Justin Bieber ទាត់ធាក់អ្នកប្រមាញ់រូបថតតារា ឥឡូវត្រូវគេប្ដឹង
តារាចម្រៀងកាណាដា Justin Bieber ត្រូវបានអ្នកប្រមាញ់រូបថតតារាប្តឹងដោយអះអាងថា តារាវ័យ ១៩ឆ្នាំរូបនេះបានទាត់ និងធាក់គេនៅមជ្ឈមណ្ឌលលក់ទំនិញ ភាគខាងត្បូងរដ្ឋកាលីហ្វ័រញ៉ាកាលពីឆ្នាំមុន។
អ្នកប្រមាញ់រូបថតតារា Jose Osmin Hernandez Duran បានដាក់ពាក្យបណ្តឹងថា Justin Bieber បានទាត់ និងវាយមុខផ្នែកខាងស្តាំគេ។ ហេតុការណ៍នេះ បានកើតឡើងកាលពីថ្ងៃទី២៧ ខែមិថុនាឆ្នាំមុន។
មុនពេលកើតហេតុ Justin និង Selena Gomez បានព្យាយាមចេញពីហាងទំនិញមួយតាមឡាន Mercedes ប៉ុន្តែត្រូវឡោមព័ទ្ធជាប់ដោយក្រុមអ្នកប្រមាញ់រូបថត និងអ្នកគាំទ្រជាច្រើននាក់។ ខណៈនោះ Justin ទំនងជាចង់បើកឡានចេញពីកន្លែងនោះ តែធ្វើមិនបានសម្រេចដោយសារតែទំហំឡានធំ និងមនុស្សកកកុញទៀត។
ក្រោយមក Justin បានបើកទ្វារឡានហើយស្រែកឱ្យមនុស្សទាំងអស់ចេញពីផ្លូវឡាន បន្ទាប់មក Justin ក៏រត់ចុះពីលើឡានរត់សំដៅទៅរក Duran ហើយក៏វាយប្រហារគេតែម្តង។ ទាក់ទងនឹងបញ្ហានេះ មិនអាចសុំការបកស្រាយបំភ្លឺពីអ្នកតំណាងតារាចម្រៀងល្បីរូបនេះទេ។
អ្នកប្រមាញ់រូបថតខាងលើ បានដាក់បណ្តឹងចោទប្រកាន់ Justin Bieber ពីបទធ្វើបាបរាងកាយ និងបង្កផលប៉ះពាល់ដល់សតិអារម្មណ៍ និងស្ថានភាពសេដ្ឋកិច្ចគ្រូសារ។
មួយរយៈចុងក្រោយនេះ Justin ហាក់មិនសូវមានរឿងល្អប៉ុន្មាននោះទេនៅលើទំព័រសារព័ត៌មាន ជាក់ស្ដែងកាលពីសប្ដាហ៍មុន មានប្រភពមួយបានលើកឡើងថា អ្នកគ្រប់គ្រងតារារូបនេះគឺលោក Scooter ចង់ឲ្យតារាចម្រៀងវ័យក្មេងម្នាក់នេះចូលមណ្ឌលកែប្រែ។
