អ្នកភូមិ៥០នាក់ដែលបានផ្ដិតមេដៃរួចនាំគ្នាទៅវាយលោកតា អាយុ៥៧ឆ្នាំចោទថាចេះអាបធ្មប់ បានភៀសខ្លួនចេញពីភូមិបាត់អស់
ការគេចខ្លួនរបស់អ្នកភូមិទាំងនេះ គ្រាដែលគេដឹងថា លោកតារងគ្រោះ មិនមានសង្ឃឹមរស់ ហើយត្រូវបានក្រុម គ្រួសារបញ្ជូនមកសង្គ្រោះនៅមន្ទីរពេទ្យក្នុងរាជធានីភ្នំពេញ ។
ប្រភពបានឱ្យដឹងថា នៅព្រឹកថ្ងៃទី២១ ខែមករា ឆ្នាំ២០១៤ ប្រធាននិងអនុ ប្រធានភូមិអង្កាញ់ត្រូវបាននគរបាល ប៉ុស្ដិ៍អង្កាញ់កោះហៅព្រមព្រៀងគ្នាទៅ បំភ្លឺជុំវិញករណីនេះព្រោះគេដឹងថាប្រធាននិងអនុប្រធានភូមិទាំង២ នាក់នេះបានដឹងរឿងដែលអ្នកភូមិផ្ដិតមេដៃទៅវាយជន រងគ្រោះ តែមិនបានរាយការណ៍ឱ្យសមត្ថ កិច្ចបានដឹង ។
ទាក់ទិននឹងការកោះហៅប្រធាននិង អនុប្រធានភូមិទៅបំភ្លឺរឿងនេះអស់រយៈពេលជាច្រើនម៉ោងរួចមកនគរបាល បានអនុញ្ញាតឱ្យវិលត្រឡប់មកផ្ទះ ។ បើតាម ប្រភពបានបង្ហើបថា ប្រធាននិងអនុ ប្រធានភូមិបានឆ្លើយដោះសារថា មិន បានដឹងបញ្ហានេះទេ ដោយនៅថ្ងៃកើតេ ហតុពួកគាត់រវល់ទៅធ្វើការនៅឆ្ងាយ ។
តាមប្រភពពីនគរបាលបានបង្ហើប ឱ្យដឹងទៀតថា ទោះជាប្រធាននិងអនុ ប្រធានភូមិបដិសេធយ៉ាងនេះក៏ដោយ តែសមត្ថកិច្ចបានដាក់កំហិតឱ្យប្រធាន និងអនុប្រធានភូមិទាំង២នាក់នេះត្រូវ តែកោះហៅអ្នកភូមិដែលជាប់ពាក់ព័ន្ធ វាយជនរងគ្រោះឱ្យចូលមកបំភ្លឺជុំវិញការវាយជនរងគ្រោះក្នុងអំពើ ខុសច្បាប់ ។
គួររំលឹកថា កាលពីថ្ងៃទី១៧ ខែមករា ឆ្នាំ២០១៤ វេលាម៉ោង២១និង៣០នាទី យប់មានមនុស្សប្រមាណជា៥០នាក់ បានលើកគ្នាទៅកាប់វាយលោកតាម្នាក់ ឈ្មោះម៉ៅ ផាន់ និងប្រើដុំថ្មគប់បំផ្លាញ ផ្ទះបណ្ដាលឱ្យលោកតារងរបួសជាទំងន់ ។ ក្នុងខណៈមានអំពើហិង្សានេះលោកតា ម៉ៅ ផាន់ ក៏បានតស៊ូជាមួយនឹងបុរសម្នាក់ ឈ្មោះវង់ សំអុលឱ្យរបួសវិញដែរ ខណៈ អ្នកភូមិឯទៀតបានគេចខ្លួនចេញពីកន្លែងកើតហេតុ បច្ចុប្បន្នជនសង្ស័យឈ្មោះវង់ សំអុលក៏កំពុងសម្រាកព្យាបាលនៅមន្ទីរ ពេទ្យបង្អែកខេត្ដតាកែវផងដែរ ។
គួរបញ្ជាក់ថា ជនរងគ្រោះអាយុ ៥៧ឆ្នាំ នៅភូមិ-ឃុំ អង្កាញ់ ស្រុកកប្បាស ខេត្ដតាកែវ រស់នៅជាមួយកូនស្រីម្នាក់ ដែលមានសតិមិនគ្រប់ ។
នៅថ្ងៃកើតហេតុបើយោងតាមអ្នក ភូមិដែលមិនបានផ្ដិតមេដៃចូលរួមប្រើ អំពើហិង្សាទៅលើជនរងគ្រោះបានបញ្ជាក់ឱ្យដឹងថា មុនពេលមានអំពើហិង្សាកើត ឡើងមានជនអគតិដែលគេដឹងថា រស់ នៅជាប់ជាមួយផ្ទះជនរងគ្រោះបានដើរ ប្រមូលស្នាមមេដៃបំណងដើម្បីបណ្ដេញជនរងគ្រោះចេញពីភូមិ ក្រោមលេសថា ជនរងគ្រោះចេះអំពើអាបធ្មប់និងជាមនុស្សចង្រៃក្នុងភូមិ ។
ប្រភពពីអ្នកភូមិដដែលនេះបានបន្ដថា ក្រោយពីមានស្នាមមេដៃរួចមក នៅយប់ថ្ងៃកើតហេតុខាងលើមានអ្នក ភូមិប្រមាណ៥០នាក់ភាគីច្រើនសុទ្ធតែ ក្មេងប្រុសបានមកជួបជុំគ្នាផឹកស៊ីនៅផ្ទះ ឈ្មោះ វង់ សំអុល ហើយក្រោយមកក៏បានចេញមកធ្វើសកម្មភាពទៅលើជនរងគ្រោះតែម្ដង ។
កាលណោះប្រភពពីសមត្ថកិច្ចដែល ចុះទៅស្រាវជ្រាវករណីនេះបានឱ្យដឹងថា បុរសឈ្មោះវង់ សំអុល ដែលចូលទៅ កាប់លោកតាម៉ៅ ផាន់ ខណៈអ្នកភូមិ ជាជនដៃដល់ឯទៀតបានភៀសខ្លួនអស់ នោះលោកតាម៉ៅ ផាន់ ក៏បានកាប់ឱ្យឈ្មោះ វង់ សំអុល រងរបួសវិញដែរ ។
ជុំវិញករណីខាងលើនេះ ប្រជាពល រដ្ឋដែលមិនចូលរួមបាននិយាយថា ប្រធាន និងអនុប្រធានភូមិអង្កាញ់មិនគួរមិនទទួលខុសត្រូវថា ខ្លួនមិនបានដឹងរឿងនេះទេ ធាតុពិតប្រធានភូមិនិងអនុប្រធានភូមិ បានដឹងរឿងនេះតាំងពីដើមរហូតដល់ ចប់តែមិនព្រមរាយការណ៍ឱ្យសមត្ថកិច្ច ប៉ុស្ដិ៍ ។ អ្វីដែលគួរឱ្យអនិចាលោកតាម៉ៅ ផាន់ រងរបួសតាំងពីម៉ោង២១ថ្ងៃទី១៧ រហូតដល់ម៉ោង១១និង៣០នាទីថ្ងៃត្រង់ ថ្ងៃទី១៨ ខែមករា ឆ្នាំ២០១៤ មិនមាន អាជ្ញាធរណាអើពើបញ្ជូនជនរងគ្រោះទៅកាន់មន្ទីរពេទ្យនោះទេ ។
ជុំវិញកាលលើកឡើងប្រជាពលរដ្ឋ ខាងលើនេះអ្នកយកព័ត៌មាននគរវត្ដ មិនអាចរកការបំភ្លឺពីប្រធាននិងអនុ ប្រធានភូមិអង្កាញ់បានទេនៅរសៀល ថ្ងៃទី២១ ខែមករា ឆ្នាំ២០១៤ ថាតើអ្វី ដែលប្រជាពលរដ្ឋលើកឡើងជាការពិត ឬយ៉ាងណា? ៕
ប្រភពពីនគរវត្ត
