លោកហ៊ុន សែន៖ កម្ពុជា បានតាមដាននិងស៊ើបអង្កេត ករណីបាត់យន្តហោះម៉ាឡេស៊ី តាំងពីថ្ងៃបាត់ដំបូង
នៅក្នុងពិធីបិទសន្និបាតបូកសរុបការងារក្រសួងអប់រំ យុវជន និងកីឡា នាថ្ងៃសុក្រនេះ នៅវិទ្យាស្ថានបច្ចេកវិទ្យាកម្ពុជា លោកនាយករដ្ឋមន្ត្រី ហ៊ុន សែន មានប្រសាសន៍ថា តាំងពីមានហេតុការណ៍បាត់យន្តហោះម៉ាឡេស៊ី MH370 កាលពីថ្ងៃទី០៨ ខែមីនាមក ក្រសួងការពារជាតិ និងអាជ្ញាធរពាក់ព័ន្ធ បានធ្វើការស៊ើបអង្កេត និងតាមដានយ៉ាងយកចិត្តទុកដាក់ សិក្សាទៅលើតំបន់ដែលសង្ស័យ។ លោកបន្តថា កម្ពុជា ក៏ស្វាគមន៍ចំពោះបណ្តាប្រទេសនានា និងភាគីពាក់ព័ន្ធ ដែលចង់មកស្រាវជ្រាវ និងស្វែងរកយន្តហោះម៉ាឡេស៊ីនោះ ក្នុងទឹកដីកម្ពុជាផងដែរ ប្រសិនបើមានការសង្ស័យណាមួយនោះ។
កាលពីថ្ងៃទី១៨ ខែមីនា កន្លងទៅ លោកនាយករដ្ឋមន្ត្រី ហ៊ុន សែន បានចេញបញ្ជាឲ្យចេញឧទ្ធម្ភាគចក្រ ធុនZ9 ចំនួន៤គ្រឿង និងនាវាP46 ចំនួន២គ្រឿង ព្រមទាំងកងកម្លាំងមួយចំនួន ចូលរួមប្រតិបត្តិការជួយស្វែងរកយន្តហោះម៉ាឡេស៊ី ដែលបាត់អស់រយៈពេលជាង១០ថ្ងៃមកហើយ នៅតាមកោះ និងដែនសមុទ្រជាប់ព្រំដែនប្រទេសវៀតណាម។
តាមរយៈសេចក្តីប្រកាសព័ត៌មានរបស់ក្រសួងការពារជាតិ រាជរដ្ឋាភិបាលកម្ពុជា ក៏សម្តែងការសោកស្តាយចំពោះឧបទ្ទវហេតុបាត់យន្តហោះម៉ាឡេស៊ីMH370ផងដែរ ។
យន្តហោះម៉ាឡេស៊ីប្រភេទ Boeing 777 (ជើងហោះហើរMH370) ដឹកអ្នកដំណើរចំនួន២២៧នាក់ និងអ្នកបម្រើលើយន្តហោះ ១២នាក់ (សរុប ២៣៩នាក់)។ យន្តហោះនោះបានបាត់ចេញពីប្រព័ន្ធទំនាក់ទំនង កាលពីម៉ោងជាង១២រំលងអាធ្រាត្រ ឈានចូលថ្ងៃទី០៨ ខែមីនា នៅពេលដែលបានចេញដំណើរពីទីក្រុងកូឡាឡាំពួ ប្រទេសម៉ាឡេស៊ី ទៅកាន់ទីក្រុងប៉េកាំងប្រទេសចិន បានពីរម៉ោង។ រហូតមកដល់ថ្ងៃទី២១ ខែមីនានេះ គេនៅពុំទាន់រកឃើញតម្រុយណាមួយ ជុំវិញការបាត់យន្តហោះនេះនៅឡើយទេ៕
VOD
