ប៉ូលិសខេត្តកំពង់ចាមរងការ ចោទថាគំរាមកំហែងអ្នកកាសែត
អ្នកយកព័ត៌មានឱ្យសារព័ត៌មាន “ឆន្ទៈខ្មែរ” ប្រចាំខេត្តកំពង់ចាម បានសម្ដែងការព្រួយបារម្ភចំពោះសុវត្ថិភាពរបស់ខ្លួន ក្រោយពេលដែលលោកទៅយកព័ត៌មានអំពីសកម្មភាពអាជីវកម្មឈើខុសច្បាប់នៅស្រុកតំបែរ។
ការបារម្ភរបស់លោក សែម ប៊ុណ្ណា នោះ នៅពេលមានសកម្មភាពជិះឡានដេញបុកពីសំណាក់អ្នកកាងឈើនៅទីនោះ ដែលលោកអះអាងថា ជាមេប៉ុស្តិ៍ប៉ូលិសប្រចាំឃុំចុងជៀច ស្រុកតំបែរ រហូតដល់មានការវ៉ៃ និងដកហូតកាមេរ៉ាពីរូបលោកទៀតផង។ ប៉ុន្តែមេប៉ុស្តិ៍ប៉ូលិសចុងជៀច បានបដិសេធចំពោះបញ្ហានេះ ហើយបញ្ជាក់ថា លោកគ្រោងនឹងប្ដឹងទៅកាន់អ្នកសារព័ត៌មានរូបនោះពីបទបរិហារកេរ្តិ៍រូបលោកទៀតផង។
បន្ទាប់ពីមានសកម្មភាពជិះរថយន្តដេញបុក និងមានសកម្មភាពដេញវ៉ៃ ហើយដកយកកាមេរ៉ាពីសំណាក់កូនចៅរបស់អ្នករកស៊ីឈើនៅឃុំចុងជៀច ស្រុកតំបែរ ខេត្តកំពង់ចាម ធ្វើឱ្យអ្នកកាសែតម្នាក់ដែលបម្រើឱ្យសារព័ត៌មាន “ឆន្ទៈខ្មែរ” មានការព្រួយបារម្ភចំពោះសុវត្ថិភាពរបស់ខ្លួននៅពេលយកព័ត៌មានលើកក្រោយៗ។
អ្នកកាសែតឱ្យសារព័ត៌មាន “ឆន្ទៈខ្មែរ” លោក សែម ប៊ុណ្ណា បានឱ្យដឹងថា លោកបានទទួលដំណឹងពីប្រជាពលរដ្ឋនៅឃុំចុងជៀច ស្រុកតំបែរ កាលពីថ្ងៃ១២ មេសា ថាមានសកម្មភាពអាជីវកម្មឈើយ៉ាងគគ្រឹកគគ្រេង។ លោកបន្តថា ដោយសារតែទទួលដំណឹងនេះហើយ លោកក៏បានទៅថតរូបពីសកម្មភាពលើកដាក់ឈើជាច្រើនកន្លែងនៅឃុំចុងជៀច ស្រុកតំបែរ ខេត្តកំពង់ចាម។
ប្រភពដដែលបន្តថា នៅពេលលោកថតរូបបានហើយ ឃើញមានរថយន្តមួយគ្រឿងដេញតាមពីក្រោយ ដែលរថយន្តនោះលោកអះអាងថា ជារថយន្តរបស់មេប៉ុស្តិ៍ប៉ូលិសឃុំចុងជៀច ដែលគេដឹងថា ជាអ្នកពាក់ព័ន្ធនឹងការប្រមូលទិញឈើនៅក្នុងឃុំនោះ ជិះបម្រុងបុកលោក។ ក្រោយពេលលោកជិះម៉ូតូរត់គេចទៅ ស្រាប់តែឃើញកម្មករដឹកឈើពីរនាក់ជិះម៉ូតូមកតាមវ៉ៃ និងបានដកហូតកាមេរ៉ាពីរូបលោកទៀតផង។
លោក សែម ប៊ុណ្ណា៖ «ហ្នឹងហើយ ពីព្រោះខ្ញុំបាននិយាយថា ឡានមេប៉ុស្តិ៍ ពីព្រោះខ្ញុំបានជិះកាត់មុខផ្ទះគាត់ ឃើញគាត់នៅជូតឡាន ដល់ខ្ញុំមកថតនៅត្រពាំងជ្រៃហ្នឹង កូនចៅដែលកំពុងលើកឈើហ្នឹងចុះពីលើឡាន លើកឈើហ្នឹងតេហៅមេគេមកហ្នឹង។ ដល់តេហៅមេគេមក ខ្ញុំឃើញឡានដែលបង គង់ គាត់កំពុងជូតហ្នឹង ខ្ញុំឃើញឡានហ្នឹងមក ខ្ញុំដឹងថា ឡានហ្នឹងមានគោលបំណងចង់កៀរខ្ញុំ ក៏ខ្ញុំជិះរត់គេចទៅ»។
លោកបន្ថែមទៀតថា កន្លងមកលោកក៏ធ្លាប់ទទួលរងការគំរាមកំហែងពីសំណាក់ប៉ូលិសមេប៉ុស្តិ៍ឃុំចុងជៀច ចំពោះការបំពេញបេសកកម្មរបស់លោកដែរ ហើយក្រោយពេលដែលលោកត្រូវបានគេវ៉ៃ និងយកកាមេរ៉ា រូបលោកក៏រត់ចូលផ្ទះអ្នកភូមិដើម្បីឱ្យគេជួយ។ លោកបញ្ជាក់ថា នៅពេលសម្ងំពួននៅផ្ទះអ្នកស្រុក លោកក៏បានហៅទូរស័ព្ទទៅកាន់ស្នងការខេត្ត ប៉ុន្តែមិនមានអ្នកលើកទូរស័ព្ទ លោកក៏ទូរស័ព្ទទៅវិទ្យុ អេប៊ីស៊ី (ABC) ដើម្បីអន្តរាគមន៍ ក្រោយមកសមត្ថកិច្ចមកដល់ កម្មករឈើនោះបែកផ្លូវ ហើយអធិការស្រុកតំបែរ ក៏បានហៅមកលោកដើម្បីទៅយកកាមេរ៉ាវិញ ប៉ុន្តែដោយខ្លាចសុវត្ថិភាពលោកមិនហ៊ានទៅយកនោះទេ។
នាយប៉ុស្តិ៍ឃុំចុងជៀច លោក ស៊ឹម គង់ បានបដិសេធទាំងស្រុងចំពោះរឿងថា រូបលោកបានបើកឡានដេញបុកអ្នកកាសែត និងបញ្ជាឱ្យកូនចៅទៅវ៉ៃ និងដកយកកាមេរ៉ានោះ ដោយលោកបញ្ជាក់ថា ក្នុងអំឡុងពេលនោះ លោកនៅឯចម្ការឯណោះទេ មិនបានដឹងឮរឿងនេះទេ ហើយកន្លងមកលោកក៏មិនធ្លាប់បានគំរាមអ្នកកាសែតរូបនោះម្តងណាឡើយ។
លោក ស៊ឹម គង់៖ «បាទ! ហ្នឹងហើយខ្ញុំឱ្យអង្កេតមើលកន្លែងកម្មករនៅដាំដំឡូងនៅតាប្រើស។ ពេលកើតហេតុម៉ោងណាៗ បងឯងត្រូវសួរឱ្យច្បាស់សិន ហើយពាក្យបណ្ដឹងហ្នឹង អធិការតេមកខ្ញុំថា មានស្អី មានករណីវ៉ៃអ្នកសារព័ត៌មានស្អី? ហូ! ដេញឆក់យកកាមេរ៉ា ដេញបុកអីណាអីណី។ ខ្ញុំថា អត់ដឹងផង… ហើយខ្ញុំបានតេសួរឈ្មោះម្នាក់ហ្នឹងទៀត ថា ប៊ុណ្ណា មកនេះមើល៍ ខ្ញុំសួរមានការចាំបាច់បន្តិច មានស្អីខ្លះ? ករណីកើតហេតុនៅកន្លែងណា? នៅឃុំនាងតើត បានគេដេញពីឃុំចុងជៀច ទៅដល់ឃុំនាងតើត ឥឡូវមើលមកៗ ប្រាប់ខ្ញុំតិចមើល ខ្ញុំសួររ៉ាយរ៉ាប់ដំណើររឿងហ្នឹងយ៉ាងម៉េចអីយ៉ាងម៉េច។ អត់មកជួបខ្ញុំផង»។
លោកបន្ថែមទៀតថា លោកមិនបានពាក់ព័ន្ធនឹងរឿងរកស៊ីឈើនៅទីនោះទេ ចំណែកសកម្មភាពឈើនៅទីនោះមានខ្លះដែរ ប៉ុន្តែលោកអះអាងថា ភាគច្រើនប្រជាពលរដ្ឋទិញមកដើម្បីធ្វើផ្ទះតែប៉ុណ្ណោះ។ លោកបញ្ជាក់ថា ចំពោះការចោទប្រកាន់នេះ លោកនឹងដាក់ពាក្យប្ដឹងទៅស្នងការខេត្ត និងទៅតុលាការពីបទបរិហារកេរ្តិ៍រូបលោកក្នុងពេលឆាប់ៗ ខាងមុខនេះ។
ការគ្រោងដាក់ពាក្យបណ្ដឹងនេះ ចាងហ្វាងសារព័ត៌មាន “ឆន្ទៈខ្មែរ” លោក រុន សារ៉េត ក៏បានអះអាងថា នឹងត្រៀមទទួលទៅតាមផ្លូវច្បាប់ ហើយលោក សែម ប៊ុណ្ណា អ្នកយកព័ត៌មាននោះ ក៏បានត្រៀមប្តឹង និងត្រៀមទទួលការប្ដឹងពីខាងមេប៉ុស្តិ៍រួចហើយដែរ ពីព្រោះខាងលោកក៏មានភស្តុតាងគ្រប់គ្រាន់ទាក់ទងនឹងបញ្ហាកើតមានមកលើរូបលោកនោះ។
ស្នងការខេត្តកំពង់ចាម លោក ប៉ែន រ័ត្ន មានប្រសាសន៍កាលរសៀលពីថ្ងៃ១២ មេសា ថា គ្រាន់តែទទួលបានព័ត៌មាននេះ លោកបញ្ជាឱ្យខាងអធិការចេញអន្តរាគមន៍ និងបានយកកាមេរ៉ាពីកម្មករឈើនោះមកវិញ ហើយរក្សាទុកនៅអធិការស្រុកដើម្បីរង់ចាំម្ចាស់ទៅយក។ លោកបន្ថែមថា នៅកន្លែងនោះពិតជាមានសកម្មភាពឈើខុសច្បាប់មែន ហើយថ្មីៗនេះ អាជ្ញាធរក៏បានចេញបង្ក្រាបជាញឹកញាប់ហើយដែរ។ លោកបញ្ជាក់ទៀតថា មិនមានសមត្ថកិច្ចណាម្នាក់មានបំណងអាក្រក់មកលើអ្នកកាសែតនោះទេ ប៉ុន្តែប្រសិនបើអ្នកកាសែតរូបនោះកើតទុក្ខមិនសុខចិត្តអាចដាក់ពាក្យបណ្ដឹងមកស្នងការខេត្តកំពង់ចាម បាន៕
ប្រភពពី វិទ្យុអាស៊ីសេរី
