សមត្ថកិច្ចរារាំងយុវជននិង ព្រះសង្ឃមិនឲ្យទៅមើល បង្គោលសីមាព្រំដែន
កណ្តាលៈ សមត្ថកិច្ច
ចម្រុះទាហាន និងនគរបាល ខេត្តកណ្តាល
បានធ្វើការរារាំងយុវជននិងព្រះសង្ឃជាង ២០០
នាក់និងអង្គដែលបានព្យាយាមចូលមើលការកំណត់បង្គោលសីមារវាង កម្ពុជា
និង វៀតណាម កាលថ្ងៃសុក្រកន្លងមក
ខណៈពួកគេបានទៅធ្វើពិធីបុណ្យពុទ្ធសាសនាមួយ នៅក្នុង
ឃុំព្រែកថ្មី ស្រុកកោះធំ ខេត្តកណ្តាល។
មន្រ្តីម្នាក់ក្នុងចំណោមមន្រ្តីនគរបាលដែល
បានព្យាយាមរារាំង យុវជន និងព្រះសង្ឃ
ដែលមានសម្ព័ន្ធភាពជាមួយគណបក្សសង្គ្រោះជាតិ
បានប្រាប់ទៅក្រុមសកម្មជនទាំងនោះថា
អាជ្ញាធរគេនឹងមិនអនុញ្ញាតឲ្យសកម្មជនទាំងនោះទៅមើលបង្គោលព្រំដែន
កម្ពុជា‑វៀតណាម ទេ
ពីព្រោះសកម្មជនទាំងនោះមិនបានជម្រាបទៅអាជ្ញាធរជាមុន។
មន្រ្តីនគរបាលបានបន្តទៀតថា៖
«អ្នកទាំងអស់គ្នាមិនអាចទៅក្រៅវត្តជាដាច់ខាត
ពីព្រោះបន្ទាត់ព្រំដែនគឺនៅជិតមុខវត្ត។
ពាក់ព័ន្ធនឹងថ្នាក់មូលដ្ឋាន នៅពេលអ្នកទាំងអស់គ្នាមកដូចនេះ
ត្រូវតែជម្រាបអាជ្ញាធរ
ប៉ុន្តែអ្នកទាំងអស់គ្នាមិនបានជម្រាបអាជ្ញាធរ។
ដូច្នេះអ្នកទាំងអស់គ្នាអាចមកបានត្រឹមតែវត្តប៉ុណ្ណោះ»។
ស្រ្តីម្នាក់ក្នុងចំណោមសកម្មជនទាំងនោះ
បានប្រាប់នគរបាលខណៈពួកគេកំពុងតែប្រឈមមុខគ្នានៅជិតព្រំដែន
បង្ហោះនៅក្នុងវីដេអូគ្លីបមួយបានថ្លែងថា៖
«ប្រជាជនរបស់យើងបាននិយាយថា ពួកគេចង់ទៅលេងព្រំដែន។
យើងទៅមើលព្រំដែនទេ។ យើងជាពលរដ្ឋ យើងមានសិទ្ធិ»។
សៀង អុល អ្នកភូមិម្នាក់បានថ្លែងថា
បង្គោលព្រំដែនត្រូវបានដាំនៅលើដីខ្មែរ
ហើយអាជ្ញាធរតែងតែរារាំងប្រជាជនមិនឲ្យទៅមើល។ លោកថា៖
«នគរបាលមិនអនុញ្ញាតឲ្យយើងចូលទៅកន្លែងបង្កោលព្រំដែន។
យើងនៅទីនេះក្រោមការបញ្ជារបស់ពួកគេ»។
អឿ ណារិទ្ធ ប្រធានក្រុមយុវជនសន្តិភាព
ដែលបានដឹកនាំយុវជនទៅមើលបង្កោលព្រំដែន កម្ពុជា‑វៀតណាម ថ្លែងថា
យុវជននិងព្រះសង្ឃជិត ២០០
នាក់បានទៅមើលខ័ណ្ឌសីមាព្រំដែនកាលថ្ងៃសុក្រ
ប៉ុន្តែពួកគេមិនបានទៅដល់ទីតាំងនៃបង្គោលព្រំដែនដោយសារការ
រារាំងរបស់នគរបាល។
លោក អឿ ណារិទ្ធ ថា៖
«ខ្ញុំត្រូវតែឈឺចាប់ដែលរដ្ឋាភិបាលរបស់យើងមិនបានយកចិត្តទុកដាក់
អំពីព្រំដែនឲ្យ វៀតណាម រំកិលចូលមកក្នុងដីកម្ពុជា។
ខ្មែររារាំងខ្មែរមិនឲ្យទៅមើលព្រំដែនដូចនេះ
យើងមិនអាចទទួលយកបានទេ ហើយយើងថ្កោលទោសចំពោះការរារាំងបែបនេះ»។
អធិការនគរបាល ស្រុកកោះធំ លោក មុយ ចាន់ពេជ្រ
បានបញ្ជាក់ពីម្សិលមិញថា
នគរបាលរបស់លោកមិនបានរារាំងសកម្មជនទាំងនោះមិនឲ្យទៅមើលព្រំដែន
ទេ ផ្ទុយទៅវិញនគរបាលបានការពារនិងអមដំណើរពួកគេទៅមើលព្រំដែន
ហើយអាជ្ញាធរមូលដ្ឋានមិនស៊ីជម្រៅអំពីបញ្ហាព្រំដែនទេ។
លោកបានថ្លែងបន្តថា៖
«យើងអមដំណើរពួកគេទៅដល់ព្រំដែនហើយបានប្រាប់ពួកគេមិនឲ្យឆ្លង
ព្រំដែនក្រែងខាង វៀតណាម ចាប់ខ្លួន»៕
ប្រភពពី ភ្នំពេញប៉ុស្តិ៍
