នារីៗប្រយ័ត្ន គេចាត់ការបាន សម្រេចនៅថ្ងៃដំបូង
ស្រីៗពេលត្រូវបុរសណាម្នាក់ណាត់ជួបលើកដំបូងក្នុងន័យស្នេហា គឺជាពេលដែលត្រូវប្រុងប្រយ័ត្នខ្ពស់បំផុត។ បើហ៊ានតែធ្វេសប្រហែសតែបន្តិច ពួកគេអាចនឹងត្រូវបុរសៗស៊ីខ្សែលើ កេងចំណេញលើខ្លួនប្រាណ អ្នកខ្លះអាចនឹងបាត់បង់ភាពបរិសុទ្ធ ឬជួបរឿងអាក្រក់ផ្សេងៗទៀតផង។ តើមានវិធីសាស្ត្រយ៉ាងណាដើម្បីរួចពីការដើរខ្សែលើរបស់មនុស្សប្រុស? ខាងក្រោមនេះគឺជាការចែករំលែកគន្លឹះការពារខ្លួនផ្សេងៗគ្នារបស់នារី៤រូប។
គរុសិស្សស្រី តុង សុធីតា បានលើកឡើងដោយមានទំនុកចិត្តថា ទោះណាត់ពេលថ្ងៃក៏ដោយក៏ត្រូវប្រយ័ត្នដែរ ព្រោះគេអាចដាក់ថ្នាំក្នុងចំណីឬទឹក។ សុធីតា បាននិយាយទាំងម៉ឹងម៉ាត់ទៀតថា បើមនុស្សទើបស្គាល់គ្នាថ្មីៗទៀត ត្រូវតែប្រុងប្រយ័ត្នគុណនឹងពីរ យល់ល្អប្រាប់មិត្តភ័ក្តិជិតស្និតពីកន្លែង និងម៉ោងត្រូវណាត់ជួបឲ្យពួកគេបានដឹង ឬហៅមិត្តភ័ក្តិពីរបីនាក់ទៅជាមួយគ្រាន់បានជាគ្នារឹតតែល្អ។
ដោយឡែកកញ្ញា សេង សោភ័ណ លើកឡើងដោយប្រកាន់គោលជំហររឹងមាំសម្រាប់ការពារខ្លួនថា៖ “អង្គុយទល់មុខគ្នា កុំអង្គុយក្បែរគ្នា និងផឹកស្រា ព្រោះអាចធ្វើឲ្យខាងបុរសគិតថា យើងជាមនុស្សស្រីចិត្តងាយ។ ម្យ៉ាងទៀត ស្រីៗត្រូវចេះសង្កេត បើបុរសនោះចង់បោក ដោយរកលេសបបួលទៅបន្តកន្លែងនេះកន្លែងនោះ ពេលឃើញអីចឹងត្រូវម៉ឹងម៉ាត់ បដិសេធដាច់ខាត ហើយឆាប់មកផ្ទះភ្លាម”។
យ៉ាងណាមិញ ពីរចំណុចសម្រាប់ការពារខ្លួន កុំឲ្យបុរសស៊ីខ្សែលើស្រីៗ របស់កញ្ញា រុន សុចាន់ណា គឺហាមឲ្យគេប៉ះពាល់រាងកាយ និង ធ្វើជាមនុស្សស្រីដែលរឹងប៉ឺង។
កញ្ញាវ័យ២៣ឆ្នាំរូបនេះបានបញ្ជាក់ថា៖ “តាមឯកសារខ្ញុំធ្លាប់អាន ស្រីៗនឹងមិនអាចគ្រប់គ្រងខ្លួនឯងបាននៅពេលណាគេប៉ះពាល់ខ្លួន។ បើគេធ្វើបែបនោះមែន ត្រូវដឹងខ្លួនថា គេមិនស្មោះនឹងយើង ឬចង់បោកស៊ីហើយ។ និយាយទៅខាងនារីក៏អីចឹងដែរ មិនត្រូវប្រើភ្នែក ឬពាក្យផ្អែមល្ហែមពេកទេ ត្រូវមានគោលជំហររឹងមាំ បើឃើញថាមិនស្រួលហើយ ត្រូវប្រកែកឲ្យដាច់ណាត់ ឬរកវិធីដោះស្រាយដូចជាcall ទៅមិត្តភ័ក្ដិឲ្យមកជួយ”។
និយាយដោយមិនអាក់មួយម៉ាត់ កញ្ញា អន ភារិន សិក្សាជំនាញផ្នែកច្បាប់បានប្រាប់ឲ្យដឹងថា៖ ”ត្រូវរកកន្លែងណាត់ជួបគ្នាណាភ្លឺៗហើយមានមនុស្សច្រើនទើបជាការប្រសើរ កុំឲ្យគេមានឱកាសចំណេញលើយើង។ មួយទៀត ត្រូវប្រយ័ត្នទឹកដែលគេឲ្យផឹក វរៗគេដាក់ថ្នាំចាប់យកទៅណាទៅណី ព្រោះស្គាល់មុខមិនស្គាល់ចិត្តទេ”៕
តើមិត្តនារីៗមានគន្លឹះអ្វីផ្សេងទៀតដែរឬទេ?
