កាដូរឆ្នាំថ្មីសម្រាប់ម៉ែឪ : សង្ស័យឈ្លោះគ្នាជាមួយសង្សារលោតពីលើផ្ទះជាន់ទី៣របួសធ្ងន់
ករណីភ្ញាក់ផ្អើលខាងលើនេះបានកើតឡើងកាលពីវេលាម៉ោង៦និង៣០នាទី ល្ងាច ថ្ងៃទី២៩ ខែមករា ឆ្នាំ ២០១៤ ស្ថិតនៅលើផ្ទះជាន់ទី៣លេខ៨៣អឺ៣ តាមផ្លូវលេខ១៦១ ក្នុងសង្កាត់អូរឫស្សីទី២ ខណ្ឌ៧មករា ។
យុវតីរងគ្រោះមានឈ្មោះ ជុង ចាន់យូ អាយុ១៦ឆ្នាំ ជាសិស្ស ស្នាក់នៅផ្ទះកើតហេតុខាងលើបានរងរបួសសន្លប់ស្តូកស្តឹងត្រូវ បានក្រុមគ្រួសារដឹកយកទៅសង្គ្រោះនៅមន្ទីរពេទ្យភ្លាមៗ បន្ទាប់ពីនាងបានអារដៃឆ្វេងរបស់នាង និងលោតពីលើផ្ទះជាន់ទី៣នោះ ។
តាមសម្តីអ្នកស្រីឈ្មោះ សា មួយ អាយុ៦០ឆ្នាំ ជាម្តាយចិញ្ចឹមកូនស្រីខាងលើបានឲ្យដឹងថា មុនពេលកើតហេតុកូនរបស់គាត់មិនដឹងជាយ៉ាងម៉េចដោយមានទឹកមុខ ស្រពាប់ស្រពោន និងបាននិយាយថា នាងបានឈ្លោះគ្នាជាមួយសង្សារនាង ។ ពេលនោះគាត់មិនបានចាប់អារម្មណ៍និង ឃ្លាំមើលកូនស្រីទេ ស្រាប់តែមកដល់ម៉ោងកើតហេតុខាងលើនាងក៏បានលោតពីផ្ទះជាន់ទី៣ បណ្តាលឲ្យសន្លប់ស្តូកស្តឹងរងរបួសធ្ងន់ ។ ភ្លាមៗនោះគាត់បានដឹកកូនស្រីយកទៅសង្គ្រោះនៅមន្ទីរពេទ្យភ្លាមៗ ផងដែរ។
ក្រុមគ្រួសារយុវតីរងគ្រោះបានឲ្យដឹងថា ការលោតពីលើផ្ទះប៉ងសម្លាប់ខ្លួនរបស់កូនស្រីរូបនេះទំនងជានាង ឈ្លោះគ្នាជាមួយសង្សារ ទើបធ្វើឲ្យនាងគិតខ្លីលោតពីលើផ្ទះបែបនេះ ។
ក្រោយកើតហេតុសមត្ថកិច្ចមូលដ្ឋានបានចុះពីធ្វើកោសល្យវិច័យ កំណត់ហេតុនិងបានបញ្ជូននារីរងគ្រោះទៅមន្ទីរពេទ្យដើម្បីព្យាបាល តែម្តង ៕
ប្រភពពី នគរវត្ត
