ក្រុមហ៊ុនកំពុងកាប់ដើមជ័រទឹកជនជាតិ
រតនគិរីៈ ដើមជ័រទឹក ឬច្បោះប្រមាណជាង ១ ពាន់ដើមក្នុងតំបន់អភិរក្សសត្វព្រៃ ក្នុងស្រុក លំផាត់ ខេត្ត រតនគិរី ដែលមានជនជាតិភាគតិចឡាវជាង ១០០ គ្រួសារពឹងអាស្រ័យលើអស់រយៈពេលជាង ២០ឆ្នាំ មកហើយនោះ កំពុងប្រឈមនឹងការកាប់បំផ្លាញ។
អ្នកភូមិម្នាក់ឈ្មោះ ដាំ លាន បានថ្លែងថា សមាជិកសហគមន៍ភាគតិចឡាវ ៩នាក់ រួមទាំងលោកផង បានចុះល្បាតព្រៃនេះកាលពីម្សិលមិញប្រទះឃើញកម្មករ ១៩នាក់ កំពុងអាររំលំឈើជ័រ ៩ ដើមលើគ្នា។ ពួកគេបានរត់គេចពេលឃើញពួកគាត់ ប៉ុន្តែក្រុមល្បាតបានព្យាយាមរឹបអូសយកបានម៉ាស៊ីន ២ គ្រឿង។
លោក លាន និយាយថា៖ «អ្នកទាំងនោះអះអាងថា ពួកគេកំពុងកាប់ដើមជ័រទឹកនេះ ឲ្យក្រុមហ៊ុនមួយ»។
លោក ដាំ លាន បញ្ជាក់ថា ប្រជាជនក្នុងភូមិទទួលផលជ័រពីដើមឈើទាំងនេះជាង ២០ឆ្នាំ មកហើយតែឥឡូវដើមឈើទាំងនេះត្រូវគេកាប់ម្តងមួយៗ។ អ្នកភូមិម្នាក់ទៀត បានបន្តថា គាត់បានទទួលប្រាក់កម្រៃ ៨០ ម៉ឺនរៀល ពីជ័រឈើរបស់គាត់ចំនួន ៥ ដើម។
គាត់ត្អូញត្អែរថា៖ «ជីវិតពួកយើងពឹងផ្អែកលើដើមជ័រទឹកទាំងនេះ។ យើងបារម្ភថា តើយើងនឹងរស់នៅដូចម្តេចទៅនៅពេលបាត់បង់ដើមឈើទាំងនេះ»។ គាត់បន្តថា មួយគ្រួសារៗមានដើមឈើជ័រពី ២០ ទៅ ៥០ ដើម ហើយតែងយកជ័របានរៀងរាល់សប្តាហ៍។ ដើមឈើ ២០ ដើមផ្តល់ជ័របាន ៣០ លីត្រ ហើយវាអាចលក់បានប្រាក់ចំនួន ៥ ម៉ឺនរៀល។
ដើមឈើ ១ ដើមៗ មានកម្ពស់ពី ១៥ ទៅ ២០ ម៉ែត្រនិងទំហំពី ៥០ សង់ទីម៉ែត្រទៅ ១ ម៉ែត្រ។
លោក ដាំ លាន បានអះអាងដែរថា ដើម្បីកាប់ឈើនេះអ្នកកាប់ឈើម្នាក់ត្រូវចំណាយប្រាក់ ៤០ ម៉ឺនរៀល ក្នុង ១ ខែ សម្រាប់ថ្លៃរណារបង់ឲ្យមន្រ្តីតំបន់អភិរក្សសត្វព្រៃ និង ៤០ ម៉ឺនរៀលទៀតសម្រាប់ថ្លៃឡានដឹកឈើនោះ។
អ្នកភូមិបានអំពាវនាវឲ្យអាជ្ញាធរអន្តរាគមន៍ដើម្បីបញ្ឈប់ការកាប់ឈើជ័រគាត់ទាំងនេះ។
លោក សុវណ្ណ ប៊ុនថៃ ជំនួយការនៅអង្គការ អាដហុក ប្រចាំខេត្ត ដែលចុះទៅព្រៃនេះជាមួយសហគមន៍បានប្រាប់ថា ដីព្រៃនេះត្រូវបានផ្តល់ទៅឲ្យក្រុមហ៊ុន Daun Penh Agrico ដែលគេកំពុងតែឈូសឆាយព្រៃដែលសហគមន៍រស់អាស្រ័យជាច្រើនឆ្នាំមកហើយ។
លោក ថន សារ៉ាត អនុប្រធានរដ្ឋបាល ផែនការ និងហិរញ្ញវត្ថុ នៃក្រសួង កសិកម្ម បានថ្លែងថា ច្បាប់ព្រៃឈើមិនអនុញ្ញាតឲ្យនរណាកាប់ដើមជ័រទេ ពីព្រោះវាមានប្រយោជន៍ច្រើនសម្រាប់ជីវភាពប្រជាជននិង បរិស្ថាន។
លោកបន្តថា៖ «វាមិនត្រូវបានអនុញ្ញាតឲ្យកាប់ឈើជ័រទេ បើទោះជាវាស្ថិតនៅក្នុងសម្បទានដីសេដ្ឋកិច្ចក៏ដោយ។ ដើមឈើប្រភេទនេះធំ វាផលិតជ័រសម្រាប់ប្រជាជនរបស់យើង»។
លោកបន្តថា៖ «ដូច្នេះហេតុអ្វីយើងកាប់វា ហើយគ្រាន់តែដាំកៅស៊ូ?»៕
ប្រភពពី ភ្នំពេញ ប៉ុស្តិ៍
