មេធាវី៖ សាលាឧទ្ធរណ៍ អាចនឹងបើកសវនាការករណីសុំនៅក្រៅឃុំរបស់ជនទាំង២៣នាក់ នៅថ្ងៃទី១១កុម្ភៈ
មេធាវីការពារក្តីលោក វន់ ពៅ លោកស្រី
សាម សុគន្ធា មានប្រសាសន៍ប្រាប់ VOD នៅរសៀលថ្ងៃព្រហស្បតិ៍នេះថា
លោកស្រីរួមនឹងសហមេធាវីផ្សេងទៀត
នៅមិនទាន់ទទួលបានដីកាឲ្យចូលរួមសវនាការសម្រេចពីការដាក់លោក វន់
ពៅ និងជន២២ផ្សេងទៀតឲ្យនៅក្រៅឃុំនៅឡើយទេ។ តែលោកស្រីថា
បើតាមលោកមេធាវីម្នាក់ដែលការពាររឿងក្តីរបស់លោក វន់ ពៅ ដែរនោះ
បានបង្ហើបឲ្យដឹងថា
សាលាឧទ្ធរណ៍នឹងបើកសវនាការសម្រេចលើរឿងក្តីរបស់លោក វន់ ពៅ
រួមនឹងអ្នកដែលកំពុងជាប់ឃុំទាំង២២នាក់ទៀត នៅព្រឹកថ្ងៃទី១១
ខែកុម្ភៈ ខាងមុខនេះ។
វីអូឌី
មិនអាចទាក់ទងសុំការអត្ថាធិប្បាយពី លោក ឃុន លាងម៉េង
ប្រធានក្រុមប្រឹក្សាជំនុំជម្រះសាលាឧទ្ធរណ៍
បានទេនៅរសៀលថ្ងៃព្រហស្បតិ៍នេះ។
ភរិយារបស់លោក វន់ ពៅ អ្នកស្រី ប្រាក់
សុវណ្ណារី ប្រាប់ VOD ថា
ស្ថានភាពរបួសស្វាមីអ្នកស្រីមានសភាពគ្រាន់បើហើយ តែលោក វន់ ពៅ
តែងមានអាការៈស្ពឹកផ្នែកខាងក្នុង
ជាហេតុធ្វើឲ្យលោកស្រីមានការបារម្ភពីស្ថានភាពជំងឺរបស់គាត់
ថាអាចនឹងស្លាប់មួយចំហៀងខ្លួន។ អ្នកស្រី
បានស្នើឲ្យតុលាការសម្រេចឲ្យ លោក វន់ ពៅ ស្ថិតនៅក្រៅឃុំ
ដើម្បីព្យាបាលជំងឺ។
ទាក់ទងនឹងករណីនេះដែរ
ប្រធានអង្គការសិទ្ធិមនុស្សលីកាដូ លោកស្រី ពុង ឈីវកេក
និងនាយកប្រតិបត្តិមជ្ឈមណ្ឌលអប់រំច្បាប់សម្រាប់សហគមន៍ លោក យ៉េង វីរៈ
ក៏បានឲ្យមេធាវី ត្រៀមឯកសារដាក់ទៅតុលាការធានាលោក វន់ ពៅ
ឲ្យនៅក្រៅឃុំផងដែរ។ លោកស្រីពុង ឈីវកេក មានប្រសាសន៍ថា
មូលហេតុដែលពួកគាត់សម្រេចចិត្តធានា លោក វន់ ពៅ ឲ្យស្ថិតនៅក្រៅឃុំ
ដោយសារតែស្ថានភាពជំងឺរបស់លោកមានសភាពធ្ងន់ធ្ងរ
ហើយត្រូវការការព្យាបាលពីគ្រូពេទ្យជំនាញ បើមិនដូច្នោះទេ
លោកអាចមានគ្រោះថ្នាក់ដល់ជីវិត។
លោក វន់ ពៅ
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ
និងជនទាំង២២នាក់ទៀត ត្រូវបានសមត្ថកិច្ចចាប់ខ្លួន កាលពីថ្ងៃទី០២
ខែមករា ឆ្នាំ២០១៤ ខណៈដែលពួកគាត់បានចូលរួមបាតុកម្មជាមួយកម្មករ
តវ៉ាទាមទារប្រាក់ខែគោល ១៦០ដុល្លារក្នុងមួយខែ
នៅមុខរោងចក្រយ៉ាកជីង ខណ្ឌពោធិសែនជ័យ រាជធានីភ្នំពេញ។ ពេលនេះ
អ្នកទាំង២៣នាក់នេះ កំពុងឃុំខ្លួននៅពន្ធនាគារត្រពាំងផ្លុង
ខេត្តកំពង់ចាម ដែលគិតមកដល់ពេលនេះ មានរយៈពេលជិតមួយខែមកហើយ៕
