ក្លើផឹកស៊ីស្រវឹង បបួលគ្នាដូរប្រពន្ធ ក្លាយជារឿង ពិតពង្រត់គ្នាដល់ថៃ
ខេត្ដបន្ទាយមានជ័យ ៖ ជារឿងដ៏កម្រមួយដែលបុរស២នាក់ត្រូវជាមិត្ដភក្ដិ និងស្រឡាញ់ស្មោះស្ម័គ្រជាមួយគ្នា បន្ទាប់ ពីផឹកស៊ីស្រវឹងបានបបួលគ្នាដូរប្រពន្ធ លេងៗ ប៉ុន្ដែការដូរគ្នាលេងៗនេះក្លាយ ជារឿងមែនទែន រហូតពង្រត់គ្នាទៅដល់ ប្រទេសថៃទៀតផង។ នៅសង្គមខ្មែរយើង រឿងបែបនេះមិនសូវមានទេ ហើយបើ មានមែន គឺមានតែក្នុងរឿងព្រេងដូច ជារឿង“មាយើង”ជាដើម។ ចំណែក នៅប្រទេសលោកខាងលិចឯណោះវិញ រឿងដូរប្រពន្ធគ្នានេះ សឹងថាជារឿងធម្មតាទៅហើយ ។
រឿងពិតមួយបានកើតមានឡើង និងបង្កឱ្យភ្ញាក់ផ្អើលនៅភូមិបឹងតាស្រី ឃុំ គោករមៀត ស្រុកថ្មពួក ខេត្ដបន្ទាយ មានជ័យ មានមិត្ដភក្ដិ២នាក់ដែលរាប់ អានស្រឡាញ់គ្នាតាំងពីធ្វើការនៅក្នុង ប្រទេសថៃ ហើយនៅពេលដែលពួកគេ ផឹកស៊ីស្រវឹងម្ដងៗ តែងនិយាយលេង ដោយបបួលគ្នាដូរប្រពន្ធ ។ ក្នុងចំណោម បុរសទាំង២នាក់ដែលនិយាយថា ដូរប្រពន្ធគ្នានេះមានម្នាក់ទឹកភ្នែក និង ម្នាក់ទៀតដែលនិយមស៊ីវិល័យដូចគ្នា បានពង្រត់គ្នាទៅប្រទេសថៃបាត់ ដោយទុកបុរសដែលមានរូបឆោមមិនសូវសង្ហា អង្គុយសម្រក់ទឹកភ្នែកនឹកស្ដាយស្រណោះ ប្រពន្ធ ដោយនឹកស្មានថា គ្រាន់តែនិយាយ គ្នាលេងៗសោះ មិនគួរអាក្លើថ្លើមធំ លួចពង្រត់ប្រពន្ធខ្លួនទៅបាត់សោះ ។
ប្រភពព័ត៌មានពីអ្នកភូមិបានឱ្យដឹង ថា មិត្ដភក្ដិ២គូនេះ គូទី១ ឈ្មោះ ប៊ុន ធឿម អាយុ៣០ឆ្នាំ ដែលមានប្រពន្ធ ឈ្មោះសន ពៅ អាយុ៣១ឆ្នាំ មានស្រុក កំណើតនៅភូមិព្រៃផ្ដៅ ឃុំតាក្រៀម ស្រុកបាណន់ ខេត្ដបាត់ដំបង និងមានទី លំនៅភូមិបឹងតាស្រី ឃុំគោករមៀត ស្រុកថ្មពួក ។ ចំណែកគូទី២ ប្ដីឈ្មោះ ឈុន លន់ អាយុ៣៣ឆ្នាំ មានស្រុកកំណើត ភូមិភាស ឃុំសារង្គ ស្រុកស្វាយចេក ខេត្ដបន្ទាយមានជ័យ មានប្រពន្ធឈ្មោះ ចាន់ សាវ័ន្ដ អាយុ២៦ឆ្នាំ មានស្រុកកំណើតនិងទីលំនៅជាមួយមិត្ដភក្ដិ ខាងលើ ។
បើតាមប្រភពពីអ្នកភូមិបានឱ្យដឹងថា មិត្ដភក្ដិ២នាក់នេះស្គាល់គ្នាយូរ ខែមកហើយ តាំងពីធ្វើការនៅប្រទេស ថៃមកម្ល៉េះ ហើយនៅពេលផឹកស៊ីជា មួយគ្នាម្ដងៗ ឈ្មោះប៊ុន ធឿម តែងតែនិយាយលេងបន្លំមែនជាមួយឈ្មោះឈុន លន់ ជាមិត្ដភក្ដិថា យើងគួរដូរប្រពន្ធគ្នា? ការនិយាយបែបនេះ មិនមែនតែម្ដងទេ គឺច្រើនលើកច្រើនសាមកហើយ ឱ្យតែពួកគេជួបគ្នាផឹកស៊ីស្រវឹងម្ដងៗ ។
តាមស្ដ្រីឈ្មោះ សន ពៅ ជាប្រពន្ធ ឈ្មោះប៊ុន ធឿម បានរៀបរាប់ឱ្យដឹងថា រូបនាង និងប្ដីបានរៀបការជាមួយគ្នា តាំងពីឆ្នាំ២០០៦មកម្ល៉េះ ហើយមក ដល់ពេលនេះមានកូនស្រីប្រុស៦នាក់មកហើយ ។ ពួកគាត់ទាំង២នាក់បាននាំ គ្នាទៅធ្វើការនៅប្រទេសថៃ ហើយនៅទី នោះបានស្គាល់ឈ្មោះឈុន លន់ ដោយ ស្រឡាញ់រាប់អានគ្នាជាមិត្ដភក្ដិប្ដូរផ្ដាច់ ទៀតផង ។ បន្ទាប់មក ទើបពួកគាត់បាន វិលត្រឡប់មកនៅស្រុកខ្មែរវិញ ។
ស្ដ្រីឈ្មោះ សន ពៅ បានឱ្យដឹងទៀតថា ក្រោយពេលនាងមានផ្ទៃពោះ៦ខែ នាងត្រូវបានប្ដីដើរចោល ទៅឆាបឆក់ យកប្រពន្ធមិត្ដភក្ដិគឺនាងចាន់ សាវ័ន្ដ រួចបានពង្រត់គ្នាទៅធ្វើការនៅប្រទេស ថៃ ដោយមិនបានគិតគូរពីនាង និងកូន នៅក្នុងផ្ទៃនោះឡើយ។ បន្ទាប់មក នាងក៏ ឆ្លងទន្លេបានកូនប្រុស១ ដែលមកដល់ ពេលនេះមានអាយុ២ខែហើយ មិនទាន់ ឃើញប្ដីវិលមករកប្រពន្ធកូនវិញឡើយ។
ចំណែកបុរសអភ័ព្វស្នេហ៍ឈ្មោះ ឈុន លន់ វិញបានរៀបរាប់ឱ្យដឹងថា រូប គាត់និងប្រពន្ធឈ្មោះចាន់ សាវ័ន្ដបាន រៀបការជាមួយគ្នាច្រើនឆ្នាំមកហើយ ដែលមកដល់ពេលនេះក៏មានកូន ប្រុស ស្រី៣នាក់រួចទៅហើយដែរ ។
បុរសឈុន លន់ បានឱ្យដឹងទៀតថា “ខ្ញុំហួសចិត្ដខ្លាំងណាស់ មិនគួរណាមិត្ដ ភក្ដិដែលស្រឡាញ់គ្នាយ៉ាងប្ដូរផ្ដាច់ ក្បត់ ចិត្ដលួចពង្រត់ប្រពន្ធរបស់ខ្លួនទៅធ្វើ ការនៅប្រទេសថៃបាត់ ដោយគ្រាន់តែ ការផឹកស៊ីបន្ដិចបន្ដួចនិយាយគ្នាលេង ថា យើងគួរដូរប្រពន្ធគ្នា ។ ថ្វីបើក្លើ ម្នាក់នេះលូកថ្លើមលួចពង្រត់ប្រពន្ធទៅ បាត់ក៏ពិតមែន ប៉ុន្ដែខ្ញុំនៅមានចិត្ដ អាណិតអាសូរនាងសន ពៅ (ប្រពន្ធប៊ុន ធឿម)ដែលកំពុងឆ្លងទន្លេយ៉ាងលំបាក លំបិនជាមួយកូនប្រុស ស្រី៦នាក់ទៀត ដែលរស់នៅយ៉ាងកណ្ដោចកណ្ដែង គ្មាន ឪពុកនៅក្បែរ។ ភាពកណ្ដោចកណ្ដែងនេះ ហើយដែលធ្វើឱ្យខ្ញុំមិនអាចទល់ភ្នែក មើលបានហើយ ក៏ជួយបម្រើបាយទឹក នំចំណី និងដុតភ្លើងជើងក្រានឱ្យនាងសន ពៅ ដោយទ្រាំការឈឺចាប់ទាំង២នាក់ ព្រោះម្ខាងប្ដីរត់ចោល ឯម្ខាងទៀតប្រពន្ធក៏រត់ចោលដែរ” ។
នៅទីបំផុតបុរស ឈុន លន់ និងនាង សន ពៅ បានសម្រេចចិត្ដទាំង២នាក់យក គ្នាធ្វើជាប្ដីប្រពន្ធដូចពាក្យនិយាយលេង ពីមុនមែន ដោយស៊ូទ្រាំចិញ្ចឹមកូនទាំង សងខាងសរុប១០នាក់ ខណៈដែលប្ដី និង ប្រពន្ធផិតក្បត់រៀងៗខ្លួនទៅសម្ងំសោយ សុខតែ២នាក់នៅឯទឹកដីថៃ ៕
_____________________
ប្រភពពីនគរវត្ត
