ដល់ថ្ងៃចូលឆ្នាំចិន!!!!មើលលេខនាំសំណាងសម្រាប់បើករបរអាជីវកម្មនៅក្នុងជំនឿប្រពៃណីជនជាតិចិន
នៅក្នុងប្រពៃណីជនជាតិចិន លេខក៏ត្រូវបានប្រជាជនចិនចាត់ទុកថាពាក់ព័ន្ធនឹង “សំណាងល្អ” ដែរព្រោះការបញ្ចេញសំឡេងនៃពាក្យនេះដូចគ្នាទៅនឹងពាក្យសំណាងល្អ។ លេខសំណាងល្អសំខាន់ខ្លាំងណាស់នៅក្នុងវប្បធម៌ចិន ហើយមនុស្សជាច្រើនរមែងជ្រើសរើសយកលេខសំណាងនៅពេលទិញផ្ទះថ្មី លេខទូរស័ព្ទ អាស័យដ្ឋានរកស៊ី កាលបរិច្ឆេទរៀបការ ធ្វើបុណ្យទាន ឬប្រារព្ធពិធីជប់លាងផ្សេងៗ។
នៅក្នុងប្រពៃណីចិនលេខ៨ ត្រូវបានចាត់ថា ជាពាក្យតំណាងឱ្យ ភាពចម្រុងចម្រើន ទ្រព្យសម្បត្តិ ជោគជ័យ និងឋានៈក្នុងសង្គម ព្រោះលេខ៨មានការបញ្ចេញសំឡេងដូចគ្នាទៅនឹងពា្យ Fa ដែលពាក្យ Fa នេះមានន័យថា ចម្រុងចម្រើន ទ្រព្យសម្បត្តិ ភាពជោគជ័យ និងឋានៈការងារក្នុងសង្គម។ តួយ៉ាងដូចជា ពិធីបើកកម្មវិធីកីឡាអូឡាំពិចឆ្នាំ២០០៨ នៅក្នុងប្រទេសចិន បានប្រារព្ធឡើងនៅថ្ងៃទី ០៨ ខែសីហា ឆ្នាំ២០០៨ (០៨/០៨/០៨) វេលាម៉ោង ៨និង ៨នាទីយប់។
សម្រាប់ជនជាតិចិនលេខគូត្រូវបានគេប្រើប្រាស់ជាងលេខសេស ព្រោះប្រជាជនចិនជឿជាក់លើភាពស្មើគ្នា ដូច្នេះចំនួនគូត្រូវបានប្រើប្រាស់ច្រើនជាងលេខសេសលេខ២តំណាងឱ្យភាពសុខដុម ចំណែកលេខ៦តំណាងឱ្យជោគជ័យ។ សម្រាប់ការបញ្ចេញសំឡេងនៃលេខ៩ មានសំឡេងស្រដៀងទៅនឹងពាក្យភាពស្ថិតស្ថេរគង់វង្ស។
លេខសំណាងនៅក្នុងការធ្វើជំនួញ៖ លេខនាំសំណាងមានសារសំខាន់ខ្លាំងបំផុតសម្រាប់ប្រជាជនបំផុតសម្រាប់អ្នកក្រុងហុងកុង ទីក្រុងពាណិជ្ជកម្ម ដែលសំបូរទៅតំបន់ឧស្សាហកម្ម ការប្រកួតប្រជែងគ្នាយ៉ាងតឹងតែងដើម្បីទទួលបានភាពជោគជ័យ ដូច្នេះពេលចាប់ផ្ដើមការរកស៊ីអ្វីមួយពួកគេតែងតែជ្រើសរើសយកថ្ងៃ សំណាង ដើម្បីបើកអាជីវកម្មរកស៊ីឬស៊ីញ៉េកុងត្រា ហើយបើសិនថ្ងៃនោះមានលេខ៨ អ្នកហុងកុងជឿថាថ្ងៃនោះជាថ្ងៃសំណាងនាំសំណាង ប៉ុន្តែបើថ្ងៃនោះមានលេខ៩ ពួកគេជឿថាការបើករបររកស៊ីនោះនឹងគង់វង្សជានិរន្តន៍ ហើយបើជាថ្ងៃទី៦ នោះការបើកអាជីវកម្មនោះគឺទទួលបានជោគជ័យ៕
ប្រែសម្រួល៖ សុខា នីកា
ប្រភព៖ chinahighlights.com
