ស្ត្រីមានផ្ទៃពោះ៨ខែ ផឹកថ្នាំពុលសម្លាប់ខ្លួន ដោយមិនទាន់ដឹងមូលហេតុ
ខេត្តពោធិ៍សាត់ ៖ ស្ត្រីមានផ្ទៃពោះ៨ខែម្នាក់បានផឹកថ្នាំពុលសម្លាប់ខ្លួន ដោយមិនទាន់ដឹងមូលហេតុ ដែលករណីនេះកើតឡើងកាលពីវេលាម៉ោង៣រសៀលថ្ងៃទី០៩ តុលា ២០១៣ ស្ថិតក្នុងភូមិអូរថ្កូវ សង្កាត់រលាប ក្រុងពោធិ៍សាត់ ។
លោកអនុសេនីយ៍ទោ ឡែន គីមឈាង នាយប៉ុស្តិ៍រដ្ឋបាលរលាប បានឱ្យដឹងថា ស្ត្រីដែលផឹកថ្នាំពុលធ្វើអត្តឃាតនោះ ឈ្មោះជា សុធា អាយុ២៧ឆ្នាំ មានកូនប្រុសស្រី០២នាក់ និងកំពុងមានផ្ទៃពោះ០៨ខែថែមទៀត ។ ស្ត្រីរូបនោះបានផឹកថ្នាំពុលបណ្តាលឱ្យស្លាប់នៅលើផ្ទះ ដោយមិនដឹងមូលហេតុច្បាស់លាស់ ហើយសមត្ថកិច្ចរកឃើញថ្នាំកណ្តៀរនៅក្បែរសព ។
បុរសជាប្តីឈ្មោះឃួន សុខា អាយុ២៨ឆ្នាំ បានរៀបរាប់ប្រាប់ថា ប្តីប្រពន្ឋគាត់បានរៀបការនឹងគ្នា០៥ឆ្នាំមកហើយ មានកូនប្រុស ស្រី០២នាក់ និងកំពុងមានផ្ទៃពោះ៨ខែទៀត ។ ក្នុងការរស់នៅតែងតែមានការឈ្លោះគ្នាបន្តិចបន្តិច ដោយសារភាពក្រីក្រ និងពេលផឹកស្រាស្រវឹងម្តងៗ ប៉ុន្តែមិនដែលប្រើអំពើហិង្សាវាយតបគ្នាធ្ងន់ធ្ងរទេ ។ នៅថ្ងៃកើតហេតុ ខ្លួនមិននៅផ្ទះទេ លុះពេលត្រឡប់មកវិញស្រាប់តែឃើញប្រពន្ឋដេកស្លាប់តេម្តង ៕
