ពលរដ្ឋមានបញ្ហាដីនៅឧត្ដរមានជ័យ រកអន្តរាគមន៍ពីសហគមន៍អឺរ៉ុប
តំណាងសភាអឺរ៉ុបទាំងនោះកំពុងតែចង់ដឹងអំពីស្ថានភាព និងការលំបាកផ្សេងៗរបស់ក្រុមប្រជាពលរដ្ឋខ្មែរដែលគេបណ្ដេញចេញពី លំនៅឋានដោយគ្មានសំណង និងគ្មានដីធ្លីធ្វើកសិកម្ម តើស្ថិតនៅក្នុងជីវភាពកម្រិតណា?
ការស្កាត់ជួបនេះ នៅស្របពេលដែលតំណាងសភានៃសហគមន៍អឺរ៉ុបជាច្រើនរូប បានចុះទៅពិនិត្យស្ថានភាពជនបាត់បង់ផ្ទះសំបែង និងដីស្រែចំការនៅតាមបណ្ដាភូមិមួយចំនួនក្នុងក្រុងសំរោង។ គណៈកម្មការនៃសហគមន៍ព្រៃឈើ រតនៈ រុក្ខា គឺលោក សូន សន។ លោកបានមានប្រសាសន៍ថា មានប្រជាពលរដ្ឋជាច្រើនគ្រួសារនៅតាមបណ្ដាភូមិនៃសង្កាត់កូនក្រៀល បានលើកគ្នាស្កាត់ជួបតំណាងសភានៃសហគមន៍អឺរ៉ុប។ លោក សួន សន បានឱ្យដឹងទៀតថា ក្រុមអ្នកភូមិដែលលើកគ្នាស្កាត់ជួបតំណាងសភាអឺរ៉ុបនោះ គឺសុទ្ធសឹងតែជាអ្នកដែលទទួលរងការប៉ះពាល់ ដោយសារ រដ្ឋាភិបាលខ្មែរផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនឯកជន។
លោក សួន សន៖ «បងប្អូនប្រជាពលរដ្ឋហ្នឹងគាត់ឃើញសហគមន៍អឺរ៉ុបមក ហ្នឹង គាត់ក៏ឆក់ឱកាស ហ្នឹងចង់បង្ហាញពីទុក្ខកង្វល់ខ្លះៗ ទាក់ទងពីការសម្បទានដីសេដ្ឋកិច្ចឱ្យក្រុមហ៊ុន ដែលប៉ះពាល់ដីរបស់គាត់ ហើយគាត់ចង់ទាមទារទៅរដ្ឋាភិបាលឱ្យដកដីពីក្រុមហ៊ុនមកឱ្យ ប្រជាពលរដ្ឋវិញ»។
លោក សួន សន បានមានប្រសាសន៍បន្ថែមទៀតថា ក្រៅពីប្រជាពលរដ្ឋស្កាត់ចង់ជួបតំណាងសភានៃសហគមន៍អឺរ៉ុបនោះ គឺសហគមន៍ព្រៃឈើរបស់លោកក៏មានកង្វល់មួយចំនួនចង់ថ្លែងប្រាប់ដែរ។ កង្វល់ទាំងនោះ ដូចជាក្តីព្រួយបារម្ភជុំវិញការកាប់បំផ្លាញព្រៃឈើកាន់តែច្រើន ឡើងៗ ហើយសហគមន៍គ្មានមូលនិធិគ្រប់គ្រាន់ដើម្បីធ្វើសកម្មភាពការពារ ជាដើម៖ «សហគមន៍ព្រៃឈើ ខ្ញុំចាំមើលគាត់មកដល់ បើថាមានឱកាសហ្នឹង ខ្ញុំសំណូមពរអីមួយចំនួនហើយ»។
នៅក្នុងដំណើរមកដល់កាលពីព្រឹកថ្ងៃអង្គារ ទី២៨ ខែមករា ក្រុមតំណាងសភាសហគមន៍អឺរ៉ុបបានចុះទៅពិនិត្យស្ថានភាពអតីត អ្នកភូមិអូរបាត់មាន់ ជាង ២០០គ្រួសារ ដែលអាជ្ញាធរបានបណ្ដេញចេញ និងរុះរើផ្ទះសំបែងកាលពី ៤ឆ្នាំមុន ដោយសារយកដីទៅឱ្យក្រុមហ៊ុន អង្គរ ស៊ូហ្គើរ៍ (Angkor Sugar) ដាំអំពៅផលិតជាស្ករ។
បុរសម្នាក់ក្នុងចំណោមអតីតអ្នកភូមិអូរបាត់មាន់ គឺលោក សឹង វណ្ណា បានមានប្រសាសន៍ថា ក្រុមអ្នកភូមិជាច្រើនរយនាក់បានលើកគ្នាទៅអង្គុយលើដីទំនេរ ក្រោមម្លប់ឈើមួយកន្លែង ដើម្បីរង់ចាំជួប តំណាងសភាអឺរ៉ុបទាំងនោះ។ បុរសដដែលបានបញ្ជាក់ថា អ្នកភូមិជាច្រើនដែលធ្លាប់ទទួលរងការបណ្ដេញចេញ ហើយមិនបានសំណងអ្វីទាល់តែបានបង្ហាញភស្តុតាងពាក់ព័ន្ធនឹង កម្មសិទ្ធិដីធ្លីរបស់ពួកគេជាច្រើន។
លោក សឹង វណ្ណា៖ «គេមកធ្វើសម្ភាសន៍ម្ដងម្នាក់ៗអ៊ីចឹង គេរកឯកសារយើងបានផ្ដល់ឱ្យគេ ហើយយើងស្នើសុំឱ្យគេជួយដោះស្រាយដីធ្លីជូនប្រជាពលរដ្ឋវិញហើយឱ្យ គេជួយអន្តរាគមន៍លើការដោះស្រាយសំណង ដែលធ្វើផ្ទះធ្វើអីហើយ តែត្រូវគេឈូសចោលនោះ»។
ក្រុមអ្នកភូមិជាច្រើនរយនាក់ដែលខំស្កាត់ជួបតំណាងសភាអឺរ៉ុប នោះ បានបង្ហាញសេចក្ដីសង្ឃឹមទៅលើការចុះពិនិត្យស្ថានភាពពួកគេពេលនេះ ថាគឺជាការជួយលើកទឹកចិត្តដល់ពួកគេយ៉ាងខ្លាំង។ អ្នកភូមិខ្លះបាននិយាយថា ដំណើរចុះពិនិត្យស្ថានភាពប្រជាពលរដ្ឋខ្មែរដែលទទួលរងការបណ្ដេញចេញ នេះ បើទោះបីជាតំណាងសភាអឺរ៉ុប មិនអាចជួយបានតាមសេចក្ដីត្រូវការទាំងអស់ក៏ដោយ ក៏គេរំពឹងថា វាអាចមានសង្ឃឹមច្រើនជាងអ្វីដែលអ្នកភូមិធ្លាប់ទាមទារដោយខ្លួន ឯងកន្លងទៅ ដោយមិនទទួលលទ្ធផលអ្វីទាល់តែសោះ។
អ្នកភូមិ៖ «យើងមិនអាចសង្ឃឹមថាបាន ១០០% ទេ ក៏ប៉ុន្តែយើងអាចសង្ឃឹមបាន ៥០-៦០% ដែរ ព្រោះគេខំចុះមកចំណាយពេលវេលាដ៏មានតម្លៃមកថតផ្ទាល់ ហើយទោះយ៉ាងណា គេច្បាប់ ដឹងច្បាប់ អត់ដូចស្រុកខ្មែរ ស្រុកយើងទេ»។
ពេញ១ថ្ងៃអង្គារ ទី២៨ ខែមករា ក្រុមតំណាងសភាអឺរ៉ុបមានគម្រោងនឹងចុះពិនិត្យមើលស្ថានភាព ប្រជាពលរដ្ឋខ្មែរនៅភូមិចំនួន ៤ នៃក្រុងសំរោង គឺនៅភូមិអូរបាត់មាន់ ភូមិបូស ភូមិបាក់នឹម និងភូមិគោកភ្លុក។
អ្នកឃ្លាំមើលសិទ្ធិមនុស្សរបស់អង្គការក្រៅរដ្ឋាភិបាលបានឱ្យដឹង ថា ដំណើរចុះពិនិត្យមើលស្ថានភាពប្រជាពលរដ្ឋដែលទទួលរងការបណ្ដេញចេញពី លំនៅឋាននោះ គឺអាជ្ញាធរបានបញ្ជូនកម្លាំងប៉ូលិសមួយចំនួនដើម្បីតាមឃ្លាំមើល។
ទោះយ៉ាងណា វិទ្យុអាស៊ីសេរី មិនអាចទាក់ទងមន្ត្រីសាលាខេត្តឧត្តរមានជ័យ ដើម្បីសុំការអធិប្បាយជុំវិញដំណើរចុះពិនិត្យស្ថានភាពប្រជាពលរដ្ឋ ខ្មែររបស់តំណាងសភាសហគមន៍អឺរ៉ុបនោះ បានថាយ៉ាងណានៅឡើយ។ ចំណែកអភិបាលក្រុងសំរោង លោក ថុន ណុល បានព្យាយាមមិនអធិប្បាយបញ្ហាទាំងនេះទេ ដោយលោកមានប្រសាសន៍ថា ការឆ្លើយឆ្លងគ្នាតាមទូរស័ព្ទ គឺស្ដាប់មិនច្បាស់។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន បានមានប្រសាសន៍ថា ក្នុងពេលជួបជាមួយក្រុមប្រជាពលរដ្ឋតំណាងសភាអឺរ៉ុបទាំងនោះ បានលើកទឹកចិត្តឱ្យអ្នកភូមិខ្មែរចេះប្រមូលផ្ដុំគ្នា និងខិតខំតស៊ូមតិជុំវិញបញ្ហាទាមទារដីធ្លី ពីព្រោះវាជាសិទ្ធិសេរីភាពស្របច្បាប់។
លោក ស្រី ណារ៉េន បានបញ្ជាក់ទៀតថា តំណាងសភាអឺរ៉ុបទាំងនោះ បានសន្យាថា គេនឹងមិនព្រងើយកន្តើយចំពោះទុក្ខវេទនារបស់ប្រជាពលរដ្ឋខ្មែរទាំង នោះទេ បើទោះបីជាពួកគេចាកចេញទៅវិញក៏ដោយ គឺត្រូវតែធ្វើរបាយការណ៍ជុំវិញរឿងនោះដាក់ទៅសភាអឺរ៉ុប ឱ្យបានលឿនបំផុត ដើម្បីឱ្យឆាប់ឆ្លើយតបតាមតម្រូវការរបស់ប្រជាពលរដ្ឋខ្មែរវិញ។
លោក ស្រី ណារ៉េន បានឱ្យដឹងថា រូបលោកផ្ទាល់ក៏បានកសាងឯកសារជាច្រើនពាក់ព័ន្ធនឹងករណីរំលោភ ដីធ្លីនានា នៅក្នុងខេត្តឧត្តរមានជ័យ ហើយលោកក៏មានគម្រោងប្រគល់ឯកសារទាំងនោះទៅតំណាងសភាអឺរ៉ុបដែរ៖ «ខ្ញុំ នឹងព្យាយាមជួបគាត់ ហើយនឹងបង្ហាញពីអ្វីដែលខ្ញុំតាមដានតាំងពីបង្កើតក្រុមហ៊ុនដំបូង មក។ ការតស៊ូរបស់ខ្ញុំ ហើយផលិតផលទាំងអស់ដែលខ្ញុំកសាងមក គឺសំដែងអរគុណណាស់ចំពោះព័ត៌មានដែលធ្លាយទៅដល់អឺរ៉ុប ហើយឥឡូវអឺរ៉ុបគាត់ចុះមកធ្វើការពិនិត្យមើលប្រជាពលរដ្ឋខ្មែរនេះ»។
លោក ស្រី ណារ៉េន បញ្ជាក់ទៀតថា បន្ទាប់ពីបានជួបជាមួយអតីតអ្នកភូមិអូរបាត់មាន់ មក គឺនៅមុនពេលចាកចេញទៅ តំណាងសភាអឺរ៉ុបបានផ្ដែផ្ដាំអ្នកភូមិខ្មែរទាំងនោះកុំឱ្យអស់ សង្ឃឹម បើទោះបីជា កំពុងទទួលរងទុក្ខវេទនាដោយសារការបណ្ដេញចេញពីលំនៅឋានក៏ដោយ៕
ប្រភពពី វិទ្យុអាស៊ីសេរី
