ប្រើសង្សារទៅ ខ្ចីម៉ូតូគេរួច សម្លាប់នាង ចោលប្លន់ យកម៉ូតូទីបំផុត ជាប់អន្ទាក់ ប៉ូលិស
ប៉ោយប៉ែត ៖ ឃាតកដែលសម្លាប់នារីខារ៉ាអូខេនៅប៉ោយប៉ែតត្រូវបានប៉ូលិសក្របួចបានហើយ ជនល្មើសគឺជាសង្សាររបស់ជនរងគ្រោះផ្ទាល់តែម្ដង ហើយបានប្រើនាងឲ្យទៅខ្ចីម៉ូតូអ្នកដទៃយកមកជិះបែរជាយកទៅលក់រួចសម្លាប់នាងបំបិទភស្តុតាងតែម្ដង។
សូមបញ្ជាក់ដែលថា រឿងឈាមស្រែកស្បែកហៅនោះគឺគេចមិនផុតពីកណ្ដាប់ដៃរបស់សមត្ថកិច្ចទេតែវាគ្រាន់តែយូរនិងឆាប់តែប៉ុណ្ណោះ ដូចជាករណីបុរសជាជនល្មើសបានយកកាំបិតទៅអារកស្រីស្នេហ៍របស់ខ្លួនរួចប្លន់យកម៉ូតូស្កុបពីពណ៌សទៅលក់បាត់ ហើយគេចខ្លួនទៅស្រុកកំណើតទីបំផុតចូលអន្ទាក់ប៉ូលិសតែម្ដង។
លោក អុំ សុផល អធិការនគរបាលក្រុងប៉ោយប៉ែតបញ្ជាក់ថា ជនសង្ស័យឈ្មោះ ងិង លុន ភេទប្រុស អាយុ២៦ឆ្នាំ រស់នៅភូមិរកា ឃុំមេបុណ្យ ស្រុកស្វាយអន្ទរ ខេត្តព្រៃវែង មុខរបរជាសន្ដិសុខយាមការនៅខារ៉ាអូខេនាគទិព្វ១ ក្រោយមកក៏រត់ម៉ូតូឌុបប្រចាំនៅនាគទិព្វ២ក្រុងប៉ោយប៉ែត។ លោក អុំ សុផល បន្ដទៀតថា មុនពេលកើតហេតុជនសង្ស័យខាងលើបានប្រើនាងរងគ្រោះជាសង្សារឲ្យទៅខ្ចីម៉ូតូឈ្មោះ ភឿក ពេលនាងខ្ចីម៉ូតូបានហើយ កាលពីព្រឹកថ្ងៃទី១២ ខែកក្កដា ឆ្នាំ២០១៣ រួចជនសង្ស័យបានដឹកនាងតាមម៉ូតូដែលខ្ចីគេយកមកជិះរួចយកនាងទៅសម្លាប់ចោលក្នុងគំនរក្រណាត់តែម្ដង ហើយរត់គេចខ្លួនទៅស្រុកកំណើតខាងលើនោះ។ លោក អុំ សុផល បន្ដទៀតថា ដោយមានការសហការជាមួយប៉ូលិសស្រុកខេត្តព្រៃវែងទើបអាចចាប់ជនល្មើសបានកាលពីល្ងាចថ្ងៃទី១៤ ខែកក្កដា ឆ្នាំ២០១៣ រួចដឹកយកមកខេត្តបន្ទាយមានជ័យចាត់ការតាមនីតិវិធីច្បាប់តែម្ដងទៅ៕
ប្រភព កម្ពុជាថ្មី
