មកពីហូបការមិត្តភក្តិ ត្រូវឡានបុកស្លាប់ម្នាក់ ហើយអ្នករួមដំណើរ ធ្លាយពោះវៀនរងរបួសធ្ងន់
រាជធានីភ្នំពេញ ៖ យុវជន ២នាក់ បានជិះម៉ូតូម៉ាកនិច
ឌុបគ្នាចេញពីហូបការមិត្តភក្តិ ធ្វើដំណើរចូលមកភ្នំពេញ
ក៏ត្រូវរថយន្តហ៊ីយ៉ានដាយ ១តោនកន្លះ បើកបុកពីក្រោយ
យ៉ាងពេញទំហឹង នៅតាមបណ្តោយផ្លូវជាតិ៣ មុខរោងចក្រសួនវឌ្ឍន: ភូមិទឹកថ្លា សង្កាត់ក្រាំងពង្រ ខណ្ឌដង្កោ បណ្តាលឲ្យស្លាប់នៅនឹងកន្លែងម្នាក់ និងម្នាក់ទៀតធ្លាយពោះ ។សាក្សីបានឲ្យដឹងថា មុនពេលកើតហេតុ យុវជនរងគ្រោះទាំង ២នាក់ បានជិះម៉ូតូនិច ពណ៌ក្រហម ពាក់ស្លាកលេខ ភ្នំពេញ 1CA 8157 ជិះធ្វើដំណើរ តាមបណ្តោយផ្លូវជាតិលេខ ៣ ក្នុងទិសដៅពីត្បូងទៅជើង ក្នុងល្បឿនយ៉ាងលឿន ទំនងស្រវឹងស្រា ចេញពីហូបការមិត្តភក្តិ នៅខេត្តកណ្តាល ចូលមករាជធានីភ្នំពេញ។ ពេលជិះដល់ចំណុចកើតហេតុ ក៏ត្រូវរថយន្ត ហ៊ីយ៉ានដាយ ប្រភេទកូរ៉េ មួយតោនកន្លះ. ពណ៌ខៀវ មិនចាំស្លាកលេខ បានបើកបុកម៉ូតូនិច ពីក្រោយ យ៉ាងពេញទំហឹង បណ្តាលឲ្យម៉ូតូ ខ្ទាតធ្លាក់ពីលើផ្លូវ ចូលទៅក្នុងវាលស្រែ ខូចខាតទាំងស្រុង។
ចំណែកយុវជន ២នាក់ ជាម្ចាស់ម៉ូតូ គឺម្នាក់ត្រូវរថយន្ត អូសជាង ២០ម៉ែត្រ ទើបខ្ទាតចេញ ត្រូវស្លាប់បាត់បង់ជីវិត យ៉ាងអណោចអធ័ម នៅក្នុងគុម្ពោតព្រៃ ជាប់ផ្លូវជាតិលេខ៣ និងម្នាក់ទៀត ខ្ទាតចូលក្នុងគុម្ពព្រៃ ជុងនឹងដើរឈើធ្លាយពោះ រងរបួសធ្ងន់ធ្ងរ ត្រូវបានរថយន្តសាមុយ មកដឹកយកទៅសង្គ្រោះ នៅមន្ទីរពេទ្យ ហើយរថយន្តបង្ក ដោយឃើញហេតុការណ៍មិនស្រួល ក៏ព្យាយាមបើករត់គេចខ្លួន បាត់ស្រមោលភ្លាមៗ។ យុវជនរងគ្រោះទាំង ២នាក់ ខាងលើនេះ មិនទាន់មានអត្តសញ្ញាណទេ ដោយសារនៅជាប់ខ្លួនរបស់ពួកគេ ពុំមានប័ណ្ណសម្គាល់ខ្លួន៕
ប្រភពពី វត្តភ្នំ
