លួចម៉ូតូគេបាន សម្រេចជិះរត់គេចខ្លួន ជ្រុលទៅបុកឡាន ដឹកខ្សាច់ប្រកាច់ស្លាប់ភ្លាមៗ
ខេត្តបាត់ដំបង ៖ យុវជន២នាក់បានស្លាប់បាត់បង់ជីវិតយ៉ាងអាណោចអាធ័ម បន្ទាប់ពីពួកគេបានធ្វើសកម្មភាពលួចម៉ូតូ មួយគ្រឿង ហើយជិះរត់គេចខ្លួន ប៉ុន្តែជាអកុសលបានជ្រុលទៅបុករថយន្តដឹកខ្សាច់ពេញ ទំហឹង នៅតាមបណ្តោយផ្លូវជាតិលេខ៥ ត្រង់ចំណុចភូមិអូរគ្រាត ឃុំគារ ស្រុកមោងប្ញស្សី កាលពីវេលាម៉ោង១និង១៤នាទីរសៀល ថ្ងៃទី២០ ខែកញ្ញា ឆ្នាំ២០១៣។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនរងគ្រោះទាំង២នាក់ខាងលើនេះមានឈ្មោះ ហុង ឈឿន ហៅក្តិប អាយុ២៣ឆ្នាំ រស់នៅភូមិដូនទ្រី ឃុំជ្រៃ ស្រុកមោងប្ញស្សី និងម្នាក់ទៀតមានឈ្មោះ ឡាយ បារាំង ភេទប្រុស អាយុ២៩ឆ្នាំ។ ចំណែកបុរសដែលជាម្ចាស់ម៉ូតូ មានឈ្មោះ ហុង សុវណ្ណ អាយុ៤៦ឆ្នាំ ។
ប្រភពដដែលបានបន្តឲ្យដឹងថា មុនពេលកើតហេតុ ជនរងគ្រោះទាំង២នាក់បានធ្វើសកម្មលួចយកម៉ូតូមួយគ្រឿងម៉ាក ស្មាស់វី ពណ៌ក្រហម ពាក់ស្លាកលេខភ្នំពេញ១BL-១៤៦០ ចេញពីចំណុចម្តុំផ្សារមោងប្ញស្សី ខណៈដែលម្ចាស់គេកំពុងតែដេកលក់។ បន្ទាប់ពីលួចបានហើយ ពួកគេបានជិះម៉ូតូបំណងគេចខ្លួន ប៉ុន្តែខណៈពេលជិះមកដល់កន្លែងកើតហេតុ ស្រាប់តែជនរងគ្រោះបានជិះម៉ូតូជ្រុលទៅបុករថយន្តដឹកខ្សាច់មួយគ្រឿង បណ្តាលឲ្យដួលប្រកាច់ស្លាប់ភ្លាមៗនៅកន្លែងកើតហេតុ។
បន្ទាប់ពីកើតហេតុ កម្លាំងសមត្ថកិច្ចបានចុះទៅអន្តរាគមន៍ និងបានទំនាក់ទំនងហៅសាច់ញាតិជនរងគ្រោះ មកទទួលយកសាកសពយកទៅធ្វើបុណ្យតាមប្រពៃណី។ ចំណែកម៉ូតូ ត្រូវបានសមត្ថយកទៅរក្សាទុកជាបណ្តោះអាសន្ន ដើម្បីរង់ចាំឲ្យម្ចាស់គេយកឯកសារបញ្ជាក់ មកយកម៉ូតូត្រឡប់ទៅវិញ៕
ប្រភពព័ត៌មានពី៖ វត្តភ្នំ
