សហជីពជាតិនិងអន្តរជាតិ ជាង៣០ផ្ដល់អនុសាសន៍លើ សេចក្ដីព្រាងច្បាប់សហជីព
តំណាង
សហជីពជាតិជាង ៣០អង្គភាព
បានជួបប្រជុំជាមួយក្រុមប្រឹក្សាសហជីពអន្តរជាតិ ហៅកាត់ថា
អាយ.ធី.យូ.ស៊ី ស៊ី.ស៊ី (ITUC-CC) លើកឡើងអំពីអនុសាសន៍មួយចំនួន
សុំឲ្យរដ្ឋាភិបាលដាក់បញ្ចូលទៅក្នុងសេចក្ដីព្រាងច្បាប់សហជីព។
រដ្ឋាភិបាលកំពុងរៀបចំសេចក្ដីព្រាងច្បាប់ស្ដីពីសហជីពដើម្បីដាក់
ឲ្យសភាពិនិត្យនិងអនុម័តនៅពេលខាងមុខ។
តំណាងសហជីពជាតិបានរិះគន់សេចក្ដីព្រាង
ច្បាប់សហជីពដែលរដ្ឋាភិបាលបានរៀបចំថា
បានរឹតបន្តឹងដល់សេរីភាពបង្កើតសហជីពរបស់កម្មករ
និងមានចំណុចខ្លះផ្ទុយពីអនុសញ្ញាអន្តរជាតិមួយចំនួនដែលរដ្ឋាភិបាល
ជាហត្ថលេខីទៀតផង។
កិច្ចប្រជុំផ្ដើមដោយសហជីពធំៗ
ស្ដីពីការផ្ដល់យោបល់ និងអនុម័តសំណើរួមរបស់ក្រុមដឹកនាំសហជីពជាតិ
និងអន្តរជាតិទៅលើសេចក្ដីព្រាងច្បាប់សហជីពបានរៀបចំឡើងនៅព្រឹក
ថ្ងៃច័ន្ទ ទី១៤ ខែកក្កដា នាសណ្ឋាគារហ្គ្រីន ផាលេស ក្រុងភ្នំពេញ។
លោក អាត់ ធន់ ប្រធានសហភាពការងារកម្ពុជា
និងជាប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា
ហៅកាត់ ស៊ីខាវឌូ (CCAWDU)។
លោកបានរិះគន់សេចក្ដីព្រាងច្បាប់សហជីពរបស់ក្រសួងការងារ
ថារារាំងការតវ៉ារបស់កម្មករ
និងប៉ះពាល់សិទ្ធិរបស់កម្មករធ្ងន់ធ្ងរនៅថ្ងៃអនាគត។
លោកទទូចដល់ក្រសួងការងារ
ត្រូវដាក់បញ្ជូនអនុសាសន៍របស់សហជីពចូលទៅក្នុងសេចក្ដីព្រាងច្បាប់
សហជីពឲ្យបានច្រើន
មុននឹងដាក់សុំសេចក្ដីទុកចិត្តពីសមាជិករដ្ឋសភា
អនុម័តច្បាប់នេះ៖ «អ្វីដែលសហជីពបានដាក់ជូនអនុសាសន៍ជូន
រដ្ឋាភិបាលថ្ងៃនេះ ជូនដល់ក្រសួង
ក្រសួងគួរដាក់បញ្ចូលទៅក្នុងសេចក្ដីព្រាងច្បាប់ហ្នឹង។
បើមិនអ៊ីចឹងទេ សហជីពគេនឹងមិនសុខចិត្តទេ គេនឹងតវ៉ាបន្ថែមទៀត
ព្រោះជាបានប៉ះពាល់ដល់សិទ្ធិជាមូលដ្ឋាន។ ហើយច្បាប់នេះ
មិនមែនមានន័យថា
ពេលហ្នឹងមិនមែនអនុវត្តទៅសហជីពពេលបច្ចុប្បន្នហ្នឹងទេ?
គឺច្បាប់នេះអនុវត្តរហូត។ អ៊ីចឹងមិនថា សហជីពមាននិន្នាការនយោបាយណា
ឬអ្នកណាមួយនោះទេ បើអ្នកឯងធ្វើការនៅក្នុងរដ្ឋាភិបាល ឬអីក៏ដោយ
ក៏មានបងប្អូន ឬកូនក្មួយធ្វើការជាកម្មករដែរ។
ប៉ុន្តែបើសហជីពត្រូវបានរឹតបន្តឹង ហើយគ្មានសេរីភាពសហជីព បានន័យថា
សិទ្ធិកម្មករត្រូវធ្លាក់ចុះ ប្រាក់ចំណូលធ្លាក់ចុះ
និងសេរីភាពកម្មករក៏បានធ្លាក់ចុះ។ អ៊ីចឹងបានសេចក្ដីថា
កម្មករហ្នឹងត្រូវបានគេគាបសង្កត់ខ្លាំងណាស់។
អ៊ីចឹងវាបានប៉ះពាល់ជាទូទៅ»។
សេចក្ដីព្រាងច្បាប់ស្ដីពីសហជីពដែលមាន
ចំនួន ១៧ជំពូក និង ៩១មាត្រា ត្រូវតំណាងក្រសួងការងារ សហជីពកម្មករ
និងតំណាងថៅកែរោងចក្រ លើកយកមកពិភាក្សាចុងក្រោយនៅថ្ងៃទី២៨- ២៩
ខែឧសភា មុនដាក់ជូនគណៈរដ្ឋមន្ត្រីពិនិត្យជាថ្មី
និងឈានដល់ស្នើសេចក្ដីទុកចិត្តពីសមាជិករដ្ឋសភា។
ប៉ុន្តែសេចក្ដីព្រាងនេះ ត្រូវមេដឹកនាំសហជីពធំៗជាច្រើនមិនយល់ស្រប
និងស្នើដាក់បញ្ចូលអនុសាសន៍ឲ្យបានច្រើនថែមទៀតចូលទៅក្នុងច្បាប់
នេះ។
ប្រធានសម្ព័ន្ធសហជីពកម្ពុជា អ្នកស្រី យ៉ាង
សុភ័ណ្ឌ ឲ្យដឹងថា
កិច្ចប្រជុំផ្ដល់យោបល់ទៅលើសេចក្ដីព្រាងច្បាប់សហជីពនេះ
ក្រុមមេដឹកនាំសហជីពជាច្រើនបានស្នើឲ្យក្រសួងការងារ
លុបចោលមាត្រាខ្លះនៅក្នុងច្បាប់នេះ
ព្រោះបានរឹតត្បិតធ្ងន់ធ្ងរដល់សេរីភាពបង្កើតសហជីព
និងកម្មករនាថ្ងៃអនាគត៖ «នៅក្នុងហ្នឹងដែរ
យើងបានលើកឡើងនៅក្នុងមាត្រា ១០ មាត្រា ១២ មាត្រា ១៣ មាត្រា ២៣ មាត្រា
៨០ និងមាត្រា ៨១ រួមទាំងមាត្រាផ្សេងទៀតដែលយើងលើកឡើងលម្អិត។
ហើយនៅក្នុងមាត្រាទាំងអស់ហ្នឹង យើងស្នើសុំឲ្យមាត្រាខ្លះ
ត្រូវលុបចោលទាំងស្រុងតែម្ដងមានដូចជា៖ មាត្រា ៨០ និងមាត្រា
ដែលចែងពីទោសបញ្ញត្តិរបស់សហជីព
និងការអនុវត្តមិនត្រឹមត្រូវរបស់សហជីពជាដើម គឺស្នើឲ្យលុបចោល។
ពីព្រោះមាត្រានីមួយៗ
ដែលយើងបានលើកឡើងនេះវាផ្ទុយពីបទដ្ឋានការងាររបស់អង្គការពលកម្ម
អន្តរជាតិ អាយឡូ (ILO) ឬអនុសញ្ញាអាយឡូ លេខ ៨៧ និង ៩៨ ជាដើម»។
បន្ថែមលើនេះ ក្រុមមេដឹកនាំសហជីពបញ្ជាក់ថា
សេចក្ដីព្រាងច្បាស់សហជីពដែលកំពុងពិភាក្សាគ្នានេះ
រដ្ឋាភិបាលបានដាក់លក្ខខណ្ឌផ្ទុយទៅនឹងស្មារតីនៃច្បាប់ស្ដីពី
ការងារ និងផ្ទុយពីអនុសញ្ញានៃអង្គការពលកម្មអន្តរជាតិថែមទៀត
ដែលយើងបានលើកឡើងលំអិត។
ទោះយ៉ាងណា លោក អ៊ិត សំហេង
រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានបញ្ជាក់ថា
សេចក្ដីព្រាងច្បាប់សហជីព
គឺមានគោលបំណងផ្ដល់សិទ្ធិសេរីភាពជូនដល់សហគ្រាស គ្រឹះស្ថាន
ឬជនទាំងឡាយណាដែលស្ថិតនៅក្រោមបទប្បញ្ញត្តិនៃច្បាប់ស្ដីពី
ការងារ។
លោកបានបញ្ជាក់ថា
ច្បាប់សហជីពនេះជួយសម្រួលការប្រព្រឹត្តទៅរបស់អង្គការវិជ្ជាជីវៈ
នានានៅក្នុងប្រទេសកម្ពុជា ឲ្យបានត្រឹមត្រូវ។ បន្ថែមលើនេះ
សេចក្ដីព្រាងច្បាប់សហជីពក៏នឹងកំណត់ពីគោលដៅច្បាប់ដើម្បីជួយ
ការពារសិទ្ធិ
និងផលប្រយោជន៍ស្របច្បាប់របស់ជនទាំងឡាយដែលស្ថិតក្រោមបទប្បញ្ញត្តិ
ច្បាប់ការងារ
ដើម្បីធានានូវសិទ្ធិសេរីភាពក្នុងការជួបចរចាជាសមូហភាពរវាងនិយោជក
កម្មករ ឬនិយោជិត។
ច្បាប់នេះក៏នឹងជំរុញឲ្យមានសុខដុមរមនាការងារជាដើម៕
ប្រភពពី វិទ្យុអាស៊ីសេរី
