រាជធានីភ្នំពេញ៖ សមាគម​រោងចក្រ​កាត់ដេរ នៅ​កម្ពុជា (​GMAC) គ្រោង​ប្តឹង​លោក ប៉ាវ ស៊ីណា ប្រធាន​សម្ព័ន្ធ សហជីព​ចលនា​កម្មក​រ ទៅ​តុលាការ​ចាត់ការ​តាមច្បាប់ ហើយ​ប្រកាសថា លោក​ប៉ាវ ស៊ីណា ត្រូវតែ​ទទួលខុសត្រូវ សម្រាប់​ការខាត បង់​របស់ កម្មករ និយោជិត និង និយោជក នៅក្នុង​តំបន់​សេដ្ឋកិច្ច ពិសេស​តាយសេង និងមេន​ហាត​ធេ​ន នា​ក្រុង​បាវិត ខេត្តស្វាយរៀង​។​

​លោក កាំ​ង ម៉ូ​នី​កា អគ្គលេខាធិការរង ជី​ម៉ាក់ បានប្រកាស​បែបនេះ នៅក្នុង​សន្និសីទកាសែត កាលពី​ល្ងាច​ថ្ងៃទី​៣០ មេសា ខណៈដែល​អាជ្ញាធរ​ក្រុង​បាវិត បាន​បញ្ជា​ឲ្យ​កម្មករ​ទាំងអស់ នៅ​តំបន់​សេដ្ឋកិច្ច​ពិសេស ទាំង​២​ខាងលើ ផ្អាក​ការងារ​អស់​រយ​:​ពេល ២​ថ្ងៃ (២៩-៣០​មេសា​) ដែល​ធ្វើ​ឲ្យ​អ្នកវិនិយោគ នៅ​ទីនោះ ខាតបង់​យ៉ាងច្រើន​។​

​លោក កាំ​ង ម៉ូ​នី​កា បាន​បន្តថា ខណ​:​ដែល​និយោជក បាន​អនុវត្ត​ច្បាប់​ទាំងអស់ របស់​ប្រទេស លោក​ប៉ាវ ស៊ីណា បែរជា​មិន​គោរព​ច្បាប់ ហើយ​ឆ្លៀតឱកាស​ស្វែងរក​ផលប្រយោជន៍ ពី​ការដែល​រាជរដ្ឋាភិបាល មានការ​ស្ទាក់ស្ទើរ ក្នុងការ​ចាត់វិធាន កា​រ តាមច្បាប់​ទៅដល់​ពួកគេ​។ ការពន្យា​ពេល និង​ការ​គ្មាន​ចំណាត់ការ តាមផ្លូវ​ច្បាប់​ដ៏​ត្រឹមត្រូវ និង​សមស្រប​ណាមួយ ក្នុង​គោលដៅ​ធានា​ការអនុវត្ត​ច្បាប់ និង​មិន​ត្រឹមតែ​បណ្តាល ឲ្យ​អ្នកវិនិយោគ បាត់បង់​ជំនឿ​លើ​រាជរដ្ឋាភិបាល​ប៉ុណ្ណោះ​ទេ វា​ក៏​អយុត្តិធម៌​បំផុត សម្រាប់​កម្មករ​ភាគច្រើន ដែលមាន​បំណង​ចូលធ្វើការ ដោយសារ​សិទ្ធិ​ធ្វើការ​របស់​ពួកគេ ត្រូវបាន​បំពាន​ដោយ​បាតុករ​ទាំងនោះ​។ ពួកគេ​ត្រូវ​ខាតបង់​ប្រាក់​ឈ្នួល ជិត​២​សប្តាហ៍ កន្លងមក​។​

​លោក កាំ​ង ម៉ូ​នី​កា បាន​បន្តថា ដោយសារ​ការខាតបង់​ដ៏​ធំធេង នាពេល​កន្លងមក GMAC សូម ប្រកាស​ដាច់អហង្ការ​ថា ក្រុម​ក្រុម​និយោជក នឹង​អនុវត្ត​យ៉ាង​តឹងរ៉ឹង​តាម​មាត្រា​៣៣២ នៃ​ច្បាប់​ស្តីពី​ការងារ ដែល​ចែងថា “​ប្រាក់​ឈ្នួល និង​អត្ថ ប្រយោជន៍ នឹងមិន​ត្រូវ​ផ្តល់ជូន​នោះទេ ក្នុងអំឡុង​ពេលធ្វើ​កូដកម្ម​”​។​និយោជក​ក៏ ​មិន​ទទួលខុសត្រូវ​ផងដែរ​សម្រាប់​ប្រាក់​ឈ្នួល​និង​អត្ថប្រយោជន៍​របស់​កម្ម​ ករ​ក្នុងអំឡុង​ពេលដែល​រាជរដ្ឋាភិបាល​បាន​បញ្ជា​ឲ្យ​ពួកគេ​ផ្អាក​ដំណើរការ​ សង្វាក់​ផលិត​កម្មនេះ​។​

​មន្ត្រី​មួយរូប​ដែល​ប្រចាំការ នៅ​ក្រុង​បាវិត ដែល​សុំ​មិន​បញ្ចេញ​ឈ្មោះ បាន​ឲ្យ​ដឹងថា ដើមចម​បណ្តាល​ឲ្យ កើតមាន​កូដកម្ម​ផ្ទុះឡើង ក្រោយពី​បុណ្យចូលឆ្នាំ​មក ដោយសារ​រោងចក្រ​ដំឡើង កង់​ស្មា​ត​ធិ​ច (smart tech) មាន​កម្មករ ១.១៥០ នាក់ និង​រោងចក្រ​អេ​អិន​ជេ​ខេ​ម​បូ​ឌា (A&J) មាន​កម្មករ ១.៨០៧ នាក់ ត្រូវបាន​លោក​ថៅកែ ផ្តល់​រង្វាន់​លើកទឹកចិត្ត​បន្ថែម (Bonus) ដល់ក​ម្មករ ក្នុង​ម្នាក់ៗ ចំនួន​៥០​ដុល្លារ ដោយសារតែ​ពួកគេ​ធ្វើការ​លើស​ផែនការ​ប្រចាំឆ្នាំ​។​

​ការផ្តល់ប្រាក់​រង្វាន់​នេះ បាន​លេចឮ​ដល់​កម្មករ​រោងចក្រ​កាត់ដេរ​ដទៃទៀត ច្រណែន​រួមផ្សំ​នឹង​ការ​ញុះញង់​ពី លោក​ប៉ាវ ស៊ីណា ដោយ​បំផ្លើស​ករណីនេះ​ថា “​រោងចក្រ​សន្យា​ឲ្យ​ប្រាក់ ៥០ ដុល្លា ជា​ថ្នូរ​មិន​ឲ្យ​កម្មករ ធ្វើ​កូដកម្ម ទាមទារ​ដំឡើង​ប្រាក់ខែ ១៥០ ដុល្លារ និង​ទាមទារ​ដោះលែង​ក្រុម​លោក វន់ ពៅ ទៅវិញ​”​។ កូដកម្ម​បាន​ផ្ទុះឡើង ចាប់ពី​ថ្ងៃទី​២១ មេសា បន្តបន្ទាប់ លុះដល់​រសៀល​ថ្ងៃទី​២៨ មេសា ក៏​ផ្ទុះ​ហិង្សា បង្ក​ឲ្យ​មាន​របួស និង​ខូចខាត​ទ្រព្យសម្បត្តិ រោងចក្រ​មួយចំនួន​។​

​ក្រោយពី​មាន​កិច្ចប្រជុំ​គណ​:​បញ្ជាការ​ឯកភាព ខេត្តស្វាយរៀង នា​ថ្ងៃទី​២៨ មេសា​មក រោងចក្រ​ទាំងអស់ បានសម្រេច​ឲ្យ​ផ្អាក​ដំណើរការ បណ្តោះអាសន្ន ចាប់ពី​ថ្ងៃទី​២៩ មេសា ដល់ ២ ឧសភា ឆ្នាំ​២០១៤ ទើប​កម្មករ​ចូលធ្វើការ​វិញ​។ ដោយឡែក រោងចក្រ​ដំឡើង​កង់​ស្មា​ត​ធិ​ច (smarttech) មានកម្ម​ករ​ជាង ១០០ នាក់ លើក​ម្មករ ១.១៥០ នាក់ និង​រោងចក្រ​អេ​អិន​ជេ​ខេ​ម​បូ​ឌា (A&J) មានកម្ម​ករ​ជាង ៣០០ នាក់ លើក​ម្មករ ១.៨០៧ នាក់ បន្ត​ចូលធ្វើការ​ជាធម្មតា ដោយ​ខាង​រោងចក្រ​ជួយ​ប្រាក់ ២ ដុល្លារ​បន្ថែមទៀត ជំនួស​ថ្លៃ​រថយន្ត ដែល​ផ្អាក​មិនបាន​ដឹកជញ្ជូន​។​

​លោក ខេន លូ អគ្គលេខាធិការ GMAC បាន​បញ្ជាក់ថា លោក​ថៅកែ​រោងចក្រ smart tech និង​រោងចក្រ A&J ដែល​បានផ្តល់​ប្រាក់រង្វាន់​បន្ថែ​ម (Bonus) ជូន​កម្មករ ពុំមាន​កំហុស​នោះទេ​។ ការផ្តល់ជូន​នេះ គឺជា​សន្តាន​ចិត្ត​របស់លោក​ថៅកែ ដើម្បី​លើកទឹកចិត្ត​កម្មករ ដែល​ខិតខំ​ធ្វើការ ។ ចំណែក​រោងចក្រ ប្រមាណ​ជាង ៤០ ទៀត នៅ​ក្រុង​បាវិត ពួកគេ​ពុំទាន់​មានលទ្ធភាព​ផ្តល់ជូន ក៏​មិន​ខុស​ទៅនឹង​ច្បាប់​ការងារ​នោះទេ​។​

​លោក ខេន លូ បាន​អំពាវនាវ​ចុងក្រោយ ដល់​រាជរដ្ឋាភិបាល មុន​ពេលដែល​ស្ថានភាព មិនអាច​ស្តារឡើងវិញ​បាន មេត្តា​ចាត់វិធានការ​ពង្រឹង​ការអនុវត្ត​ច្បាប់ ដើម្បី​ឲ្យ​រោងចក្រ​ទាំងអស់ នៅ​តំបន់​សេដ្ឋកិច្ច​ពិសេស​សទាំង​២ អាច​បន្ត​ដំណើរការ​រ​បស់​ខ្លួន​សារជាថ្មី សម្រាប់​ជា​ប្រយោជន៍ ដល់​ប្រទេសជាតិ និង​កម្មករ និយោជិត​ទាំងអស់ ។

​លោក​ក៏បាន​អំពាវនាវ ដល់​កម្មករ​ទាំងអស់ ត្រូវ​ចេះ​គិតពិចារណា ដោយ​ខ្លួនឯង មិនត្រូវ​ជឿ​លោក ប៉ាវ ស៊ីណា ដែល​នាំ​ឲ្យ​ខាតបង់​ប្រយោជន៍​ដ៏​ធំ ប្រសិន​រោងចក្រ ត្រូវ​បិទទ្វារ​នោះ​៕

ប្រភពពី Free Press Magazine