បទអត្ថាធិប្បាយ ៖ មហាសេដ្ឋី ចិត្តចោរ !
ពាក្យមហាសេដ្ឋី បើយោងតាម សៀវភៅវចនានុក្រម របស់សម្ដេចព្រះសង្ឃរាជ ជួន ណាត ពន្យល់ថា គឺជាអ្នកមានទ្រព្យធនច្រើន ដែលទទួលបានការត្រាសបង្គាប់ ទទួលស្គាល់ពីព្រះមហាក្សត្រ ។ បច្ចុប្បន្ន គេស្គាល់ពាក្យ ឧញ៉ា ឬអ្នកឧកញ៉ា ដែលជំនួសឲ្យ មហាសេដ្ឋី ។
ដើម្បីបានងារជាឧញ៉ា ដែលទទួលស្គាល់ដោយព្រះមហាក្សត្រ បើតាមដឹងថា ត្រូវចំណាយលុយយ៉ាងហោចណាស់ ១០ ម៉ឺនដុល្លារ ជាប្រយោជន៏សម្រាប់សង្គម ។ អ្នកដែលទទួលបានឈ្មោះ ឬងារ ជាឧកញ៉ានេះ មិនត្រឹមតែត្រូវបានពលរដ្ឋខ្មែរក្រីក្រ កោតសរសើរ ជាលោក ឧញ៉ាៗ នោះទេ , លើសពីនេះ ពួកគេក៏ទទួលបាន អត្ថិភាពផ្សេងៗពីរដ្ឋផងដែរ ។
សម្រាប់កម្ពុជា ជាប្រទេសតូច និងក្រីក្រនេះ ត្រូវបានគេកត់សម្គាល់ឃើញថា មានក្រុមមនុស្ស ដែលមានងារជាឧញ៉ាយ៉ាងក្រាសក្រែល ដែលតាមការគិត ពលរដ្ឋខ្មែរដែលមានប្រមាណជាង១០លាននាក់ គ្រាន់តែជ្រុះកម្ទេចកម្ទី ជាគ្រាប់ស្រូវ គ្រាប់ល្ងរ នៃពួកឧញ៉ាទាំងនោះ ក៏អាចចិញ្ចឹមជីវិត រស់ស្រួលបានដែរ ។ តែហាក់ផ្ទុយខុស ពីនេះទៅវិញ ។ ឧកញ៉ាកាន់តែច្រើន ជាតិកាន់តែអន្តរាយ , ពលរដ្ឋខ្មែរកាន់តែរងទឹកភ្នែក ! ។
កន្លងទៅមានការរកឃើញថា ដើម្បីបានងារជាឧកញ៉ា ពួកអ្នកត្រេកត្រអាល នឹងមុខមាត់មិនសូវមានការអៀនខ្មាស់មូយចំនួន បានធ្វើសកម្មភាព បោកប្រាសប្រជាពលរដ្ឋ អង្គការអន្តរជាតិក្រៅរដ្ឋាភិបាលរហូតធ្លាក់ដល់បោកព្រះសង្ឃក្នុងវត្ត ឲ្យផ្ដិតមេដៃ ទទួលស្គាល់សមិទ្ធិផលនានា ថា កើតឡើងក្រោមប្រាក់របស់ខ្លួន ។ តាមរបៀបឆក់កណ្តៀតនេះ ក៏ធ្វើឲ្យពួកគេទទួលបានងារ ជាឧញ៉ាយ៉ាងរំភើយ ។ នេះជាដើមចមមួយ ដែលរត់ទៅរកភាពអាម៉ាសទាំងដុល របស់ប្រទេស ។
លើសពីនេះទៀត អ្វីដែលទាំងភ្នែកជាតិ និងអន្តរជាតិ មើលពីជ្រុងណាក៏ឃើញដែរនោះ គឺភាពរងគ្រោះរបស់ប្រទេស និងពលរដ្ឋដោយសារពួកឧញ៉ា ។ ប្រជាពលរដ្ឋខ្មែរទន់ខ្សោយ រាប់ចាប់តាំងពីកណ្ដាលទីក្រុង ដែលជាបេះដូងរបស់ប្រទេស រហូតដល់តំបន់ចុងកាត់មាត់ញក សុទ្ធសឹងតែទទួលផលប៉ះពាល់ដោយី សារការបាត់បង់ដីធ្លី ផ្ទះសម្បែង ឬធ្លាក់ខ្លួនជាប់គុកច្រវ៉ាក់ បើសិនជាជំទាស់នឹងបំណងរបស់ពួកឧញ៉ា ។ មានឧញ៉ាមួយចំនួនបានក្លាយខ្លួនជាឧក្រិដ្ឋជនជួញដូរគ្រឿងញៀន ហើយខ្លះក្លាយជាអ្នកបាញ់បោះសេរី កាចសាហាវយង់ឃ្នង គួរឲ្យខ្ពើមរអើម ។ ហើយកាលពីពេលថ្មីៗនេះមានសេចក្ដីរាយការណ៏ថា តាមរយៈការឃុបឃិតគ្នា ជាមួយមន្ត្រីខិលខូចក្នុងរដ្ឋាភិបាលបាន ធ្វើក្រុមហ៊ុនរបស់ឧញ៉ាមួយ មានលទ្ធភាព ច្បាមយកដីព្រៃរដ្ឋ រាប់ម៉ឺនហិកតា ហើយបានកាប់បំផ្លាញព្រៃឈើយ៉ាងវិនាស យកទៅលក់ឲ្យប្រទេសជិតខាង ។ ដែលឧញ៉ាប្រភេទនេះ គេហៅថា ឧញ៉ា ចោរ ឬ ចោរជាឧញ៉ា ? ៕
ប្រភពពី Free Press Magazine
