ត្បូងពេជ្រធំប៉ុន ពងមាន់តម្លៃ មិនក្រោម២៨លានដុល្លារ
ក្រុងញូវយ៉កៈ គ្រាប់ពេជ្រភ្លឺរលោងទម្ងន់១១៨ការ៉ាត់ត្រូវបានក្រុមហ៊ុនSothebyដាក់តាំងដេញថ្លៃនៅឯក្រុងញូវយ៉កសហរដ្ឋអាមេរិក។
ចំពោះការដេញថ្លៃទិញដុំពេជ្រពណ៌សមួយគ្រាប់នេះនឹងធ្វើនៅឯក្រុងហុងកុងប្រទេសចិននៅថ្ងៃទី៧ខែតុលាខណៈគេរំពឹងថាវានឹងមានតម្លៃពី២៨ទៅ៣៥លានដុល្លារ។
ដុំពេជ្រពណ៌សនោះមានរាងមូលពងក្រពើ ហើយវាត្រូវបានគេប៉ាន់ស្មានថាមានទំហំប៉ុនស៊ុតមាន់ឯណោះ ខណៈក្រុមហ៊ុនSothebyបានហៅវាថាជាដុំពេជ្រធំដ៏កម្រដែលមិនធ្លាប់មាន។
ដុំពេជ្រដែលថ្លៃជាងគេនិងជាប់កំណត់ត្រាពិភពលោកបច្ចុប្បន្ននោះមានតម្លៃ២៧លានដុល្លារត្រូវបានដាក់ដេញថ្លៃដោយក្រុមហ៊ុនChristieនៅទីក្រុងហ្សឺណែវប្រទេសស្វ៊ីសកាលពីខែឧសភា។ ដុំពេជ្រនោះវាមានរាងដូចជាផ្លែព័រមានទម្ងន់១០១ការ៉ាត់ដោយមានមហាសេដ្ឋីហារីវីនស្តុនជាអ្នកដេញថ្លៃទិញបានសម្រេច។
ឯគ្រាប់ពេជ្រពណ៌សធំប៉ុនពងមាន់ដែលក្រុមហ៊ុនSothebyគ្រោងនឹងដាក់ដេញថ្លៃលក់នេះត្រូវបានគេជីកចេញពីអណ្ដូងរ៉ែនៅអាហ្វ្រិកខាងត្បូងកាលពីឆ្នាំ២០១១៕
ប្រភពពី ភ្នំពេញ ប៉ុស្តិ៍.
