តុលាការខេត្តកំពង់ឆ្នាំងកោះហៅអ្នកភូមិឡពាងឡើងតុលាការរឿងទំនាស់ដីធ្លី
ប្រជាពលរដ្ឋ និងតំណាងអ្នកភូមិឡពាង ចំនួន ៣នាក់ កំពុងតែមានការភ័យខ្លាច និងស្វែងរកកិច្ចអន្តរាគមន៍ផ្លូវច្បាប់ពីមន្ត្រីអង្គការសិទ្ធិមនុស្ស បន្ទាប់ពីពួកគាត់ទទួលបានដីកាកោះរបស់តុលាការខេត្តកំពង់ឆ្នាំង ដើម្បីឲ្យចូលខ្លួនទៅបំភ្លឺជុំវិញករណីធ្វើឲ្យខូចខាតដោយចេតនា។ ក្រុមប្រជាពលរដ្ឋអះអាងថា ការកោះហៅរបស់តុលាការនាពេលនេះ គឺធ្វើទៅតាមពាក្យប្ដឹងរបស់ក្រុមហ៊ុន ខេ.ឌី.ស៊ី (KDC) ដើម្បីគំរាមកំហែង និងបំបាក់ស្មារតីមកលើអ្នកភូមិឡពាង។
ប្រជាពលរដ្ឋមានទំនាស់ដីធ្លីនៅភូមិឡពាង ជាច្រើនគ្រួសារ បានធ្វើពិធីស្រោចទឹកបណ្ដេញឧបទ្រពចង្រៃ និងស្វាគមន៍ចំពោះការចេញពីពន្ធនាគាររបស់ លោក ស សុង ក្រោយពីអនុវត្ដទោសនៅក្នុងពន្ធនាគារអស់រយៈពេល ៦ឆ្នាំ។ ការស្វាគមន៍នេះ ធ្វើឡើងមិនបានប៉ុន្មានថ្ងៃផង ស្រាប់តែមានតំណាង និងប្រជាពលរដ្ឋភូមិឡពាង ចំនួន ៣នាក់ផ្សេងទៀត ត្រូវបានសាលាដំបូងខេត្តកំពង់ឆ្នាំង ចេញដីកាកោះឲ្យចូលខ្លួនទៅបំភ្លឺចំពោះមុខតុលាការ នៅថ្ងៃទី៤ ខែធ្នូ ឆ្នាំ២០១៣ ខាងមុខ។
តំណាង និងប្រជាពលរដ្ឋទាំងបីនាក់ គឺមានឈ្មោះ រាជ សីម៉ា ញឹម ញឿន និងឈ្មោះ ភុល សន។ ពួកគាត់ធ្លាប់ចេញមុខតវ៉ាយ៉ាងសកម្មជាមួយក្រុមអ្នកភូមិឡពាង ផ្សេងទៀត ដើម្បីរើបម្រាស់ពីការរំលោភសិទ្ធិ និងដីធ្លីពីសំណាក់ក្រុមហ៊ុន ខេ.ឌី.ស៊ី របស់ លោកជំទាវ ជា ខេង ស្ថិតនៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង។
ក្រុមប្រជាពលរដ្ឋបានបង្ហាញនូវហេតុផលចំនួនពីរផ្សេងគ្នា ដែលនាំឲ្យមានការកោះហៅពួកគាត់ឡើងតុលាការនាពេលនេះ គឺទី១ បណ្ដាលមកពីសកម្មភាពរបស់អ្នកភូមិចំនួន ១០គ្រួសារ បានចូលទៅស្ទូងស្រូវនៅលើដីស្រែពួកគាត់កំពុងមានទំនាស់ជាមួយក្រុមហ៊ុន ខេ.ឌី.ស៊ី និងទី២ គឺអាចបណ្ដាលមកពីការដកបង្គោលព្រំដីក្រុមហ៊ុន ដែលបានបោះចូលក្នុងដីរបស់ពួកគាត់ និងសកម្មភាពរុះរោងចាំដីក្រុមហ៊ុន ខេ.ឌី.ស៊ី កាលពីខែឧសភា ឆ្នាំ២០១៣។
តំណាងអ្នកភូមិឡពាង ម្នាក់ លោក រាជ សីម៉ា បានប្រាប់វិទ្យុអាស៊ីសេរី នៅថ្ងៃទី២ ខែធ្នូ ថា ការកោះហៅពួកគាត់ទាំងបីនាក់នេះ គឺគ្រាន់តែជាការព្រមាន និងចង់បំបាក់ស្មារតីមិនឲ្យពួកគាត់ហ៊ានងើបតវ៉ារឿងដីធ្លី។ លោកបន្តថា នៅគ្រាដែលគ្រួសាររបស់លោក និងអ្នកភូមិផ្សេងទៀតកំពុងតែជួបប្រទះនឹងបញ្ហាជីវភាពធ្ងន់ធ្ងរ រឿងរ៉ាវបានកើតឡើងជាបន្តបន្ទាប់ ដែលធ្វើឲ្យជីវភាពរបស់ពួកគាត់កាន់តែធ្លាក់ដុនដាបខ្លាំង៖ «គ្រាន់តែ ស សុង ចេញភ្លាម ខ្ញុំមានដីកាពីបទបំផ្លិចបំផ្លាញទ្រព្យសម្បត្តិអ្នកដទៃ បើរឿង ស សុង គេចោទប្រកាន់អំពីបទសម្លាប់មនុស្ស ហើយខ្ញុំដោយសារអត់មានបទហ្នឹង ក្រុមហ៊ុនរកលេសខ្ញុំបទធ្វើឲ្យខូចខាតដោយចេតនានេះវិញ។ មិនត្រឹមប៉ះពាល់ដល់ខ្ញុំទេ ធ្វើឲ្យទាំងគ្រួសារខ្ញុំភ័យខ្លាច និងព្រួយបារម្ភអំពីប្ដីអីមិនមានអ្នករកស៊ីចិញ្ចឹមអ៊ីចឹងដែរ ព្រោះធម្មតាអ្នកតវ៉ាដីធ្លីវាតែងតែមានដូច លោក ស សុង ជាគំរូហើយ»។
ចំណែកប្រជាពលរដ្ឋម្នាក់ទៀត លោក ភុល សន មានប្រសាសន៍ថា លោកមានកំហឹង និងការឈឺចាប់រហូតមកដល់ពេលបច្ចុប្បន្ន ដោយសារតែក្រុមហ៊ុនបានរំលោភយកដីស្រែទាំងគាត់មិនដែលបានលក់បន្តិចណាឡើយ។ លោកបន្តថា ពួកគាត់ទាំងបីនាក់នឹងស្នើសុំទៅតុលាការពន្យារពេលនៃការសាកសួរ ដើម្បីរង់ចាំមេធាវីពីខាងអង្គការសិទ្ធិមនុស្សលីកាដូ (Licadho) ជួយការពាររឿងក្ដីនេះ។
វិទ្យុអាស៊ីសេរី មិនអាចទាក់ទងតំណាងក្រុមហ៊ុន ខេ.ឌី.ស៊ី លោក ថៃ ហ៊ី ដើម្បីសុំការអត្ថាធិប្បាយជុំវិញបញ្ហានេះបាននៅឡើយទេ។
ចំណែកព្រះរាជអាជ្ញាអមសាលាដំបូងខេត្តកំពង់ឆ្នាំង លោក ពេញ វិបុល បានមានប្រសាសន៍យ៉ាងខ្លីនៅថ្ងៃទី២ ខែធ្នូ ថា លោកមិនទាន់អាចអត្ថាធិប្បាយអ្វីបានជុំវិញបញ្ហានេះទេ ពីព្រោះលោកកំពុងជាប់រវល់។
ទាក់ទងនឹងបញ្ហានេះ មន្ត្រីសម្របសម្រួលនៃអង្គការសិទ្ធិមនុស្សលីកាដូ ប្រចាំខេត្តកំពង់ឆ្នាំង លោក គង់ ច័ន្ចមុនី មានប្រសាសន៍ថា អង្គការលីកាដូ នឹងឃ្លាំមើលដោយយកចិត្តទុកដាក់ជុំវិញករណីនេះ ហើយលីកាដូ នឹងផ្ដល់មេធាវីជូនពួកគាត់ ប្រសិនបើមានការស្នើសុំ៖ «គាត់ខ្លាចតែមានការឃុំខ្លួន។ កាលមុនយើងមានជនរងគ្រោះម្នាក់ដូច ស សុង នោះ ទើបចេញពីថ្ងៃទី២៨។ ដូច្នេះ ឥឡូវនេះមានបីនាក់ថែមទៀតត្រូវរងការចោទថាជាជនសង្ស័យ ឲ្យចូលបំភ្លឺនៅថ្ងៃទី៤ ខែធ្នូ នេះ។ យើងសុំឲ្យតុលាការអនុវត្តនីតិវិធី និងធ្វើយ៉ាងណាឲ្យមានយុត្តិធម៌ដល់ជនរងគ្រោះទាំង ៣រូបនេះ»។
ជម្លោះដីធ្លីរវាងក្រុមហ៊ុន ខេ.ឌី.ស៊ី និងអ្នកភូមិឡពាង បានកើតឡើងតាំងពីឆ្នាំ២០០១ ហើយបានកក្រើកឡើងខ្លាំងនៅឆ្នាំ២០០៧។ កាលនោះ មានប្រជាពលរដ្ឋជាច្រើននាក់ទទួលរងនូវការគំរាមកំហែង និងចាប់ដាក់ពន្ធនាគារ ក្រោមបទចោទផ្សេងៗគ្នា ដូចជា អ្នកស្រី អ៊ុន ទុំ ត្រូវបានសាលាដំបូងខេត្តកំពង់ឆ្នាំង កាត់ឲ្យជាប់ពន្ធនាគាររយៈពេល ១ឆ្នាំកន្លះ ពីបទកាន់កាប់ដីលើប្លង់មានកម្មសិទ្ធិ។ ចំណែក លោក ស សុង ក៏ត្រូវបានតុលាការខេត្តនេះកាត់ឲ្យជាប់ពន្ធនាគាររយៈពេល ១១ឆ្នាំ ពីបទប៉ុនប៉ងមនុស្សឃាត និងកាន់កាប់ដីលើប្លង់មានកម្មសិទ្ធិ ក៏ប៉ុន្តែសំណុំរឿងនេះត្រូវបានតុលាការសាលាកំពូលសើរើ និងបញ្ជាឲ្យសាលាឧទ្ធរណ៍កាត់ឡើងវិញ នៅត្រឹមរយៈពេល ៦ឆ្នាំ។
អភិបាលនៃគណៈអភិបាលស្រុកកំពង់ត្រឡាច លោក ហ៊ុល ចាន់ថូ មានប្រសាសន៍ថា ការដោះស្រាយវិវាទដីធ្លីរវាងអ្នកភូមិឡពាង ជាមួយនឹងក្រុមហ៊ុន ខេ.ឌី.ស៊ី មិនទាន់មានអ្វីប្រែប្រួល ឬទទួលបានលទ្ធផលវិជ្ជមាននៅឡើយទេ។ លោកបន្តថា អាជ្ញាធរបានព្យាយាមឲ្យភាគីក្រុមហ៊ុន និងប្រជាពលរដ្ឋពិភាក្សាគ្នា ដើម្បីដោះស្រាយបញ្ចប់បញ្ហា៖ «ក្រុមហ៊ុនហ្នឹងជួបជាមួយនឹងប្រជាពលរដ្ឋអ៊ីចឹងទៅ ហើយក្នុងនាមខ្ញុំជាអាជ្ញាធរ ខ្ញុំតាមមើលលទ្ធផលហ្នឹងណា។ ក្នុងគោលបំណងរបស់យើង គឺយើងធ្វើម៉េចឲ្យវាមានដំណោះស្រាយល្អ ប៉ុន្តែវាស្ថិតនៅលើភាគីទាំងពីរ»។
បញ្ហាដីធ្លីរវាងក្រុមហ៊ុន ខេ.ឌី.ស៊ី ជាមួយនឹងអ្នកភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង បានអូសបន្លាយអស់រយៈពេលជាង ១០ឆ្នាំ បណ្ដាលឲ្យប្រជាពលរដ្ឋជាច្រើនគ្រួសារមានជីវភាពក្រលំបាក ហើយកំពុងតែប្រឈមនឹងបញ្ហាផ្សេងៗជាច្រើន។ មនុស្សពេញកម្លាំងបានធ្វើចំណាកស្រុកស្ទើរស្ងាត់ភូមិ ចំណែកមនុស្សចាស់ និងក្មេងដែលមិនទាន់ពេញកម្លាំងធ្វើការ បានដើរចាប់កូនកង្កែប និងដេរស្លឹកកណ្ដបលក់ ដើម្បីយកប្រាក់ទិញអង្ករហូបប្រចាំថ្ងៃ៕
ប្រភពពី វិទ្យុអាស៊ីសេរី
