Galaxy S6 មានចំណុចខ្លាំងទាំង១០ នេះ ល្មមអាចឱ្យ Apple ញញើតបាន
មកដល់ពេលនេះ នៅតែមានភាពចម្រូងចម្រាសនៅឡើយចំពោះមតិលើកឡើងជុំវិញ ការវាយតម្លៃលើ Galaxy S6 ប្រៀបធៀបនឹង iPhone 6 ថាតើកំពូលស្មាតហ្វូនទាំងពីរនេះ មួយណាល្អជាងមួយណា?
យ៉ាងណា TheBNEWS សុំមិនធ្វើការវាយតម្លៃនោះទេ គឺទុកឱ្យប្រិយមិត្តជាអ្នកសម្រេចចាញ់ឈ្នះផ្ទាល់ តែគួរណាស់តែបានសាកល្បងប្រើជាមុនសិន សឹមវាយតម្លៃចាញ់ឈ្នះតាមក្រោយ ព្រោះឮគេថា១ពាន់ដង មិនស្មើនឹងបានដឹងដោយការប្រើផ្ទាល់ម្ដងឡើយ។ ខាងក្រោមនេះ គឺជាលក្ខណៈ សម្បត្តិថ្មី ១០យ៉ាងដែល Samsung ទើបបញ្ចូលទៅលើស្មាតហ្វូន Galaxy S ជំនាន់ក្រោយគឺ Galaxy S6។
១) ការរចនារូបរាង
បើមើលតាមការឌីហ្សាញតួខ្លួនរបស់ Galaxy S6 គឺពុំសូវមានលក្ខណៈខុសប្លែកនឹង Galaxy S5 នោះទេ ប៉ុន្តែក្រុមហ៊ុន Samsung បានដកចោលទម្លាប់ប្រើសារធាតុប្លាស្ទិក ដោយរចនាឱ្យមានរឹងមាំ ស្អាតទាន់សម័យជាងមុន គឺផលិតពីលោហធាតុលាយកញ្ចក់ទំនើប (modern metal-and-glass phone)។ ស្មាតហ្វូនជំនាន់ចុងក្រោយនេះមានប្រវែងទទឹងមិនដល់ ២,៨អ៊ីញទេ ដូច្នេះផ្ដល់លក្ខណៈងាយស្រួលក្នុងការកាន់ប្រើដៃម្ខាង ព្រមទាំងសម្បកក្រោយមាននូវពណ៌ខៀវស្អាតផ្ដល់ភាពស៊ីវិល័យនៅពេលចាប់កាន់ក្នុងដៃ។
២) LoopPay
ស្មាតហ្វូននេះត្រូវបាន Samsung បំពាក់នូវបច្ចេកវិទ្យាទំនើប គឺប្រព័ន្ធទូទាត់ប្រាក់តាមទូរស័ព្ទដៃ ដែលផ្ដល់ភាពងាយស្រួល និងសុវត្ថិភាពក្នុងការចាយវាយដល់អ្នកប្រើ ព្រោះពុំចាំបាច់កាន់កាតឥណទាន ឬឥណពន្ធតាមខ្លួនឡើយ ពោលគឺយកតែទូរស័ព្ទគឺគ្រប់គ្រាន់។
៣) បច្ចេកវិទ្យាធ្វើឲ្យអេក្រង់ច្បាស់ល្អ HD Screen និងស្រោបដោយកញ្ចក់ការពារបច្ចេកវិទ្យាចុងក្រោយ Corning Gorilla Glass 3 មិនងាយឆ្កូត និងមិនងាយធ្លាក់បែក
Galaxy S6 មានអេក្រង់ ៥,១អ៊ីញ ប្រភេទ Quad-HD screen និងមានដង់ស៊ីតេអេក្រង់ធំរហូតដល់ ៥៧៧ភិចហ្សែលក្នុងមួយអ៊ីញ (577ppi) ដែលផ្ដល់ការបង្ហាញរូបបានម៉ត់ច្បាស់ល្អ។ កាន់តែពិសេសនោះ GS6 ត្រូវបានស្រោបដោយកញ្ចក់ការពារ Gorilla Glass 3 ដែលជាបច្ចេកវិទ្យាទំនើបចុងក្រោយរបស់ក្រុមហ៊ុនអាមេរិក Corning មានសមត្ថភាពខ្ពស់ក្នុងការការពារមិនឱ្យមានស្នាមឆ្កូត និងមិនងាយបែកអេក្រង់។
៤) ទំហំអង្គចងចាំត្រូវបានពង្រីកដល់ 128GB UFS Flash Storage
ដោយសារ Galaxy S6 ត្រូវបានផលិតឱ្យមានទំហំអង្គចងចាំធំដូច្នេះ ទើប Samsung មិនបានធ្វើរន្ធសម្រាប់ប្រើកាតមេម៉ូរីខាងក្រៅនោះឡើយ។ ក្រុមហ៊ុន Samsung បាននិយាយថាអង្គចងចាំម៉ាស៊ីនប្រភេទ built-in UFS flash memory នេះគឺមានសមត្ថភាពធ្វើប្រតិបត្តិការក្នុងល្បឿនលឿនជាងកាតមេម៉ូរីបន្ថែមក្រៅ (external memory card)។ កត្តានេះ នឹងធ្វើឱ្យការថតវីដេអូកម្រិត 4K មានដំណើរការបានរលូន។
៥) ដំណើរការរបស់កាមេរ៉ា Galaxy S6 មានល្បឿនលឿនជាងមុន
សមត្ថភាពនៅត្រង់ល្បឿនកាមេរ៉ា កន្លងមកក្រុមហ៊ុន Apple ហាក់ដូចជាមានការឈានមុខក្រុមហ៊ុន Samsung បន្តិច ប៉ុន្តែនៅលើ Galaxy S6 វិញ គឺត្រូវបានសម្រិតសម្រាំងយ៉ាងយកចិត្តទុកដាក់ និងបានយកឈ្នះល្បឿនក្នុងការបើកកម្មវិធីកាមេរ៉ា បានលឿនជាងកាមេរ៉ា iPhone 6 ដោយចំណាយរយៈពេលត្រឹមតែ ០,៦វិនាទី។
៦) គុណភាពកាមេរ៉ាល្អជាងមុន
កាមេរ៉ា GS6 ត្រូវបានអភិវឌ្ឍក្នុងកម្រិតសមត្ថភាពថតរូបបានភ្លឺច្បាស់ជាងមុន brighter f/1.9 និង infrared white balance detection ដែលជួយបង្កើនគុណភាពរូបច្បាស់ជាងកាមេរ៉ានៅលើ Galaxy S5។ រូបថតដែលផ្ដិតចេញមក នឹងភ្លឺច្បាស់ជាងមុនលក្ខណៈធម្មជាតិ ពុំសូវបែក និងពុំសូវលឿន (ពណ៌លឿង)។
៧) បច្ចេកវិទ្យាសាកថ្មឆាប់ពេញ (Fast Charging)
Galaxy S6 ត្រូវបានបំពាក់បច្ចេកវិទ្យា Qualcomm QuickCharge និងបច្ចេកវិទ្យា Samsung Quick-charging ដូច្នេះហើយ ធ្វើឲ្យស្មាតហ្វូននេះសាកថ្មឆាប់ពេញ ពោលគឺចំណាយពេលសាកតែ ១០នាទី អាចប្រើបានរហូតដល់ ២ម៉ោងក្នុងការចាក់វីដេអូ។
៨) Galaxy S6 បំពាក់ឈីបអង្គប្រតិបត្តិ Exynos 7 Octa Processor
Galaxy S6 នឹងក្លាយជាស្មាតហ្វូនដំបូងដែលបំពាក់ឈីប Samsung Exynos សម្រាប់ទីផ្សារអាមេរិក។ Exynos 7 Octa មានល្បឿន 2.1GHz មានល្បឿនលឿនជាង Snapdragon 810 របស់ក្រុមហ៊ុន Qualcomm ទៅទៀត ហើយមានទំហំ 14nm តូចជាងឈីបរបស់ Qualcomm។ តាមរយៈនេះ គេអាចសន្និដ្ឋានបានថា Galaxy S6 នឹងជាស្មាតហ្វូន Android ល្បឿនលឿនជាងគេក្នុងពេលបច្ចុប្បន្ន។
៩) កម្មវិធី Software ‘TouchWiz’ មានការរចនាស្អាត
Galaxy S6 ប្រើនូវ Software ‘TouchWiz’ ថ្មីដោយបានរចនារូបរាង interface រឹតតែស្អាត ជាមួយទំហំតូចជាងមុនប្រហែលតែ 700MB។ ដោយសារតែបែបនេះ វានឹងជួយសន្សំសំចៃទំហំអង្គចងចាំទំនេរបានច្រើន។
១០) មានម៉ោង (Clock) សម្រាប់មើល នៅចំហៀងអេក្រង់ ត្រង់អេក្រង់កោងបញ្ឆិតរបស់Galaxy S6 Edge
ចំពោះ Galaxy S6 Edge ត្រូវបានរចនារូបរាងប្លែកពីស្មាតហ្វូនមុន ដោយមានអេក្រង់កោងបញ្ឆិតចុះក្រោមបន្តិច។ តាមរយៈអេក្រង់កោងនេះ នឹងផ្ដល់ភាពងាយស្រួលមើលម៉ោងដល់អ្នកប្រើ ទោះបីអ្នកចាក់សោ (lock) អេក្រង់ទូរស័ព្ទឡើងងងឹត ក៏ម៉ោងនៅតែបង្ហាញនៅផ្នែកជំហៀងអេក្រង់ដដែល។
ប្រែសម្រួល៖ លី ឈៀន
