ភ្នំពេញៈ បុរសវ័យចំណាស់ម្នាក់ ត្រូវបានគេប្រទះឃើញ ដេកស្លាប់នៅកណ្តាលវាលស្រែ យ៉ាង អាណោចអាធ័មបំផុត ដោយមានស្នាមរបួសលើថ្ងាស និងបែកភ្នែក ប្រជាពលរដ្ឋនៅកន្លែងកើត ហេតុសន្និដ្ឋានថា ទំនងជាចោរប្លន់យកទ្រព្យសម្បត្តិ ប៉ុន្តែសមត្ថកិច្ចមូលដ្ឋាន បាននិយាយថា ករណី នេះមិនទាន់អាចសន្និដ្ឋាន ថាជាករណីអីបាននៅឡើយ ពេលនេះកំពុងតែស្រាវជ្រាវ ហេតុការណ៍ ប្រទះឃើញនេះ កើតឡើងកាលពីវេលា ម៉ោង៧និង១៥នាទី ព្រឹកថ្ងៃទី២៣ ខែកញ្ញា ឆ្នាំ២០១៣ ស្ថិតនៅក្នុងវាស្រែភូមិវិមានទ្រង់ សង្កាត់ក្រាំងធ្នង់ ខណ្ឌពោធិ៍សែនជ័យ ។

នគរបាលមូលដ្ឋាន បានឲ្យដឹងថា សពពុំត្រូវបាន គេស្គាល់អត្តសញ្ញាណនោះទេ មានអាយុ ប្រហែលជាង ៤០ឆ្នាំ មានកំពស់ប្រហែល១,៦០ ម៉ែត្រ ស្លៀកខោជើងវែង ពណ៌ខ្មៅ ពាក់អាវពីរជាន់ យឺតខាងក្នុងពណ៌ត្រេអ៊ី និងអាវខាងក្រៅ ពណ៌ត្រាវ ដៃវែង មានស្នាមរបួសលើចិញ្ចើម និងបែកភ្នែក ហើយនៅក្បែរសពនោះ គេឃើញមានពូថៅមួយ និងស្បែកជើងមួករប៉ាត់រប៉ាយ ។

ប្រជាពលរដ្ឋ ឃើញហេតុការណ៍សន្និដ្ឋានថា ទំនងជាអ្នករត់ម៉ូតូឌុប ហើយត្រូវក្រុមចោរប្លន់សម្លាប់ យកម៉ូតូ ទៅបាត់ ប៉ុន្តែទាក់ទិននិងករណីនេះដែរ នគរបាលមូលដ្ឋាន បានឲ្យដឹងថា ករណីខាងនេះ លោកមិនទាន់អាចសន្និដ្ឋានបាន ថាជាករណីអ្វីមួយនោះទេ កម្លាំងរបស់លោក កំពុងតែធ្វើការស្រាវ ជ្រាវដើម្បីស្វែងមូលហេតុពិត ។ ម្យ៉ាងវិញទៀត សពអាចគេសម្លាប់មកពីណា រួចហើយយកមក ទម្លាក់ចោល ក៏ថាបាន ដូច្នេះមិនដឹងថា ជាករណីប្លន់ ឬក៏ឃាត់កម្មនោះទេ ៕ផ្តល់សិទ្ទិដោយ៖​ looking today.com