CCHR បារម្ភថាសេចក្តីព្រាង ច្បាប់គ្រប់គ្រងប្រព័ន្ធ អ៊ីនធឺណេតនឹងប៉ះពាល់ ដល់សិទ្ធិបញ្ចេញមតិ
មជ្ឈមណ្ឌល
សិទ្ធិមនុស្សកម្ពុជា (CCHR) នៅថ្ងៃព្រហស្បតិ៍នេះ
បានដាក់ការព្រួយបារម្ភជាមុន ខណៈរដ្ឋាភិបាលកម្ពុជា
កំពុងតែធ្វើសេចក្តីព្រាងច្បាប់ គ្រប់គ្រងលើប្រព័ន្ធអ៊ីនធឺណេត
នាពេលខាងមុខ ដែលអាចនាំឲ្យមានផលប៉ះពាល់ ឬឈានដល់ការរឹតត្បិត
សិទ្ធិសេរីភាពក្នុងការបញ្ចេញមតិ នៅលើប្រព័ន្ធនេះ។កំណត់ត្រាសង្ខេប របស់មជ្ឈមណ្ឌលសិទ្ធិមនុស្សកម្ពុជា ចេញផ្សាយនៅខែកុម្ភៈ មាន២១ទំព័រ ឲ្យដឹងថា វិធីសាស្ត្រនៃការធ្វើសេចក្តីព្រាងច្បាប់នឹងមានផលប៉ះពាល់យ៉ាង ទូលំទូលាយមកលើសេរីភាពបញ្ចេញមតិនៅកម្ពុជា ក្នុងរយៈពេលយូរអង្វែង។
រដ្ឋាភិបាល គួរតែធានាថា សេចក្តីព្រាងច្បាប់ អនុលោមតាមកាតព្វកិច្ចរបស់រដ្ឋាភិបាលក្នុងច្បាប់អន្តរជាតិ និងបទដ្ឋានក្រឹត្យក្រមច្បាប់របស់សហគមន៍អឺរ៉ុប ពាក់ព័ន្ធនឹងឧក្រិដ្ឋកម្មតាមប្រព័ន្ធបច្ចេកវិទ្យា ដើម្បីធានាថាសេរីភាពបញ្ចេញមតិ ដែលត្រូវបានការពារដោយច្បាប់រដ្ឋធម្មនុញ្ញ និងលិខិតុបករណ៍សិទ្ធិមនុស្សដទៃទៀត ដែលកម្ពុជាជារដ្ឋភាគី នឹងត្រូវបានការពារទាំងនៅលើអ៊ីនធឺណេត និងនៅក្រៅអ៊ីនធឺណេត។
កំណត់ត្រាសង្ខេប បន្តថា ការធ្វើសេចក្តីព្រាងច្បាប់ ស្តីពីការគ្រប់គ្រងអ៊ីនធឺណេតនេះ ត្រូវធ្វើឡើងដោយការផ្សព្វផ្សាយសេចក្ដីព្រាងច្បាប់ ជាសាធារណៈ និងឲ្យបានទូលាយ ដើម្បីអនុញ្ញាតឲ្យមានការពិគ្រោះយោបល់ឲ្យពេញលេញ និងភាគីពាក់ព័ន្ធទាំងអស់ រួមមានអង្គការសង្គមស៊ីវិលជាដើម។
មន្ត្រីសម្របសម្រួលគម្រោងបញ្ចេញមតិនៅមជ្ឈមណ្ឌលសិទ្ធិមនុស្ស កម្ពុជា កញ្ញា សន រ៉ាមាណា មានប្រសាសន៍ថា ស្របពេលរដ្ឋាភិបាលកម្ពុជា កំពុងតែធ្វើសេចក្តីព្រាងច្បាប់ គ្រប់គ្រងលើប្រព័ន្ធអ៊ីនធឺណេត មជ្ឈមណ្ឌលសិទ្ធិមនុស្សព្រួយបារម្ភថា សេចក្ដីព្រាងច្បាប់នោះនឹងធ្វើឲ្យប៉ះពាល់ដល់សិទ្ធិបញ្ចេញមតិ។ កញ្ញាស្នើឲ្យរដ្ឋភិបាលពិនិត្យមើលឲ្យបានច្បាស់លាស់ មុននឹងធ្វើសេចក្តីព្រាងច្បាប់ សម្រាប់គ្រប់គ្រង ដោយយកគំរូតាម ប្រទេសមួយចំនួន ដូចជាប្រទេសអាល្លឺម៉ង់ និងប្រទេសថៃជាដើម«កំណត់ត្រាសង្ខេបហ្នឹង មានគោលបំណងដាក់ចេញ ជាអនុសាសន៍ដល់រដ្ឋាភិបាល ដើម្បីឲ្យគាត់មើល ករណីសិក្សាផ្សេងៗ ហើយធ្វើយ៉ាងម៉េច ឲ្យសេចក្តីព្រាងច្បាប់ ដែលគាត់នឹងចេញហ្នឹង ឲ្យយកចិត្តទុកដាក់លើសេរីភាពបញ្ចេញមតិ ទោះបីច្បាប់ហ្នឹង ដើម្បីការពារសុវត្ថិភាពអ្នកប្រើប្រាស់ អ៊ីនធឺណែត ប៉ុន្តែកុំធ្វើយ៉ាងណាឲ្យច្បាប់ហ្នឹង ក្លាយជាឧបករណ៍ រឹតបន្តឹងសេរីភាពបញ្ចេញមតិ នៅលើអ៊ីនធឺណែត»។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា រដ្ឋាភិបាលកម្ពុជាមិនដែលមានបំណងចង់បំបិទសេរីភាពបញ្ចេញមតិនោះទេ ព្រោះការដែលរដ្ឋាភិបាលគ្រោងនឹងធ្វើសេចក្តីព្រាងច្បាប់នេះ គឺដើម្បីការពារចំពោះភេរវករ ដែលចង់ធ្វើភេរវកម្មតាមរយៈប្រព័ន្ធអ៊ីនធឺណេត «ច្បាប់នេះ មានគោលបំណងទិសដៅ សម្រាប់ប្រឆាំង ទប់ស្កាត់អំពីការវាយប្រហារ តាមរយៈប្រព័ន្ធអ៊ីនធឺណែត ទៅលើធនាគារ គណនេយ្យដទៃទៀត ដែលជាផលប្រយោជន៍ឯកជន ឬផលប្រយោជន៍រដ្ឋ ឬផលប្រយោជន៍ដទៃទៀត»។
កន្លងមកនេះប្រជាពលរដ្ឋដែលចេះប្រើប្រាស់បណ្តាញសង្គមហ្វេសប៊ុក ច្រើនបញ្ចេញមតិ រិះគន់ទៅលើបុគ្គលណាមួយចំៗ នៅពេលដែលពួកគេមិនពេញចិត្ត។ ថ្មីៗនេះតារាសម្តែង និងជាពិការិនី កញ្ញា ឌួង ហ្សូរីដា ត្រូវបានសាលាដំបូងរាជធានីភ្នំពេញ ផាកពិន័យប្រាក់ចំនួន២លានរៀល និងសងជំងឺចិត្តដើមបណ្តឹងចំនួន៥លានរៀល ដោយចោទពីបទ សរសេរសារមិនសមរម្យ និងបរិហារកេរ្ដិ៍ នៅលើគេហទំព័រហ្វេសប៊ុក៕
ប្រភពពី vodhotnews.com
