លោក ឈាង វុន បញ្ជាក់ពីការលាលែង បេក្ខភាពតំណាងរាស្ត្រ របស់ គណបក្ស ប្រជាជនកម្ពុជា
ពាក់ព័ន្ធនឹងបេក្ខជនជាប់ឆ្នោតជាច្រើនរូបរបស់គណបក្សប្រជាជនកម្ពុជា ដែលកាន់តំណែងជារដ្ឋមន្ត្រីបច្ចុប្បន្ន បានលាលែងពីតួនាទីតំណាងរាស្ត្រនោះ ត្រូវបានមន្ត្រីជាន់ខ្ពស់ គណបក្សប្រជាជនកម្ពុជា បញ្ជាក់ថា គណបក្សប្រជាជនកម្ពុជាកំពុងធ្វើកំណែទម្រង់ស៊ីជម្រៅ ដើម្បីឆ្លើយតបទៅនឹងការចង់បានរបស់អ្នកបោះឆ្នោត។
បើតាមបញ្ជីឈ្មោះនៅគណៈកម្មាធិការជាតិរៀបចំការបោះឆ្នោត បានបង្ហាញថា បេក្ខជនដែលជាប់ឆ្នោតជាតំណាងរាស្ត្ររបស់គណបក្សប្រជាជនកម្ពុជា មានតំណាងរាស្ត្រជាច្រើនរូប ដែលកាន់តំណែងជារដ្ឋមន្ត្រីបច្ចុប្បន្ន បានលាលែងពីតួនាទីតំណាងរាស្ត្រនោះ រួមមាន ៖ លោក វង សូត លោក ខៀវ កាញារីទ្ធ លោកជា សុផារា លោក លឹម គានហោ លោក អ៊ិត សំហេង និងលោក ចម ប្រសិទ្ឋិ ជាដើម។ លោកជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភា ក៏បានលាលែងដែរ។
ប៉ុន្តែទាក់ទឹងនឹងការលាលែងនោះ គេក៏នៅមិនទាន់បានដឹងទេថា ពួកគេនឹងនៅកាន់តំណែងរដ្ឋមន្ត្រីបន្តទៀត ឬយ៉ាងណានោះដែរ។
លោក ឈាង វុន មន្ត្រីជាន់ខ្ពស់របស់គណបក្សប្រជាជនកម្ពុជាបានធ្វើការបកស្រាយបញ្ជាក់ ជុំវិញនឹងការលាលែង នោះ ថា គណបក្សប្រជាជនកម្ពុជាកំពុងធ្វើកំណែទម្រង់ស៊ីជម្រៅ ដើម្បីឆ្លើយតបទៅនឹងការចង់បានរបស់អ្នកបោះឆ្នោត។ ការចង់បានរបស់អ្នកបោះឆ្នោតដែលបានសំដែងចេញ តាមរយៈការបោះឆ្នោត នាថ្ងៃទី២៨ ខែកក្កដាកន្លងទៅនេះ។ លោក ឈាង វុនក៏បានបញ្ជាក់ផងដែរអំពីការដាក់បញ្ចូលកម្លាំងយុវជនដែលទំពាំងស្នងប្ញស្សីទៅក្នុងម៉ាស៊ីនការងាររបស់គណបក្សប្រជាជនកម្ពុជា។
ជុំវិញបព្ហានេះលោក កែវ ផល្លា ប្រធាននាយកដ្ឋានសេវាកម្មច្បាប់ និងវិវាទកម្មនៃគណៈកម្មាធិការជាតិរៀបចំការបោះឆ្នោត បានអះអាងថា មានការលាលែងច្រើននៃបេក្ខជនជាប់ឆ្នោតជាតំណាងរាស្ត្ររបស់គណបក្សប្រជាជនកម្ពុជាមែន ហើយការលាលែងនេះត្រូវបានអនុញ្ញាតដោយនីតិវិធី ដែលគេអាចធ្វើបាន នៅមុនការប្រកាសលទ្ធផលផ្លូវការនៃការបោះឆ្នោត៕
ប្រភពពី Free Press Magazine
