រាជធានីភ្នំពេញ៖ កងរាជអាវុធហត្ថ​លើ​ផ្ទៃ​ប្រទេស បាន​ចេញ​សេចក្តី​ជូន​ដំណឹង​មួយ ទៅកាន់​អគ្គនាយក​ក្រុមហ៊ុន​ទូរទស្សន៍​ខ្សែកាប ទាំងអស់​នៅ​ភ្នំពេញ និង​តាម​ណ្តា​ខេត្ត ឲ្យ​បញ្ឈប់​ការចាក់ផ្សាយ​បន្ត​ពី​ការប្រកួត​បាល់ទាត់​ពិភពលោក​។

សេចក្តីជូនដំណឹង ចុះ​ថ្ងៃ​ទី​០៤ ខែកក្កដា ឆ្នាំ​២០១៤ ចុះហត្ថលេខា​ដោយ​លោក​ឧត្តមសេនីយ៍​ឯក វង្ស ពិ​សេន មេបញ្ជាការរង​កងរាជអាវុធហត្ថ​លើ​ផ្ទៃ​ប្រទេស បាន​ព្រមាន​ទៅកាន់​អគ្គនាយក​ក្រុមហ៊ុន​ទូរទស្សន៍​ខ្សែកាប​ទាំងអស់​ថា ករណី​មិន​ព្រម​បញ្ឈប់​ការផ្សាយ ហើយ​បន្ត​រំលោភបំពាន​ទៀត​នោះ អាជ្ញា​ធរមាន​សមត្ថកិច្ច នឹង​ចាត់វិធានការ​តាមច្បាប់​។​

សេចក្តីជូនដំណឹង លើកឡើងថា ក្រុមហ៊ុន​ទូរទស្សន៍​ខ្សែកាប PPCTV និង CCTV នៅ​ទីក្រុង​ភ្នំពេញ ព្រមទាំង​បណ្តា​ក្រុមហ៊ុន​ទូរទស្សន៍​ខ្សែកាប តាម​បណ្តា​ខេត្ត​មួយចំនួន ដូចជា នៅ​ខេត្ត​សៀមរាប បាត់​បំបង បាន​ធ្វើការ​ចាប់​យក​រូ​ប​ភាព​នូវ​ការប្រកួត​បាល់ទាត់ 2014 FIFA World Cup ផ្សាយ​បន្ត​ផ្ទាល់​ពី​ទូរទស្សន៍​បរទេស ដូចជា វៀតណាម ( ប៉ុស្តិ៍ VTV3 ) ថៃ ( ប៉ុស្តិ៍​លេខ​៧ ) និង​ម៉ាឡេស៊ី ( ប៉ុស្តិ៍ ASTRO ) ជាដើម ដោយ​គ្មាន​ការអនុញ្ញាត​ពី​សហព័ន្ធ​កីឡាបាល់ទាត់​ពិភពលោក FIFA ឬ​ស្ថានីយទូរទស្សន៍ CTN និង MY TV ដែល​ជា​ម្ចាស់​កម្មសិទ្ធិបញ្ញា​។​

​សេចក្តីជូនដំណឹង​របស់​ កងរាជអាវុធហត្ថ​លើ​ផ្ទៃ ​ប្រទេស បាន​គូសបញ្ជាក់ថា “​ទង្វើ​ទាំងអស់នេះ គឺជា​ការប្រកួត​ប្រជែង​​ដោយ​គ្មាន​ភាពស្មោះត្រង់ ហើយ​ជា​ការរំលោភ​បំពាន​ទៅលើ​កម្មសិទ្ធិបញ្ញា​របស់​ស្ថានីយទូរទស្សន៍ CTN និង MY TV ក៏ដូចជា សហព័ន្ធ​កីឡា​បាល់ទាត់​ពិភពលោក FIFA ដែល​ធ្វើឲ្យប៉ះពាល់​ដល់​កិត្តិយស កេរ្តិ៍ឈ្មោះ​របស់​ប្រទេស​កម្ពុជា លើ​ឆាក​អន្តរជាតិ​យ៉ាងធ្ងន់ធ្ងរ ក្នុង​ការចូលរួម​អនុវត្តន៍​ច្បាប់​ស្តីពី​ការគោរព និង​ការពារ​កម្មសិទ្ធិបញ្ញា​”៕​

ប្រភពពី Free Press Magazine