កាត់ទោសឧកញ៉ាម្នាក់ បើករថយន្តបំបុកមនុស្ស បីនាក់រងរបួសធ្ងន់
ភ្នំពេញៈ សាលា
ដំបូងរាជធានីភ្នំពេញ កាលពីព្រឹកថ្ងៃទី ១៤
មីនានេះបានបើកសវនាការជំនុំជម្រះនិងកាត់ទោស លោកឧកញ៉ា យ៉ែម
កុសលកំបាំងមុខជាប់ពាក់ព័ន្ធនឹងករណីបើករថយន្តបំបុកមនុស្សបីនាក់
រងរបួសធ្ងន់ ប្រព្រឹត្តនៅក្នុងភូមិគោកឃ្លាង
សង្កាត់ភ្នំពេញថ្មីខណ្ឌសែនសុខកាលពីរាត្រី
ថ្ងៃទី១៦ខែមិថុនាឆ្នាំ២០១៣។លោក សួស សំអាត អនុប្រធានសាលាដំបូងរាជធានីភ្នំពេញនិងជាប្រធានចៅក្រមជំនុំជម្រះ បានឲ្យដឹងថា ឈ្មោះ យ៉ែម កុសល ភេទប្រុសអាយុ ៤៥ឆ្នាំត្រូវបានកាត់ទោសកំបាំងមុខពីបទបើករថយន្តបំបុកមនុស្សបី នាក់រងរបួសធ្ងន់។
លោកចៅក្រម សួស សំអាត បានបន្ថែមថា ជនជាប់ចោទឈ្មោះ យ៉ែម កុសល ត្រូវបានតំណាងអយ្យការចោទប្រកាន់ពីបទ «ឃាតកម្មប៉ុនប៉ងសម្លាប់ដោយបើករថយន្តដេកបុកនិងធ្វើឲ្យខូចខាត ដោយចេតនា» តាមមាត្រា១៩៩ និង ២១០ នៃក្រមព្រហ្មទណ្ឌកម្ពុជាជាប់ពាក់ព័ន្ធនឹងការបើករថយន្តម៉ាករ៉ង រ៉ូវើពណ៌សរបស់គាត់ បើកបុកមនុស្សបីនាក់គឺ ប្ដីប្រពន្ធ និងកូនស្រីម្នាក់បណ្ដាលរងរបួសធ្ងន់ធ្ងរ និងបានបើកបុករថយន្តជនរងគ្រោះឲ្យខូចខាតមួយផ្នែក ប្រព្រឹត្តនៅក្នុងភូមិគោកឃ្លាង សង្កាត់ភ្នំពេញថ្មីខណ្ឌសែនសុខកាលពីថ្ងៃទី១៦ខែមិថុនាឆ្នាំ ២០១៣នៅម៉ោងប្រហែល១១និង៣០នាទីយប់អាធ្រាត្រ។
អ្នកស្រី ទេព លីហ្សា ជាភាគីដើមចោទនិងជនរងគ្រោះ បាននិយាយថា៖ «លោកឧកញ៉ា យ៉ែម កុសល បានបើករថយន្តរបស់គាត់បំបុកប្តីប្រពន្ធនិងកូនស្រីរបស់ បណ្តាលឲ្យរបួស យ៉ាងធ្ងន់ធ្ងរ ក្នុងនោះ ប្តីរបស់គាត់ឈ្មោះ នី សាត ត្រូវរងរបួសបាក់ជើងទាំងពីរ ឥឡូវនេះ បានក្លាយជាជនពិការ និងកូនស្រី ឈ្មោះ សាត នីតា ត្រូវរបួសបាក់កដៃខាងស្តាំ និងវៀចក្តោងច្រមុះម្ខាង។ ចំណែកឯ រូបគាត់ត្រូវរងរបួសត្រង់ ត្រគាកខាងក្រោយនិងឆ្នឹងខ្នង»។
អ្នកស្រី ទេព លីហ្សា បានបន្ថែមថា ក្រុមគ្រួសារអ្នកស្រី បានចំណាយអស់ប្រាក់ចំនួនជាង១ ម៉ឺនដុល្លារអាមេរិក ក្នុងព្យាបាលរបួសស្នាម។ អ្នកស្រី បានសុំឲ្យតុលាការផ្តន្ទាទោសលោក ឧកញ៉ា យ៉ែម កុសល ទៅតាមច្បាប់និង ទាមទារថ្លៃព្យាបាលនិងជម្ងឺចិត្តចំនួន ១០ម៉ឺនដុល្លារអាមេរិក (១០០,០០០$)។
លោក នី គឹមហោ មេធាវីការពារក្តីឲ្យជនជាប់ចោទឧកញ៉ាយ៉ែម កុសល បាននិយាយថា៖ មូលហេតុដែលកូនក្តីរបស់គាត់ បានបុកជនរងគ្រោះទាំង៣នាក់ នៅយប់កើតហេតុនោះគឺដោយសារតែ គាត់បានព្យាយាមជិះរថយន្តរត់គេចពីជនរងគ្រោះ ដែលបានព្រួតគ្នា (មានកាន់ដំបង និងដបស្រាផង) ដេញតាមវាយកូនក្តីរបស់លោក បណ្តាលកូនក្តីរបស់គាត់រេចង្កូតឡានពារ និងបន្តទៅបុកនឹងរថយន្ត១ គ្រឿងទៀត ដែលបានចតនៅក្បែរនោះ។
លោកមេធាវី នី គឹមហោ បានបញ្ជាក់ថា នៅយប់កើតហេតុនោះដែរ មុនពេលកើតមានព្រឹត្តិការណ៍បើករថយន្ត ប៉ះជនរងគ្រោះខាងលើនេះឈ្មោះ នី សាត បានឈ្មោះជាមួយ ឧកញ៉ា យ៉ែម កុសល (ដោយសារតែខឹង ឧកញ៉ា យ៉ែម កុសល និយាយដើមគាត់រឿង ជំពាក់ប្រាក់មិនសង) និងបានដាល់ ឧកញ៉ា យ៉ែម កុសលចំនួន១ដៃ ចំចិញ្ចើម អុកគូថ ដួលនឹងដីនិងបណ្តាលឲ្យគាត់រងរបួសបែកក្រោមចិញ្ចើមទំហំ៣ សង់ទីម៉ែត្រ ជាំភ្នែកម្នាង និង ត្រូវបានសម្រាកព្យាបាលនៅមន្ទីរពេទ្យវៀតណាម ប្រទេសវៀតណាម អស់រយៈពេល១ខែទៀតផង។
លោកមេធាវីបានបន្ថែមថា ចំពោះករណីខាងលើនេះលោកឧកញ៉ា យ៉ែម កុសល ក៏បានដាក់ពាក្យប្តឹងភាគីដើមបណ្តឹង (ឈ្មោះ នី សាត) ពីបទ«ហិង្សាដោយចេតនា» ទៅអយ្យការអមសាលាដំបូងរាជធានីភ្នំពេញផងដែរ និងប្តឹងឲ្យផ្តន្ទាទោសឈ្មោះ នី សាតនេះតាមច្បាប់និងសុំទាមទារជម្ងឺចិត្តចំនួន ២ ម៉ឺនដុលារអាមេរិក (២០,០០០$)។
សាលាដំបូងរាជធានីភ្នំពេញ នឹងប្រកាសសាលក្រមនៃសំណុំរឿងនេះថ្ងៃទី ៩ ខែ មេសា ២០១៤ខាងមុខនេះ៕
