ឧកញ៉ាហែម ថេងបំភ្លឺការចោទប្រកាន់ថាជំពាក់លុយមិនសងនិងចេញសែកស្អុយ
ភ្នំពេញៈ លោកឧត្តមសេនីយ៍ទោ ឧកញ៉ាហែម ថេង អនុប្រធាននាយដ្ឋានអន្តោប្រវេសន៍នៃក្រសួងមហាផ្ទៃ បានផ្តល់កិច្ចសម្ភាសន៍ដ៏កម្រមានមួយ ដល់កាសែតភ្នំពេញ ប៉ុស្តិ៍ ជាមួយវត្តមានមេធាវីរបស់លោកចំនួន២រូប គឺលោកអឿន ស៊ុយ និង លោកកៅ ទី កាលពីថ្ងៃ ទី ៣ ខែ ធ្នូ២០១៣នេះ ដើម្បីស្រាយបំភ្លឺនិងពន្យល់ជុំវិញការចោទប្រកាន់ថា លោកឧកញ៉ាថា បានខ្ចីលុយមិនសងចំនួនជាង ៧០ ម៉ឺនដុល្លារអាមេរិក និងបានចេញសែកគ្មានសាច់ប្រាក់ជាមួយនឹងភរិយានិងម្តាយក្មេករបស់លោក ទៅភាគីដើមបណ្តឹងចំនួន ៣នាក់កាលពីអំឡុងឆ្នាំ ២០១១។
ពាក់ពាក់ព័ន្ធនឹងករណីខាងលើនេះ លោកឧកញ៉ា ហែម ថេង បានបដិសេធយ៉ាងអហង្កា ថាៈ រឿងនេះមិនមានជាប់ពាក់ព័ន្ធនឹងលោកទេ តែជារឿងរ៉ាវនេះ មានជាប់ពាក់តែជាមួយភរិយានិងម្តាយក្មេកតែប៉ុណ្ណោះ តែភាគីភាគីដើមបណ្តឹង និងមេធាវីពួកគេបានព្យាយាមទាញភ្ជាប់ឈ្មោះលោកឧកញ៉ា ចូលក្នុងករណីនោះ ដែលបានធ្វើឲ្យប៉ះពាល់យ៉ាងធ្ងន់ធ្ងរ ដល់កកិ្តយស កេរ្តិ៍ឈ្មោះ កិត្យានុភាព និងសេចក្តីថ្លៃថ្នូររបស់លោក ដែលមិនអាចឲ្យលោកអន់ឪនឲ្យបានឡើយ។
លោកឧកញ៉ា ក៏បានបង្ហាញឯកសារពាក់ព័ន្ធនានា តាមរយៈមេធាវីរបស់លោកទាំង ២ ឲ្យឃើញថាៈ ពុំមានឈ្មោះ របស់លោកបានជាប់ពាក់ព័ន្ធនឹងការខ្ចីលុយ ឬ ចេញសែកនោះឡើយ។ហើយការប្តឹង ពីភាគដើមបណ្តឹងកន្លងមកដែលបានភ្ជាប់រូបគាត់ជាមួយភរិយា និង ម្តាយក្មេកទៅស្ថាប័នអយ្យការនោះ ក៏ត្រូវបានអយ្យការ បានសម្រេចតម្កល់មិនចាត់ការរួចរាល់ទៅហើយដែរ។
លោកឧកញ៉ា ហែម ថេង បានមានប្រសាសន៍ថាៈ «នៅក្នុងអារម្មណ៍របស់ខ្ញុំ ជាកូនអ្នកក្រ១រូប ខ្ញុំសោកស្តាយណាស់ ដែលខ្ញុំបានខិតខំពុះពារ សព្វបែបសព្វយ៉ាង ដើម្បីឆ្ពោះទៅរកឥស្សរភាពនិងកិត្តិយស ដើម្បីសាងកេរ្តិ៍ឈ្មោះនោះ ទុកឲ្យវង្សត្រកូល ពីព្រោះពូជខ្ញុំនេះ គឺជាអ្នកក្រមិនមានអ្នកណាធ្វើបាន ការជួយសង្គមជួយជាតិវាឥតមាន។ អ៊ីចឹងខ្ញុំបានបណ្តុះគំនិតថាៈ បើខ្ញុំហើយមានវាសនា ទោះបីកម្រិតណាក៏ដោយ ខ្ញុំត្រូវលះបង់ សេចក្តីសុខផ្ទាល់ខ្លួន ដើម្បីជួយសង្គម ដើម្បីថ្នូរមកវិញ គឺដើម្បីយកកិត្តិយសទុកឲ្យកូន និង គ្រួសារតែប៉ុណ្តឹង។ នេះ គឺជាទិសដៅនិង គោលបំណងរបស់ខ្ញុំ»។
លោកបានបន្តថាៈ«ហើយអ្វីដែលខ្ញុំចង់បាននោះ គឺមួយជីវិតកាងារបម្រើរដ្ឋតាំពីឆ្នាំ ១៩៧៩នោះ រហូតមកទល់ថ្ងៃនេះ គឺខ្ញុំធ្វើបានទទួលលទ្ធផលល្អណាស់ បានជួយសង្គមជួយជាតិរាប់មិនអស់។ ខ្លួនឯងចាំមិនអស់ មានកាសែតល្អៗ ដែលកំពុងពេញនិយម នៅកម្ពុជា ជាង៥០០ ច្បាប់ ដែលខ្ញុំបានរក្សាទុក ដែលសរសេរអំពីអ្វី ដែលខ្ញុំ បានជួយជាតិជួយសង្គម។ និងមានថាសវីឌីអូ ជាច្រើន ដែលផ្សាយអំពីស្នាដៃ ខ្ញុំ ដែលខ្ញុំរក្សាទុកជាង ៣០០ ឌីស (Discs)។ ការរក្សាអភិរក្សទាំងនេះ ក្នុងបំណងតែមួយគឺ ពេលស្លាប់ គឺសុំឲ្យបើក និង ចាក់មើលពីស្នាដៃ និង សមិទ្ធិផលរបស់ខ្ញុំ ដែលខ្ញុំបានរក្សាទុក្ខ ជាភស្តុតាងនេះ»។ ខ្ញុំសែន សោកស្តាយៗ ណាស់ នេះ គឺជាសម្ពាធមួយមកលើគ្រួសារខ្ញុំទៅហើយ នៅក្នុងសង្គមកម្ពុជា បច្ចុប្បន្ន»។
ពាក់ព័ន្ធនឹងសំណុំរឿងខាងលើនេះ លោកឧកញ៉ា បានឲ្យដឹងថាៈ មូលហេតុដែលភាគីដើមបណ្តឹងក្នុងសំណុំរឿងនេះ បានព្យាយាមភ្ជាប់ ឈ្មោះលោកទៅក្នុងបណ្តឹងជាមួយភរិយានោះ គឺដោយសារតែមានអ្នករត់ការស៊ីភាគរយពីរឿងក្តី និង យកឥទ្ធិពលអ្នកអំណាច និងថ្នាក់ដឹកនាំ មកដាក់សម្ពាធលើគ្រួសាររបស់លោកក្នុងគោលបំណង ដើម្បីបំផ្លាញកេរ្តិ៍ឈ្មោះ កត្តិយស និង ទ្រព្យសម្បត្តិរបស់លោកឲ្យអស់ គ្មានសេសសល់អ្វី និងបំផ្លាញឲ្យដល់ឬសគល់តែម្តង ដើម្បីយកភាគរយពីរឿងក្តី និងបំផ្លាញអនាគតរបស់លោកតែម្តង។ ហើយបុគ្គលដែលបានចូលខ្លួនក្នុងការរត់ការស៊ីភាគរយរឿងក្តីនេះ មានឈ្មោះ ទី១ ឈ្មោះ មែន សុខ ដែលជាអ្នកបើកឡាន ជូនថ្នាក់ដឹកនាំ ទី២ ឈ្មោះ ទិត្យ សុខវណ្ណា និង ទី៣ ឈ្មោះ ឌី ចូច។ ក្រៅពីនេះក៏មានមន្ត្រីនគរបាលមួយចំនួន ដែលបម្រើការនៅក្នុងស្ថាប័នរបស់លោកដែលតែងតែមានចិត្តច្រណែនឈ្នានីស និងមានចិត្តឬស្យា ច្រណែននឹងការងារល្អ ស្នាដៃបម្រើជាតិនិងមុខតំណែងយសសក្តិរបស់លោកនោះ ក៏ជាអ្នកបោះដៃឲ្យផងដែរ។
មេធាវី កៅ ទី និងមេធាវី អឿន ស៊ុយ មេធាវីការពារក្តី លោកឧកញ៉ា ហែម ថេង។ រូបថត ប៊ុត រស្មីគង្គា
លោកឧកញ៉ាបានប្រសាសន៍ថាៈ« សូមបំភ្លឺថាៈ រឿងនេះ ខ្ញុំឥតមានពាក់ព័ន្ធទេ តែ រឿងនេះ ដោយសារតែគ្រួសារ មានការពាក់ព័ន្ធត្រូវតែដោះស្រាយតាមច្បាប់ហើយ។ អ៊ីចឹងគាត់យកលុយទៅ គាត់ឥតបានប្រគល់ឲ្យទៅភាគីចុងចម្លើយនៅទេ។ ដោយសារតែ ពួកគាត់ត្រូវទទួលភាគរយពីភាគីដើមបណ្តឹង។ អានេះ ដែលមិនប្រក្រតី។ គេ ហ៊ានធ្វើអ្វីៗ ទាំងអស់ គឺ ដើម្បីលុយ។ គេថា បើមិនដាក់ឈ្មោះខ្ញុំ វាមិនបានលុយ។ អ៊ីចឹង អយ្យការរកមិនឃើញ បានតម្កល់រឿងមិនចាត់ការ ហើយគេបន្តប្តឹងទៅសាលាឧទ្ទរណ៍ទៀត ហើយ ឧទ្ទរណ៍ ក៏បានដម្កល់មិនចាត់ការទៀត។ ខ្ញុំនិយាយនេះ គឺឥតមានប៉ះពាល់អ្នកណាទេ ក្រៅពីគូភាគីនិងអ្នកដែលបានលូកដៃនៅក្នុងរឿងនេះ។ រឿងខ្ញុំនេះ ត្រូវបានតុលាការដម្កល់មិនចាត់ការអស់ហើយ»។
លោកឧកញ៉ា បានឲ្យដឹងថាៈ ចំពោះសំណុំរឿងក្តីនេះ ភាគីដើមបណ្តឹង តែងតែប្តូរមេធាវី ដើម្បីបំភាន់ តុលាការ ពីព្រោះ មេធាវីដែលបានដឹងរឿងរ៉ាវពិតនោះ គេបន្ទាបខ្លួន។ ហើយមេធាវីថ្មីនោះ បានយកសែកCopy ដដែល ដើម្បីប្តឹងភរិយា និង ម្តាយក្មេកលោកទៅស្ថាប័នអយ្យការជាបន្តបន្ទាប់។
លោកឧកញ៉ា បន្តថា៖«ឥឡូវខ្ញុំចង់ដាក់សំណួរទី១ថាៈ អយ្យការតែ១ សំណុំរឿងដដែលៗ និង សែក Copy ដដែលហ្នឹង ហេតុ អ្វី ក៏ទទួលយកមកដោះស្រាយ? សែកលេខចុះតែ១ តែប្តូតែមេធាវីទេ ហេតុអ្វី ក៏យកសំណុំរឿងនេះ មកដាក់? និង ដោះស្រាយ? ពីព្រោះអង្គហេតុតែ។ ទី២ ដែលខ្ញុំប្តឹងថា មូលបង្កាច់កេរ្តិ៍ខ្ញុំនេះ ឲ្យបង្ហាញភស្តុតាង មកទល់ថ្ងៃនេះ មិនចាត់ការ។ ហើយឥឡូវនេះ កំណែទម្រង់រដ្ឋ កំពុងតែគិត ពីបញ្ហាហ្នឹង។ យ៉ាងម៉េច មូលហេតុអ្វី បានជាមិនចាត់ការ និង មានភាពយឺតយូរ? ទី៣ សំណុំរឿងបញ្ជូនមកចៅក្រមក្រោយនេះ គេមិនដាក់រូបខ្ញុំទេ។ គេដាក់ថា៖ ប្រពន្ធលោក ហែម ថេង។ អ៊ីចឹង ខ្ញុំសូមរកយុត្តិធម៌ឲ្យ និង ញែកឲ្យដាច់ រវាងអំពើល្អ និង អំពើអាក្រក់។ ហើយពិត យ៉ាងណានោះ មេធាវីខ្ញុំ គាត់បានដឹងឮអស់ហើយ ឯកសារនៅលើដៃ គាត់អស់ហើយ។ រឿងពិត ប្រាកដយ៉ាងណាៗនោះ សុំមើលសំណុំរឿង ពីមេធាវីរបស់ខ្ញុំទាំង២»។
ពាក់ព័ន្ធនឹងសម្តីរបស់លោកមេធាវី គួយ ធុនណា ដែលធ្លាប់មានប្រសាសន៍ប្រាប់សារព័ត៌មាន កន្លងមកថា«លោកឧកញ៉ាថែម ថែង ភរិយា និង ម្តាយក្មេក ត្រូវប្តឹងដោយកូនក្តីរបស់លោក៣នាក់ ជាប់ពាក់ពាក់នឹងការជំពាក់ប្រាក់មិនសង និង ចេញមូលប្បទានបត្រឥត សាច់ប្រាក់នោះ» លោកឧកញ៉ា ហែម ថេង មានបំភ្លឺថា៖« គាត់បានធ្វើខុសម្តងហើយ ម្តងទៀតៗ មកលើរូបខ្ញុំ។ តើសម្តីវាហួស បានអីជួស? បើគាត់ផ្សាយអ៊ីចឹង កាសែតហ្នឹង វាឮទៅដល់ម៉ាពិភពលោកនោះ ដល់អ្នកធំ ដល់អ្នកតូច ដែលខ្ញុំមិនបានប្រព្រឹត្ត មិនបានធ្វើទាល់តែសោះនោះ។ គាត់ត្រូវយកភស្តុតាងជាក់ស្តង កុំយកដីការក្សាការពារ មកធ្វើភស្តុតាង តែត្រូវរកសែកពិតប្រាកដ ដែលថា ខ្ញុំបានចេញនោះ ឬ ដែលថា ខ្ញុំបានផ្តិតមេដៃខ្ចីលុយនោះចេញមកនោះបានជាភស្តុតាំងផ្លូវច្បាប់រឹងមាំ? ហើយខ្ញុំ ក៏បានឲ្យមេធាវីរបស់ខ្ញុំ ទៅសួររឿងដីការក្សាការពារពីលោកចៅក្រមដែរ ហើយចៅក្រមទាំង២ គាត់ បានឲ្យខ្ញុំ ប្តឹងទៅក្រុមប្រឹក្សាចៅក្រមដើម្បីដោះស្រាយ ដើម្បីឲ្យអធិការកិច្ច ពិនិត្យសំណុំរឿងឡើងវិញ កុំឲ្យចេះតែធ្វើអ៊ីចឹងទៀត»។
លោកឧកញ៉ា មានប្រសាសន៍ថា៖«ខ្ញុំសុំឲ្យមេធាវី ឬ អ្នកដែលបកស្រាយរឿងនេះ មិនច្បាស់នោះ សូមឲ្យផ្អាកទៅ ទុកឲ្យខាងតុលាការលោកចាត់ការ វាប្រសើរជាង យើងជជែកគ្នា វាប៉ះពាល់ទៅ វានាំតែខុសនឹងផ្លូវច្បាប់។ ពីព្រោះ កិត្តិយស សាងបាន គ្រប់ៗគ្នា និងតែមិនអាចលក់ដូរបានទេ។ តែក្នុងករណីនេះ ខ្ញុំជឿជាក់ថា អំពើល្អរបស់ខ្ញុំ ពិតជាមិនអាចសាបសូន្យបានទេ។ អ្នកកសាងអំពើអាក្រក់ ពិតជាទទួលផលរបស់វា យូរ ឬ ឆាប់ពិត ជាទទួលផលទេ។ សូមឲ្យបញ្ជាប់ការបកស្រាយបញ្ហានេះ ទុកឲ្យតុលាការលោកចាត់ការ តាមច្បាប់»។
ពាក់ព័ន្ធនឹងនឹងសម្តីរបស់លោកមេធាវី គួយ ធុនណា ដែលបានប្រសាសន៍តាមភ្នំពេញប៉ុស្តិ៍នាពេលថ្មីនេះថា« គាត់ជាមនុស្សមិនចេះច្បាប់នោះ» លោកឧកញ៉ា ហែម ថែងបានប្រតិកម្មថា៖« ហេតុអ្វីបានគាត់ប្រើប្រាស់ពាក្យសម្តីថា៖ ខ្ញុំជាមនុស្សមិនចេះច្បាប់? ខ្ញុំសូមជម្រាបថា៖ រឿងដែលទៅសុំ អធិបញ្ជានេះ គឺមេធាវីរបស់ខ្ញុំ ដែលជាអ្នកច្បាប់ ជាអ្នកធ្វើទេ។ គាត់បានទៅជជែកជាមួយ តុលាការ ហើយគាត់ត្រូវបានតម្រូវឲ្យយ៉ាងណាៗនោះ គឺគាត់ជជែកគ្នា ហើយគាត់ គឺជាអ្នកធ្វើ ក្នុងផលប្រយោជន៍ ដើម្បីការពារកូនក្តីរបស់គាត់។ ហេតុអ្វី បានជាគាត់និយាយថា៖ ខ្ញុំគឺជាមនុស្សមិនចេះច្បាប់ ? ខ្ញុំសូមជម្រាបទៅគាត់វិញថាៈ ខ្ញុំឥតចេះច្បាប់នេះ ខ្ញុំធ្វើការជាង៣០ឆ្នាំនេះ ជួយជាតិបានច្រើនណាស់។ បង្ក្រាបបទល្មើស បានរាប់ម៊ឺនករណី។ សួរថាៈ គាត់អ្នកចេះច្បាប់នោះ គាត់ធ្វើអីបានខ្លះ ? ហើយខ្ញុំយល់ឃើញថា ពាក្យមួយម៉ាត់ដែលគាត់និយាយខាងលើនេះ វាប៉ះពាល់ធ្ងន់ណាស់ ទី១ ឯកឧត្តម អ៊ុក សាវុធ បានចារលើលិខិតនោះ អ៊ីចឹងឯកឧត្តម អ៊ុក សាវុធ ចេះច្បាប់ ឬ អត់ ? បើ មេធាវីរបស់ខ្ញុំ ធ្វើតាម ការណែនាំ របស់លោកស្រី ស៊ឺ វណ្ណនី ឲ្យសរសេរទៅកាន់ឯកឧត្តម អ៊ុក សាវុធនោះ អ៊ីចឹងសួរថា លោកស្រី ស៊ឺ វណ្ណនីចេះ ច្បាប់ឬអត់ ? ឥឡូវនេះ វាមករឿងថ្មីទៀត គាត់ថា៖ ខ្ញុំមិនគួររាជរដ្ឋាភិបាល យកមក ធ្វើការទេ គួរឲ្យខ្មាស់ណាស់។ មួយម៉ាត់នេះធ្ងន់ណាស់។ តើគាត់ចង់ថា ឲ្យខ្ញុំ ឬ ចង់ថាឲ្យនរណា? អធិបញ្ជានេះ ត្រូវបានចារដោយ ឯកឧត្តម អ៊ុក សាវុធ អ៊ីចឹងឯកឧត្តម អ៊ុក សាវុធ ចេះ ច្បាប់ឬ អត់? មានន័យថា៖ គាត់ដៀលដល់ឯកឧត្តម អ៊ុក សាវុធ ថាមិនចេញច្បាប់!! មានន័យថា៖ អ្នកណាចារលើលិខិតហ្នឹង និង ស៊ីញ៉េលើហ្នឹងគឺ អត់ចេះច្បាប់ទាំងអស់។ ដូច្នេះ ការនិយាយ របស់គាត់នេះ វាប៉ះទាំងអស់។ តាមពិតអ្នកឈឺក្បាល គឺអ្នកដែលចារ អ្នកដែលស៊ីញ៉េឯណោះទេ ខ្ញុំ ឥតប៉ះពាល់ទេ ពីព្រោះវាមិនមែនជាគំនិតរបស់ខ្ញុំ ពីព្រោះខ្ញុំមិនមែន ជាមន្ត្រីតុលាការ មិនមែន ជាមេធាវី និង មិនមែនជាអគ្គព្រះរាជអាជ្ញា។ ដូច្នេះ សុំឲ្យពិនិត្យខ្លឹមសារ ដែលគាត់និយាយនៅក្នុង កាសែតភ្នំពេញ ប៉ុស្តិ៍ចុះថ្ងៃទី២ ខែធ្នូ ២០១៣នេះ ឲ្យបានច្បាស់ តើនរណាគួរអៀនខ្មាស ហើយនរណាជាអ្នកខុស នរណាជាអ្នកត្រូវ?។ ខ្ញុំបានថតចម្លងឯកសារនេះ ដាក់បញ្ចូលក្នុងសំណុំរឿងរបស់ខ្ញុំ ផ្ញើទៅកាន់លោកស្រី ស៊ឺ វណ្ណនី រួលរាល់ហើយ»៕
លោកបានបន្ថែមថា៖« ឥឡូវនេះ ការប្រឹងបំផ្លាញកិត្តិយសរបស់ខ្ញុំ ដល់ទីបំផុត តើអ្នកណា ជាអ្នកទទួលខុសត្រូវ និង សងមកខ្ញុំវិញ? បើរកមិនឃើញខុសត្រូវ តើនរណា ជាអ្នកសងចំពោះការខូចខាត និង ការប៉ះពាល់ដល់កេរ្តិ៍ឈ្មោះ និង កិត្តិយសរបស់ខ្ញុំនេះ» ។
ពាក់ព័ន្ធនឹងករណីខាងលើនេះដែរ លោកអឿន ស៊ុយ មេធាវីការពារក្តី លោកឧកញ៉ា ហែម ថេង បានបំភ្លឺថា៖«ឯកឧត្តមហែម ថេង គឺគាត់ឥតពាក់ព័ន្ធនឹង ករណី ការខ្ចីលុយរបស់ម្ចាស់បំណុលទាំង៣នាក់ ដូចលោកមេធាវីគួយ ធុនណា បានលើកយកមកនិយាយតាមដីការក្សាការពារនោះទេ។ លោកមេធាវីគួយ ធុនណា បានអះអាងថា៖ ឯកឧត្តមបានខ្ចីប្រាក់កូនក្តីគាត់ រហូតដល់ជាង ៧០ ម៉ឺនដុល្លារអាមេរិក ដែលមិនបានសង តែតាមពិតគឺគាត់ឥតបានប៉ះពាល់ ឬ បានខ្ចីលុយម្តងណាឡើយ ឬ សូម្បីកិច្ចសន្យាក៏គ្មាន ចេញមូលប្បបត្រ ក៏គ្មានដែរ។ គឺគាត់មិនដែលមានពាក់ព័ន្ធនឹងបញ្ហាខ្ចីប្រាក់នោះទេ។ ហើយម្យ៉ាងវិញទៀត ការអះអាងរបស់មេធាវីថា គាត់បានខ្ចីប្រាក់របស់ដើមចោទនោះ ខ្ញុំសូមឲ្យគាត់បង្ហាញភស្តុតាងមក ដែលជាឯកសារ ឬ មានលិខិតអីមួយ ដែលបញ្ជាក់ថា គាត់បានខ្ចី ជាលាយលក្ខណ៍អក្សរ ដូចជា កិច្ចសន្យា មូលប្បទានបត្រ ដើម្បីឲ្យខាងសារព័ត៌មានស្វែងរកការពិត ជួយបកស្រាយមករឿងនេះ និង ផ្សព្វផ្សាយ ឲ្យបានជាក់ស្តែង។ ហើយវិញម្យ៉ាងទៀត ប្រសិនបើក្នុងករណីដែល មេធាវីចេះតែបំភ្លើសការពិតនោះ និយាយដោយគ្មាន មូលដ្ឋានច្បាស់លាស់ គ្មានភស្តុតាង គ្មានឯកសារនោះ ខ្ញុំសុំតុលាការចាត់ការតាមផ្លូវច្បាប់ហើយ។ រឿងក្តីនេះ សព្វថ្ងៃនេះ តុលាការកំពុងតែចាត់ការតាមផ្លូវច្បាប់។ ក្នុងបណ្តឹងនេះ កូនក្តី ខ្ញុំ បានទាមទារជម្ងឺចិត្ត ចំនួន ៥០ ០០០ដុល្លារអាមេរិក។ ខ្ញុំសង្ឃឹមថា៖ តុលាការនឹងលើកយកសំណុំរឿងនេះ មកធ្វើការជំនុំជម្រះ នាពេលឆាប់ៗខាងមុខនេះ។
ចំណែកឯ លោកមេធាវី កៅ ទីបានបន្ថែមថា៖ ចំពោះករណីដែលភាគីដើមចោទទាំង៣នាក់ ទី១ ឈ្មោះ ហេង សុខម៉េ ទី២ ឈ្មោះ ស្រ៊ុន គឺមឃុន និង ទី៣ ឈ្មោះ យឹម ប្រាក់សៀន បានចោទប្រកាន់ថាៈ លោកឧកញ៉ា ហែម ថែង បានជំពាក់ប្រាក់ និងចេញសែកឥតលុយនោះ ត្រូវ លោកឧកញ៉ាប្តឹងមកវិញពីបទ« បរិហារកេរ្តិ៍ » ទៅសាលាដំបូងរាជធានីភ្នំពេញ ហើយឥឡូវនេះ ត្រូវបានតុលាការចោទប្រកាន់ជាផ្លូវការដែរ។ សំណុំរឿងនេះ ឥឡូវនេះ ក៏កំពុងតែ ស្ថិតនៅក្នងដៃ តុលាការនៅឡើយដែរ៕
ប្រភពពី ភ្នំពេញប៉ុស្តិ៍
