រដ្ឋាភិបាល យោធាថៃ ដែលឡើង កាន់អំណាច តាមរយៈការធ្វើរដ្ឋប្រហារ យោធាកាល ពីថ្ងៃទី២២ ខែឧសភា ឆ្នាំ ២០១៤បានប្រើប្រាស់ច្បាប់ អាជ្ញាសឹក ដើម្បីបោសសំអាត ពលករបរទេស ខុសច្បាប់ ក្រោមលេស រក្សាសន្តិសុខជាតិ ហើយបានចាប់បញ្ជូន ពលករខ្មែរ ជាង២០ម៉ឺននាក់ ត្រឡប់មកស្រុកវិញ ផងដែរ ។ អំពើរបស់អាជ្ញាធររដ្ឋាភិបាលថៃក្នុងការ ចាប់បញ្ជូនពលករខ្មែរ ត្រឡប់មកស្រុកវិញ ដោយដឹក តាម រថយន្ត ទ្រុងសំណាញ់ដែក រថយន្តដឹកសំរាម រថយន្តដឹកទំនិញ និងរថយន្តដឹកអេតចាយជាដើម យកមកចាក់ចោល នៅច្រកព្រំដែននានាត្រូវប្រឈមនឹងការរិះគន់ជុំទិស ។ រដ្ឋាភិបាល យោធាថៃកំពុង ប្រឈម នឹងការរិះគន់យ៉ាងខ្លាំងក្លា ព្រោះបានប្រព្រឹត្តបំពានលើសន្ធិសញ្ញា អន្តរជាតិស្តីពីសិទ្ធិមនុស្ស និង បានប្រមាថមើលងាយ ពលករខ្មែរដូចសត្វធាតុ ។ ឥឡូវនេះទង្វើខ្វះការពិចារណា របស់អាជ្ញាធររដ្ឋាភិបាល យោធាថៃ កំពុងធ្វើឲ្យសេដ្ឋកិច្ចរបស់ថៃធ្លាក់ចុះយ៉ាងគំហុក ព្រោះក្រុមហ៊ុនរោងចក្រសហគ្រាស នានាខ្វះកម្លាំងពលករសម្រាប់ បម្រើការងារនៅពេលដែលរបបយោធា អនុវត្តន៍ច្បាប់អាជ្ញាសឹកតឹង តែងខ្លាំងពេក ។

អ្នកតាមដានស្ថាន ភាពសន្តិសុខសង្គម និងសេដ្ឋកិច្ច នៅក្នុងប្រទេសថៃ បានឲ្យដឹងថា ចំណាត់ការរបស់ រដ្ឋាភិបាល យោធាដែលកើតចេញពីការធ្វើរដ្ឋប្រហារផ្តួលរំលំរដ្ឋាភិបាលរបស់លោកស្រី យីងឡាក់ ស៊ីណាវ៉ាត្រា កំពុងធ្វើឲ្យ សេដ្ឋកិច្ចប្រទេសថៃប្រឈមនឹងការធ្លាក់ចុះយ៉ាងគំហុក ។ ជាក់ស្តែង សហភាពអឺរ៉ុបបានលុបចោលនូវកិច្ចសន្យាផ្សេងៗ ជាមួយប្រទេសថៃក្នុងនោះ មានកិច្ចសន្យាពាក់ព័ន្ធ សេដ្ឋកិច្ចពាណិជ្ជកម្មផងដែរ ហើយសហគមន៍អន្តរជាតិបានថ្កោល ទោសរដ្ឋប្រហារនៅក្នុងប្រទេសថៃ ទៀតផង ។ មានន័យថា នៅពេលរដ្ឋាភិបាលយោធាថៃចាប់បញ្ជូនពលករខ្មែរ ពលករ ភូមា និងពលករ ឡាវ ឲ្យត្រឡប់មកស្រុកវិញយ៉ាងតក់ក្រហល់ គឺកំពុងតែធ្វើឲ្យសេដ្ឋកិច្ចថៃ ប្រឈមនឹងការធ្លាក់ចុះយ៉ាង គំហុក ។ ដោយហេតុថា ថ្វីត្បិតតែពលករទាំងនោះឆ្លងដែន ចូលទៅរកការងារធ្វើលើទឹកដីថៃ ដោយខុស ច្បាប់មែន ប៉ុន្តែ ក្រុមហ៊ុនដែលត្រូវការកម្លាំងពលកម្មយ៉ាងច្រើននោះ ជាក្រុមហ៊ុនស្របច្បាប់ ហើយភាគ ច្រើន ជាក្រុមហ៊ុនផលិតទំនិញនាំ ចេញក្រៅប្រទេស និង ក្រុមហ៊ុនកសិកម្មធំៗនាំផ្លែឈើ និងបន្លែបង្ការ ចេញ ក្រៅប្រទេស ។

នៅក្រោមលេស នៃការពង្រឹងសន្តិសុខជាតិ រដ្ឋាភិបាលយោធាថៃ បានបើកប្រតិបត្តិការ យ៉ាងក្តៅគគុកក្នុងការចាប់ បញ្ជូនពលករខ្មែរ និងពលករនៃបណ្តា ប្រទេសមួយចំនួនទៀត ឲ្យត្រឡប់មកស្រុកវិញ យ៉ាងអមនុស្សធម៌បំផុត ។ ទោះជា យ៉ាងណាការពង្រឹង សន្តិសុខជាតិ នៅក្នុងប្រទេសថៃ ដោយ ក្រុមយោធា កំពុងតែនាំឲ្យមាន ការបែកបាក់ផ្ទៃ ក្នុងជាតិរបស់ ខ្លួនយ៉ាងធ្ងន់ធ្ងរបំផុត ព្រោះក្រុមអ្នកគាំទ្រ គណបក្សភឿថៃមិននៅស្ងៀមឡើយ ។ ជាក់ស្តែងអតីតមេដឹកនាំគណបក្សភឿ ថៃកាលពីថ្ងៃទី២៤ ខែមិថុនា ឆ្នាំ២០១៤បានប្រកាសពីការបង្កើតក្រុមមួយ ដើម្បីប្រឆាំងរបបយោធា ដែលជាការប៉ុនប៉ង នឹងការដឹកនាំនៃរបបយោធាបច្ចុប្បន្ន ។ ក្រុមអ្នកវិភាគបានលើកឡើងថា ប្រសិនបើក្រុមអាវក្រហម បង្កើតក្រុមមួយទាំង នៅក្នុងប្រទេស និងនៅក្រៅប្រទេស ដើម្បីប្រឆាំងរបបយោធានោះ គឺប្រទេសថៃ នឹងជួបភាពវឹកវរចលាចលយ៉ាងពេញ បន្ទុកជាមិនខាន ហើយអាចមានសង្គ្រាមស៊ីវិលកើតឡើងផងដែរ ។

មេដឹកនាំក្រុមអាវ ក្រហមឈ្មោះ ចារុពង្ស រួងស៊ូវណ្ណ ដែលក្រុមយោធា កំពុងតាមចាប់ខ្លួនបាន ចេញសេចក្តី ថ្លែង ការណ៍មួយស្តីពីការបង្កើតអង្គការថៃសេរីដើម្បីសិទ្ធិមនុស្ស និងលទ្ធិប្រជាធិបតេយ្យ ហើយលោកបាន ធ្វើការវាយប្រហារ ថា របបយោធាបច្ចុប្បន្នបានរំលោភបំពានច្បាប់ បំពានគោលការណ៍ប្រជាធិបតេយ្យ ហើយបំផ្លាញច្បាប់នានា សេរីភាព និងភាពថ្លៃថ្នូរជាមនុស្សរបស់ជនជាតិថៃ ។ ការប្រកាសបែបនេះ ត្រូវបានក្រុមអ្នកវិភាគ នៅក្នុងប្រទេសថៃសម្តែងសេចក្តី ព្រួយបារម្ភយ៉ាងខ្លាំង ចំពោះលទ្ធភាព នៃការកើត មានសង្គ្រាមស៊ីវិលលើទឹកដីថៃដោយចៀសមិនផុត ព្រោះក្រុមអាវ ក្រហមមានចំនួនច្រើនលើសលប់ ហើយអ្នកគាំទ្រព្រះមហាក្សត្រ មានការថយចុះ ។ អាចនិយាយបានថា នៅចំពោះមុខ រដ្ឋាភិបាលយោធា ថៃកំពុង តែធ្វើឲ្យមានការបែកបាក់ផ្ទៃក្នុងជាតិរបស់ខ្លួនយ៉ាងធ្ងន់ធ្ងរ និងបានធ្វើឲ្យសេដ្ឋកិច្ចជាតិធ្លាក់ចុះ យ៉ាងគំហុកនៅក្រោយពេល ផ្តួលរំលំរដ្ឋាភិបាល ស្របច្បាប់របស់គណបក្សភឿថៃ  ។

អ្វីដែលគួរឲ្យកត់សម្គាល់នោះ គឺនៅក្រោយពេល ដែលរបបយោធាថៃ ប្រព្រឹត្តអំពើអមនុស្ស ធម៌ដោយ ចាប់បញ្ជូន ពលករខ្មែររាប់សែននាក់ ត្រឡប់មកស្រុកវិញ គឺរដ្ឋាភិបាលយោធាថៃ ក៏ប្រឈមនឹង វិបត្តិ យ៉ាងពេញបន្ទុកដែរ ។ នៅក្នុង ប្រទេសថៃសំឡេងរិះគន់ រដ្ឋាភិបាលយោធា មានសភាពខ្លាំងក្លា ហើយ សហគមន៍អន្តរជាតិមិនគាំទ្រ រដ្ឋាភិបាលដែលកើត ចេញពីរដ្ឋប្រហារនេះឡើយ ។ ជាក់ស្តែងកាលពីថ្ងៃទី២៣ ខែមិថុនា ឆ្នាំ២០១៤សហភាពអឺរ៉ុប បានសម្រេចព្យួរកិច្ចសហ ប្រតិបត្តិការ ជាមួយរដ្ឋាភិបាលយោធាថៃ ហើយកិច្ចសហប្រតិបត្តិការ អាចដំណើរការធម្មតាវិញ គឺទាល់តែមានការ រៀបចំ បោះឆ្នោត តាមគោលការណ៍ប្រជាធិបតេយ្យ ហើយក្រុមស៊ីវិលឡើង ដឹកនាំប្រទេសវិញ ។ ជាងនេះទៀតរោងចក្រសហ គ្រាស និងក្រុមហ៊ុនអាជីវកម្ម ក្នុងប្រទេសថៃ ស្ទើរតែទាំងអស់ កំពុងជាប់គាំង ដោយសារខ្វះកម្លាំងពលកម្ម ហើយបញ្ហានេះ រដ្ឋាភិបាលយោធាជាអ្នកទទួលខុសត្រូវ ទាំងស្រុង ចំពោះការបំផ្លាញ សេដ្ឋកិច្ចជាតិ និងធ្វើឲ្យមានការ បែកបាក់ផ្ទៃក្នុងជាតិ ក៏ដូចជាលទ្ធភាពនៃការកើតមាន សង្គ្រាម ស៊ីវិល នាពេលខាងមុខ ៕

________________

ផ្តល់សិទ្ទិដោយ៖dap-news.com