កណ្តាលៈ យុវជនម្នាក់ បានចាកចេញពី ផ្ទះដោយពុំនិយាយ ស្តីប្រាប់ក្រុមគ្រួសារ អំពីមូលហេតុ នោះទេ ហើយក្រុមគ្រួសារ ក៏ពុំបានសួរនាំដែរ លុះព្រឹកឡើង មិនឃើញត្រឡប់មកផ្ទះវិញ ទើបមានការ សង្ស័យបាននាំគ្នា តាមរកក៏ប្រទះឃើញសព ចងកនៅលើដើម ក្រសាំង ស្លាប់បាត់ទៅហើយ ទើបបង្ក ឲ្យមានការភ្ញាក់ផ្អើល ។

ហេតុការណ៍ភ្ញាក់ផ្អើលនេះ កើតឡើងកាលពីព្រឹកថ្ងៃទី១០ ខែមិថុនា ឆ្នាំ២០១៤ ស្ថិតនៅ ចំណុចដើម ក្រសាំងវាលស្រែ ជើងភូមិថ្លើក ឃុំពើកស្រុក អង្គស្នួលខេត្ត កណ្តាល  ។

នគរបាលឲ្យដឹងថា ជនរងគ្រោះ ឈ្មោះ  កែវ កួន ភេទប្រុស អាយុ២៧ឆ្នាំ មុខរបរកម្មករក្រុមហ៊ុន ប្រេងរំអិលខូសស្មិច រស់នៅក្នុងភូមិ ឃុំកើតហេតុ ។

នគរបាលបាន បន្តទៀតថា បើយោងតាមក្រុមគ្រួសារ ជនរងគ្រោះបានរៀបរាប់ប្រាប់ថា កាលពីល្ងាចថ្ងៃ ទី៩ ខែមិថុនា ឆ្នាំ២០១៤ ជនរងគ្រោះបានដើរចេញពីផ្ទះដោយដៃកាន់កាំបិតផ្គាក់ទៅជាមួយផង ហើយ ពុំបានប្រាប់ថា ទៅណានោះទេ ក្រុមគ្រួសារក៏ពុំបានសួរនាំនោះដែរ លុះព្រឹកឡើងពុំឃើញជនរងគ្រោះ ត្រឡប់មកដេកវិញ ទើបមានការសង្ស័យហើយបាននាំគ្នា តាមរកលុះដល់ចំណុចកើតហេតុ ក៏ប្រទះឃើញ ជនរងគ្រោះចងកនៅលើដើមក្រសាំង កម្ពស់ប្រហែលជាង២ម៉ែត្រ ស្លាប់បាត់ទៅហើយ ។

នគរបាលបាន បន្តថា បើតាមការសាកសួរបន្តនោះ ក្រុមគ្រួសារជនរងគ្រោះបានអះអាងថា ជនរងគ្រោះពុំ ដែលមាន ទំនាស់ជាអ្នកណាម្នាក់នោះទេ ហើយបញ្ហាស្នេហាក៏ពុំដែលមានដែរ ប៉ុន្តែបើតាមអ្នក រស់ជិត ខាងវិញបាននិយាយថា ជនរងគ្រោះអាចមានវិប្បត្តិអ្វីមួយធ្ងន់ធ្ងរ ដែលពុំអាចនិយាយប្រាប់ឲ្យគេ ដឹងបាន ឬមួយមានបញ្ហាអ្វីមួយហើយបានឈានដល់សម្លាប់ខ្លួនបែបនេះ ហើយក្រុមគ្រួសារអាចដឹងពីមូល ប៉ុន្តែមិននិយាយក៏ថាបានដែរ ។ ក្រោយពេលកើតហេតុ នគរបាលចុះទៅពិនិត្យ សាកសពបានសន្និដ្ឋានថា ជនរងគ្រោះពិតជាបានចងកសម្លាប់ដោយខ្លួនឯងពិតប្រាកដម៉ែន រួចក៏ប្រគល់សាកសព ទៅឲ្យក្រុមគ្រួសារ យកទៅធ្វើបុណ្យតាមប្រពៃណី ហើយក្រុមគ្រួសារ ក៏ពុំមានការប្តឹងផ្តល់អ្វីនោះដែរ ៕

_______________

ផ្តល់សិទ្ទិដោយ៖dap-news.com