ចាប់បញ្ជូនខ្លួនប្រធានអង្គការម្នាក់ ទៅតុលាការ ពីបទនាំក្មេងប្រុសស្រី ឲ្យរួមភេទជាមួយជនបរទេស
សៀមរាប: ប្រធានអង្គការ អាន់ដឺព្រីវីលិកកម្ពុជា (Underbrivileged Cambodia)
បានត្រូវនគរបាលប្រឆាំងការ ជួញដូរមនុស្ស និងការពារអនីតិជនខេត្ត
ចាប់ខ្លួនភ្លាមៗ បន្ទាប់ពីមានការសង្ស័យថា នាំក្មេងប្រុសស្រី
ឲ្យរួមភេទ ជាមួយជនបរទេស ដែលជាថ្នូរប្រាក់ជំនួយ សំរាប់ផ្គត់ផ្គង់
អង្គភាពអង្គការ។ នៅថ្ងៃទី៩ ខែកក្កដា ឆ្នាំ២០១៤នេះ ជនសង្ស័យរូបនេះ
នឹងត្រូវបញ្ជូនទៅតុលាការ ដើម្បីអនុវត្តន៍តាមច្បាប់ជាបន្ត។ការចាប់ខ្លួនជនខាងលើ បានធ្វើឡើងនៅល្ងាចថ្ងៃទី៧ ខែកក្កដា ឆ្នាំ២០១៤ នៅស្នងការនគរបាលខេត្ត បន្ទាប់ពី កោះហៅមកសាកសួរ។ បុរសជនជាតិខ្មែរម្នាក់នេះ ឈ្មោះ ឡំ វេហា អាយុ៣២ឆ្នាំ មានស្រុកកំណើត នៅជិតស្នាក់ការរបស់ខ្លួន ស្ថិតក្នុងភូមិសំបាត ឃុំខ្នារពោរ ស្រុកសូទ្រនិគម ខេត្តសៀមរាប។ មុនពេលចាប់ខ្លួន ស្នាក់នៅបន្ទប់ជួល ភូមិតាភុល សង្កាត់ស្វាយដង្គុំ ក្រុងសៀមរាប ជាមួយក្មេងប្រុសស្រី ៩នាក់។
លោកស្រី ដួង ថាវរី នាយការិយាល័យ នគរបាលប្រឆាំង ការជួញដូរមនុស្ស និងការពារអនីតិជនខេត្ត បានឲ្យដឹងថា ក្រោយមានការសង្ស័យ សមត្ថកិច្ចបានតាមអង្កេត និងកោះហៅបុរសនោះ មកសាកសួរ។ ក្នុង ពេលសាកសួរ ចម្លើយជនរូបនេះ ជាប់ពាក់ព័ន្ធ និងការនាំក្មេងឲ្យរួមភេទ ជាមួយជនបរទេស ទើបសុំបញ្ជាព្រះរាជអាជ្ញា ឃាត់ខ្លួនតែម្តង។
ក្រោយពេលឃាត់ខ្លួន សមត្ថកិច្ចបានតាមទៅស្រាវជ្រាវ ដល់ស្នាក់ការអង្គការ ឯស្រុកសូទ្រនិគម និងបន្ទប់ជួល ក្នុងភូមិតាភុល ក្នុងក្រុងសៀមរាប។ លោកស្រីបន្តថា នៅបន្ទប់ជួល ជននេះមានក្មេង ប្រុសស្រី៩នាក់ រស់នៅជាមួយជាប្រចាំ ដែលមានអាយុ ១៦ដល់១៩ឆ្នាំ។ ក្មេងទាំង៩នាក់ ត្រូវជនខាងលើ ចិញ្ចឹមឲ្យរៀនសូត្រ ក្រោមការសុំជំនួយពីបរទេស តាមរយៈអនឡាញ និងសុំដោយផ្ទាល់មាត់។ តែបើម្ចាស់ជំនួយណា ទាមទារសំណង ប្រធានអង្គការនាំក្មេងទាំងនោះ ទៅឲ្យរួមភេទជាមួយ ដែលជាថ្នូរប្រាក់ជំនួយ ។ តែក៏មានម្ចាស់ជំនួយ ជាជនបរទេសខ្លះ មិនបានទាមទារសំណងដែរ។
លោកស្រីនាយការិយាល័យ បានឲ្យដឹងទៀតថា ក្នុងចំណោមក្មេងប្រុសស្រី ទាំង៩នាក់ ដែលរស់នៅជាមួយ ជាប្រចាំ មានក្មេងប្រុសចំនួន៣នាក់ បានត្រូវលោកប្រធានអង្គការ នាំយកទៅឲ្យរួមភេទ ជាមួយជនបរទេស ជាថ្នូរនឹងប្រាក់ជំនួយ។ ប៉ុន្តែប្រាក់ជំនួយ ដែលទទួលបាន ពីតាមរយៈសុំផ្ទាល់ អនឡាញ និងលក់ពេស្យាចារកុមារ ជនខាងលើ មិនបានយកមកផ្គត់ផ្គង់ ក្មេងទាំងនោះទេ ដោយម្តាយឪពុកពួកគេ(ក្មេង) ជាអ្នកផ្តល់អង្ករ និងប្រាក់សំរាប់ រៀនសូត្រទៅវិញ។
ដោយឡែក នៅស្នាក់ការអង្គការ ឯស្រុកសូទ្រនិគម ប្រធានអង្គការ បានប្រមូលក្មេង ៧០ ទៅ ៨០ នាក់ ដែល មានអាយុ១៣ឆ្នាំ ចុះក្រោម ឲ្យមករៀនម្តងម្កាល ដោយឲ្យប្អូនស្រីរបស់គេម្នាក់ ជាអ្នកនៅចាំជួយបង្រៀន។ ការធ្វើរបៀបនេះ ងាយស្រួលក្នុងការស្នើ សុំជំនួយពីបរទេស។ តាមពិតអង្គការមួយនេះ បើកស្នាក់ការ ពុំមានច្បាប់ទេ ហើយក៏មិនទាន់ដឹងថា មានរយៈពេលប៉ុន្មានឆ្នាំ មកហើយដែរ ពីព្រោះមិនមានឯកសារ បញ្ជាក់ពីការបើកស្នាក់ការ។
លោកស្រី ដួង ថាវរី បានបញ្ជាក់ថា បន្ទាប់ពីស្រាវជ្រាវ ដល់ស្នាក់ការ និងបន្ទប់ស្នាក់នៅ ពេលនេះ សមត្ថកិច្ច កំពុងបន្តស្រាវជ្រាវ ជនដែលជាប់ពាក់ព័ន្ធ ការទិញពេស្យាចារ។ ចំណែកជនសង្ស័យ នឹងត្រូវបញ្ជូនទៅតុលាការ នៅថ្ងៃទី៩ ខែកក្កដា ឆ្នាំ២០១៤ ដើម្បីអនុវត្តន៍ជាបន្ត៕V
ជនសង្ស័យ ប្រធានអង្គការ ចាប់ខ្លួនពីបទនាំក្មេងប្រុសស្រី ឲ្យរួមភេទ ជាមួយជនបរទេស ជាថ្នូរនឹងប្រាក់ជំនួយ
ប្រភពពី CEN
