ញត្តិតវ៉ារបស់អ្នក គាំទ្រគណបក្ស សង្គ្រោះជាតិទៅ ដល់ព្រះបរមរាជវាំង
ទីបំផុតទៅ មន្ត្រីព្រះបរមរាជវាំងបានចេញមកទទួលញត្តិទាមទាររបស់អ្នកគាំទ្រគណបក្សសង្គ្រោះជាតិ។ ញត្តិដែលមានស្នាមមេដៃពលរដ្ឋជាង ២០ ម៉ឺននាក់បានស្នើសុំឲ្យព្រះមហាក្សត្រពន្យារពេលកិច្ចប្រជុំសភាដំបូងដែលគ្រោងបើកធ្វើនៅថ្ងៃទី២៣ កញ្ញាដើមសប្តាហ៍ក្រោយនេះ។ នៅមិនទាន់មានចម្លើយយ៉ាងណាពីព្រះរាជវាំងនៅឡើយទេរហូតមកទល់ល្ងាចថ្ងៃសៅរ៍នេះ។
ក្រុមអ្នកគាំទ្រគណបក្សសង្គ្រោះជាតិបានដង្ហែញត្តិទៅថ្វាយព្រះមហាក្សត្រនៅព្រឹកថ្ងៃសៅរ៍នេះនៅឯមុខព្រះបរមរាជវាំង។ បន្ទាប់ពីត្រូវបានសមត្ថកិច្ចរារាំងអស់ជាច្រើនម៉ោង ទីបំផុត ញត្តិដែលមានស្នាមមេដៃពលរដ្ឋជាង ២០ ម៉ឺននាក់ នោះត្រូវបានមន្ត្រីព្រះបរមរាជវាំងយករថយន្តមួយមកទទួលហើយក៏ដឹកញត្តិនោះចូលទៅក្នុងព្រះរាជវាំង។
ក្រុមអ្នកគាំទ្រគណបក្សសង្គ្រោះជាតិបានផ្តិតមេដៃលើញត្តិនោះដើម្បីទាមទារឲ្យព្រះមហាក្សត្រពន្យារពេលកោះប្រជុំសភាដំបូង និងគាំទ្រការមិនចូលប្រជុំសភារបស់តំណាងរាស្ត្រគណបក្សសង្គ្រោះជាតិ។ ញត្តិទាមទារនេះបានធ្វើឡើងបន្ទាប់ពីលោក សម រង្ស៊ី ប្រធានគណបក្សសង្គ្រោះជាតិបានផ្ញើលិខិតថ្វាយព្រះមហាក្សត្រមួយដែរកាលពីថ្ងៃសុក្រ២០កញ្ញា។ លោក សម រង្ស៊ីបានទូលថ្វាយព្រះមហាក្សត្រថា ដរាបណានៅមិនទាន់មានការស្រុះស្រួលគ្នារវាងគណបក្សទាំងពីរទេ គណបក្សសង្គ្រោះជាតិនឹងមិនចូលប្រជុំឡើយ។ មេដឹកនាំបក្សប្រឆាំងក៏បានរម្លឹកព្រឹត្តិការណ៍ឆ្នាំ ២០០៣ ដែលព្រះករុណាព្រះបរមរតនៈកោដ្ឋ សម្តេចព្រះនរោត្តម សីហនុ មិនចូលធ្វើជាអធិបតីក្នុងកិច្ចប្រជុំទេនៅពេលដែលគណបក្សប្រឆាំងធ្វើពហិការ។
រហូតមកទល់ពេលនេះ គេនៅមិនទាន់ឃើញមានព្រះរាជសារឆ្លើយតបរបស់ព្រះមហាក្សត្រទៅកាន់លោក សម រង្ស៊ី និងទៅកាន់អ្នកគាំទ្របក្សប្រឆាំងនៅឡើយទេ។ ប៉ុន្តែ ព្រះអង្គធ្លាប់បានឆ្លើយតបម្តងហើយទៅកាន់អ្នកតំណាងរាស្ត្រគណបក្សសង្គ្រោះជាតិថា ព្រះអង្គមិនពន្យារពេលកិច្ចប្រជុំនេះបានទេពីព្រោះតែព្រះអង្គអនុវត្តតាមរដ្ឋធម្មនុញ្ញតែប៉ុណ្ណោះ។ រដ្ឋធម្មនុញ្ញមាត្រា ៨២ថ្មីដែលចែងថា កិច្ចប្រជុំសភាដំបូងត្រូវធ្វើឡើង ៦០ ថ្ងៃយ៉ាងយូរក្រោយពេលបោះឆ្នោតតាមការកោះប្រជុំរបស់ព្រះមហាក្សត្រ។
ប៉ុន្តែ គណបក្សប្រឆាំង និងសង្គមស៊ីវិលមួយចំនួនបានបកស្រាយខ្លឹមសារមាត្រានេះថា ៦០ថ្ងៃក្រោយពីការប្រកាសលទ្ធផលបោះឆ្នោតផ្លូវការទៅវិញ។ នេះជាហេតុផលដែលពួកគេទាមទារឲ្យព្រះមហាក្សត្រពន្យារពេល។ ប៉ុន្តែ បើយោងតាមការបកស្រាយរបស់ក្រុមប្រឹក្សាធម្មនុញ្ញ ព្រះមហាក្សត្រគ្មានពេលដែលត្រូវពន្យារឡើយដោយរាប់ ៦០ ថ្ងៃចាប់ពីថ្ងៃបោះឆ្នោត ២៨ កក្កដា៕
ប្រភពពី RFI
