តូចចិត្តសុំប្រពន្ធ ជានាវិញមិនព្រម ផឹកថ្នាំពុលកុក សម្លាប់ខ្លួន
រាជធានីភ្នំពេញ ៖ បុរសម្នាក់មានអាការៈធ្ងន់ធ្ងរ ដែលគ្រូពេទ្យប្រាប់ថា មានសង្ឃឹមតិចណាស់ ដោយសារតែជាតិថ្នាំពុលបានជ្រាបពេញខ្លួនអស់ទៅហើយ បន្ទាប់ពីយកថ្នាំបំពុលកុកមកផឹកដើម្បីសម្លាប់ខ្លួន ព្រោះខឹងប្រពន្ធសុំជានាវិញមិនព្រម ។
ហេតុការណ៍នេះបានបង្កឱ្យភ្ញាក់ផ្អើលកាលពីវេលាម៉ោង៥ល្ងាចថ្ងៃទី២១ កក្កដា ២០១៣ ស្ថិតនៅភូមិត្រាវ ឃុំទឹកល្អក់ ស្រុកគងពិសី ខេត្តកំពង់ស្ពឺ ។ បុរសផឹកថ្នាំពុលនោះឈ្មោះអេ វណ្ណា អាយុ២៥ឆ្នាំ ជាកសិករ ស្នាក់នៅភូមិកើតហេតុខាងលើ ។
តាមប្រភពបានឱ្យដឹងថា ការដែលផឹកថ្នាំពុលនេះ ក៏មិនដឹងថា ផឹកតាំងពីម៉ោងណាមកដែរ ទាល់តែសន្លប់ស្តូកស្តឹង ទើបប្រទះឃើញធ្វើឱ្យមានការភ្ញាក់ផ្អើល ហើយសាច់ញាតិបានបញ្ជូនទៅសង្គ្រោះនៅមន្ទីរពេទ្យថ្នល់ទទឹង ប៉ុន្តែដោយស្ថានភាពធ្ងន់ធ្ងរពេក ក៏បានបញ្ជូនបន្តទៅព្យាបាលនៅមន្ទីរពេទ្យព្រះកុសុមៈ ៕ប្រភព kohsantepheap
