជារដូវបិទវាខុសច្បាប់។ លោកក៏មិនបានទៅជម្រិតទារប្រាក់ពីឈ្មោះជានោះដែរ។
លោក ប៉ាង ពុំសែន បានបញ្ជាក់ទៀតថា ពាក់ព័ន្ធទៅនឹងប្រជាពលរដ្ឋក្តៅក្រហាយដោយសារតែលោកទៅទារលុយទារកាក់ ពីប្រជាពលរដ្ឋទាំងនោះ ជារឿងមិនពិតទេ កន្លងទៅនេះ លោកមិនដែលបានលុយពីពួកល្មើសនេសាទនោះមួយរៀលឡើយ៕
