យុវសិស្សម្នាក់បើកម៉ូតូចុះ ពីលើស្ពានអាកាសក្បាលថ្នល់ ត្រូវរថយន្តក្រឡុកស៊ីម៉ងតិ៍កិនស្លាប់
រាជធានីភ្នំពេញ ៖ យុវសិស្សម្នាក់បានត្រូវរថយន្តក្រឡុកស៊ីម៉ងតិ៍កិនស្លាប់នៅនឹងកន្លែង ខណៈជិះម៉ូតូស្គូពី ពណ៌ខ្មៅលាយក្រហម ពាក់ស្លាកលេខភ្នំពេញ ១AQ 1620 ចុះពីលើស្ពានអាកាសក្បាលថ្នល់ មិនដឹងជាយ៉ាងម៉េចក៏ត្រូវរថយន្តកិនតែម្តង ។
ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលារសៀលថ្ងៃទី១២ តុលា ២០១៣ នៅលើកំណាត់ផ្លូវជាតិលេខ២ ស្ថិតក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។
យុវសិស្សរងគ្រោះឈ្មោះលី សុខហេង អាយុ១៧ឆ្នាំ ជាសិស្សវិទ្យាល័យជាស៊ីមបឹងកេងកង មានទីលំនៅសង្កាត់ទន្លេបាសាក់ ខណ្ឌចំការមន ចំណែកអ្នកបើករថយន្ត ក្រោយពីកើតហេតុរត់គេចបាត់ ៕
