វីដេអូ៖ Peypey Ly ចេញមុខ បកស្រាយ
កញ្ញា Peypey Ly ជានារីលក់កាហ្វេម្នាក់ និងជាតារាដ៏ល្បីល្បាញប្រចាំបណ្តាញទំនាក់ទំនងសង្គមយក្ស ហ្វេសបុក ផងដែរ។ កាលពីប៉ុន្មានថ្ងៃមុននេះ នាងបានចេញមុខតាមឃ្លីបវីដេអូមួយដោយបញ្ជាក់ពីចិត្តស្មោះរបស់នាងក្នុងការគាំទ្រគណបក្សសង្គ្រោះជាតិ។
កន្លងមកមានពាក្យតិះដៀល និងរិះគន់ថា នាងគឺជាជនជាតិវៀតណាម ហើយបានចោទមកលើនាងថាបានបង្ហោះវីដេអូរាំស៊ិចស៊ីដើម្បីបង្វក់ដល់យុវជនខ្មែរ។ ស្រាប់តែក្នុងរដូវកាលយុទ្ធនាការឃោសនារកសំលេងឆ្នោតនេះ គេបានប្រទះឃើញរូបថតរបស់នាង ជាអ្នកគាំទ្រគណបក្សសង្គ្រោះជាតិ ដែលបក្សនេះអះអាងថា ខ្លួននឹងបណ្តេញ និងទប់ស្កាត់ការហូរចូលនៃអន្តោប្រវេសន្ត៍វៀតណាមខុសច្បាប់ត្រលប់ទៅប្រទេសគេវិញ ដែលជាហេតុនាំអោយមានមន្ទិលសង្ស័យពីសំណាក់អ្នកដែលធ្លាប់ចោទប្រកាន់មកលើនាង។
ដើម្បីឆ្លើយតប ក៏ដូចជាការបកស្រាយទៅលើការចោទប្រកាន់ទាំងនោះ នាងបានរៀបរាប់ក្នុងវីដេអូនោះថា នាងមិនមែនជាជនជាតិវៀតណាមទេ នាងគឺជាស្រីខ្មែរសុទ្ធសាធតែម្តង ហើយអ្វីដែលនាងធ្វើកន្លងមក គឺគ្រាន់តែចង់អោយមិត្តក្នុងហ្វេសបុកមានអារម្មណ៍រីករាយជាលក្ខណៈការកំសាន្តប៉ុណ្ណោះ។ នាងបាននិយាយទៀតថា នាងពិតជាស្រលាញ់គាំទ្រ គណបក្សសង្គ្រោះជាតិពិតប្រាកដដោយឥតមានសង្ស័យអ្វីទាំងអស់។ នាងបានទទូចសុំអោយសាច់ញាតិរបស់នាង និងពលរដ្ឋខ្មែរបោះឆ្នោតជូនបក្សសង្គ្រោះជាតិទាំងអស់ បើទោះបីជានាងគ្មានឈ្មោះក្នុងបញ្ជីបោះឆ្នោតក៏ដោយ។
បន្ទាប់ពីបានស្តាប់ការបកស្រាយបំភ្លឺរបស់នាងរួចមក អ្នកគាំទ្របក្សសង្គ្រោះជាតិបានអបអរសាទរចំពោះនាងយ៉ាងខ្លាំង ហើយបានធ្វើអោយអ្នកដែលធ្លាប់តែរិះគន់នាងមួយចំនួនបានផ្លាស់ប្តូរទស្សនៈមកលើរូបនាងផងដែរ។ ប៉ុន្តែទោះជាយ៉ាងណាក៏ដោយ ក៏នៅតែមានមន្ទិលសង្ស័យខ្លះដែរពីសំណាក់អ្នកវិភាគមួយចំនួន ដោយពួកគេបានប្រៀបរវាងសកម្មភាពពីមុន និងការបកស្រាយរបស់នាងនាពេលនេះនៅមានលក្ខណៈមិនប្រក្រតីច្រើន៕
ប្រភព : Happy cambodia
