រឿងមួយដែលលោកអ្នកអាចមិនដឹងគឺ ពូទីនទៅទីណាក៏យកចុងភៅតាមខ្លួនដែរ មិនមែនមានតែអ្នកភ្លក្សម្ហូបទេ
បុរសខ្លាំងដែលជាប្រធានាធិបតីបច្ចុប្បន្នរបស់រុស្ស៊ីលោក ពូទីន មិនថាលោកទៅទស្សនកិច្ចនៅប្រទេសណា ឬទៅធ្វើដំណើរកម្សាន្តនៅតំបន់ណានៃប្រទេសរបស់លោកទេ គឺលោកដាក់ចុងភៅតាមខ្លួនជានិច្ចពោលគឺលោកមិនញ៉ាំអាហារដែលធ្វើដោយចុងភៅផ្សេងឡើយ។
ការណ៍នេះ គឺដោយសារតែលោកខ្លាចគេបំពុល។ ចុងភៅដ៏ជំនិតរបស់លោក គឺមានតែម្នាក់ប៉ុណ្ណោះតែប្រភពមិនបានទម្លាយអត្តសញ្ញាណគាត់នោះទេ។
អាចនិយាយថា ជារឿងខ្លាចពេកក៏ថាបាន ប៉ុន្តែតាមឯកសារដែលក្រុមស៊ើបការណ៍សម្ងាត់របស់សហរដ្ឋអាមេរិកទទួលបាន និងបានទម្លាយប្រាប់អ្នកសារព័ត៌មានកាលពីពេលថ្មីៗនេះ គឺថា លោកបានរួចផុតពីការប៉ុនប៉ងធ្វើឃាតចំនួនប្រាំដងក្នុងរយៈពេលប៉ុន្មានឆ្នាំតាំងពីកាន់តំណែងជាមេចារកម្ម KGB។
ឯកសារដដែលបានឱ្យដឹងផងដែរថា លោកពូទីនស្រវឹងខួបក្នុងពេលដែលលោកធ្វើជាមេទីភ្នាក់ងារស៊ើបការណ៍សម្ងាត់ KGB មុនពេលក្លាយទៅជានាយករដ្ឋមន្ត្រី និងប្រធានាធិបតី។
ដោយឡែក បើតាមសេចក្ដីរាយការណ៍ពីសារព័ត៌មាន Independent លោកពូទីនថែមទាំងបានជួលបុគ្គលិកផ្នែកភ្លក្សម្ហូបឱ្យធ្វើការពេញម៉ោងម្នាក់ផងដែរ។ ម្នាក់នោះគឺមានតួនាទីភ្លក្សម្ហូបគ្រប់មុខមុនពេលដែលលោកទទួលទាន។ រឿងនេះមិនចម្លែកនោះទេ ត្បិតអីប្រធានាធិបតីប្រទេសផ្សេងៗរួមទាំងសហរដ្ឋអាមេរិកផងក៏មានអ្នកភ្លក្សម្ហូបជាប្រចាំនេះបែបនេះដែរ៕
