ចំណោម​កងកុម្មង់ដូ​ពិសេស​ទូទាំង​ពិភពលោក គឺ​កងកុម្មង់ដូ​ពិសេស​ SAS របស់​អង់គ្លេស​ទទួល​បាន​ចំណាត់​ថ្នាក់​ល្អ​ផ្ដាច់​គេ តាំង​ពី​ច្រើន​ជំនាន់​មក​ហើយ ពោល​គឺ​ចំណាត់​ថ្នាក់​ល្អ​ជាង​កង​កម្លាំង​ពិសេស Seals ដែល​ល្បី​ថា​ខ្លាំង​ ឈរ​នៅ​ចំណាត់​ថ្នាក់​លេខ២។ ចំណុច​ខ្លាំង​របស់​ក្រុម SAS គឺ​ក្រៅ​ពី​ជំនាញ​ប្រយុទ្ធ​នៅ​លើ​សមរភូមិ នៅ​មាន​ជំនាញ​អប់រំ​សតិអារម្មណ៍ ជំនាញ​ខាង​ឈ្លប​យក​ការណ៍​សម្ងាត់ និង​ជំនាញ​ប្រឆាំង​នឹង​ចារកម្ម (តាម​ចាប់​ក្រុម​ចារកម្ម និង​ក្រុម​ភេរវកម្ម​)។

កងកុម្មង់ដូ SAS ត្រូវ​បាន​បង្កើត​ឡើង​នៅ​ក្នុង​ឆ្នាំ១៩៤១ ក្នុង​សង្គ្រាម​លោក​លើក​ទី២ ហើយ​ជា​កងកម្លាំង​ឈាន​មុខ​គេ គ្មាន​គូ​ប្រៀប ព្រោះ​ក្រុមនេះ​បាន​អភិវឌ្ឍ​យុទ្ធសាស្ត្រ​លើ​គ្រប់​ផ្នែក​ឲ្យ​ថ្មី និង​ទំនើប​ជានិច្ច ម្ល៉ោះ​ហើយ ពាក់​ព័ន្ធ​នឹង​យុទ្ធសាស្ត្រ​ក្នុង​ការ​បំពេញ​បេសកកម្ម គឺ​ក្រុម​នេះ​ឈាន​មុខ​គេ​ជានិច្ច ពោល​គឺ​វ៉ា​ដាច់​ទាំង​កងកុម្មង់ដូ Navy SEALS របស់​អាមេរិក​ទៅ​ទៀត។

ប្រវត្តិ​នៃ​ការ​បង្កើត​កងកម្លាំង​ពិសេស SAS

កង​កម្លាំង​ពិសេស S.A.S វិវត្ត​​ពី​​កង​កុម្មង់ដូ​​​អង់​គ្លេស​​ដែល​​ត្រូវ​បាន​បង្កើត​ឡើង​ក្នុង​សង្គ្រាម​លោក​លើក​ទី២ ឆ្នាំ១៩៤០។ ការ​បង្កើត​កងកម្លាំង​ពិសេស​នេះ ទៅ​តាម​​​គំនិត​ផ្ដួចផ្ដើម​របស់​​នាយក​រដ្ឋ​មន្ត្រី​អង់​គ្លេស​កាល​ជំនាន់​នោះ គឺ​លោក​វីនស្តុន​ឈើឈីល (Winston Churchill) ដើម្បី​បង្កើត​កង​កម្លាំង​ពិសេស​ ដែល​មាន​សមត្ថភាព​ប្រយុទ្ធ​លើស​ពី​កងទ័ព​ធម្មតា ហើយ​ដែល​មាន​អានុភាព​ខ្លាំងក្លា​បំផុត អាច​វាយ​ទម្លុះ​ខ្សែ​ការពារ​ដ៏​​រឹង​មាំ​របស់​អាល្លឺម៉ង់​ ដើម្បី​ឈាន​ទៅ​រំដោះ​តំបន់​អឺរ៉ុប​ខាង​លិច​ទាំងមូល។

ខាង​ក្រោម​នេះ​ជា​ភាព​យន្ត​ឯកសារ​ស្ដីពី​ការ​ហ្វឹកហាត់​ក្នង​ជួរ​កងកុម្មង់ដូ​ពិសេស S.A.S

ពេល​នោះ កងទ័ព​ដ៏​មហិមា​របស់​អាល្លឺម៉ង់ បាន​ចូល​កាន់​កាប់​តំបន់​អឺរ៉ុប​ខាង​លិច​ទាំង​មូល នៅ​សល់​តែ​អង់គ្លេស​មួយ​ប៉ុណ្ណោះ ដែល​អាល្លឺម៉ង់​វាយ​យក​មិន​ទាន់​បាន។ ដើម្បី​អាច​រំដោះ​ទ្វីប​អឺរ៉ុប​បាន កង​ទ័ព​អាមេរិក និង​កាណាដា ត្រូវ​ទៅ​ប្រមូល​ផ្ដុំ​គ្នា​នៅ​ប្រទេស​អង់គ្លេស ដើម្បី​ហាត់​សម​យុទ្ធសាស្ត្រ​យោធា​ជាមួយ​គ្នា អស់​ជា​ច្រើន​ខែ និង​ច្រើន​ឆ្នាំ​ ទម្រាំ​ដាក់​ចេញ​យុទ្ធសាស្ត្រ​​ថ្មី​វាយ​បក​ទៅ​លើ​កងទ័ព​អាល្លឺម៉ង់​វិញ ស្រប​ពេល​ដែល​នៅ​រណសិរ្យ​ខាង​កើត (អឺរ៉ុប​ខាងកើត) កងទ័ព​សូវៀ់ត​ក៏​បាន​វាយ​បក​វិញ លើ​កងទ័ព​អាល្លឺម៉ង់។ ដូចនេះ ការ​វាយ​លុក​នេះ​​មាន​លក្ខណៈ​ជា «មុខ​ដង្កាប់​» ពី​ខាង​សូវៀត​ផង និង​ពី​ខាង​អង់គ្លេស អាមេរិក និង​កាណាដា​ផង ទៅ​លើ​អាល្លឺម៉ង់​តែ​មួយ។ (សូម​អស់​លោក​អ្នក​រង់ចាំ​តាម​ដាន​នៅ​លើ​គេហទំព័រ TheBNEWS.com នូវ​ព្រឹត្តិការណ៍​នានា និង​សមរភូមិ​ស៊ីសាច់​ហុត​ឈាម ​នៅ​ក្នុង​សង្គ្រាម​លោក​លើក​ទី២ ដែល​នឹង​ចុះផ្សាយ​នាពេល​ខាង​មុខ។)

…ប្រទេស​១០ ដែល​មានសមត្ថភាព​ខ្ពស់​បំផុត​ខាង​វិស័យការពារជាតិ…

តំបន់​ដែល​កងកុម្មង់ដូ​ពិសេស​របស់​អង់គ្លេស អាមេរិក និង​កាណាដា ត្រូវ​វាយ​ឡើងគោក និង​វាយ​បើក​មុខ​នៅ​ពេល​នោះ គឺ​តំបន់​ន័រម៉ង់ឌី នៅ​ប្រទេស​បារាំង ព្រោះ​បារាំង ជា​មុខ​ព្រួញ​សំខាន់ ដែល​កងទ័ព​ពិសេស​របស់​អង់គ្លេស អាមេរិក និង​កាណាដា ត្រូវ​តែ​វាយ​ដណ្ដើម​កាន់កាប់​ឲ្យ​ខាង​តែ​បាន ទោះ​បី​ជា​ត្រូវ​បង់​ក្នុង​តម្លៃ​ណា​ក៏ដោយ ព្រោះ​បើ​បរាជ័យ គឺ​ឱកាស​វាយ​លើកក្រោយ​ទៀត​លែង​សង្ឃឹម​ថា​ឈ្នះ​អាល្លឺម៉ង់ ព្រោះ​អាល្លឺម៉ង់​នឹង​បន្ថែម​កម្លាំង​ការពារ​កាន់​តែ​ច្រើន។ ម៉្យាងទៀត កងទ័ព​អាល្លឺម៉ង់​កាល​ជំនាន់​នោះ​ជា​កងទ័ព​ដែល​ជាប់​ចំណាត់​ថ្នាក់​លេខ១​ក្នុង​ពិភពលោក។

កងកុម្មង់ដូ​អង់គ្លេស​កាល​ណោះ​ មាន​៣០កងឯកភាព ដែល​អាច​សម្រប​​បាន​គ្រប់​កាលៈ​ទេសៈ​ទាំង​អស់ មិន​ថា​រងារ​ ក្ដៅ ខ្យល់​ព្យុះ​ភ្លៀង​ អត់​អាហារ​​ច្រើន​ថ្ងៃ​​យ៉ាងណា​​ ក៏​នៅ​តែ​អាច​ស៊ូទ្រាំ​បាន​ទាំងអស់។ កងកម្លាំង​ពិសេស​នេះ ធ្លាប់​ប្រឡូក​ក្នុង​សមរភូមិ​ក្ដៅ​​ជា​ច្រើន​កន្លែង​ ដូច​ជាៈ ១-នៅ​អាហ្វ្រិក​ដែល​ក្ដៅ​ខ្លាំង​ (តំបន់​អាហ្វ្រិក​ពិបាក​​រស់​នៅ​បំផុត ដូច​ជា​នៅ​វាល​លំហ​សាហារ៉ា ពេល​ថ្ងៃ​កម្ដៅ​ឡើង​ដល់​ជាង ៥០​អង្សា លុះ​ពេល​យប់ សីតុណ្ហភាព​ចុះ​ត្រជាក់​ដល់ ០អង្សា ឬ​ក្រោម​សូន្យ​) ២-នៅ​តំបន់​ប៉ូល​ដែល​ត្រជាក់​ខ្លាំង និង ៣-​តំបន់​អាស៊ី​ដែល​សម្បូូរ​ព្រៃ សម្បូរ​មូស និង​ស្ថាន​ភាព​ភូមិសាស្ត្រ​ពិបាក​៕

ប្រែ​សម្រួល៖ អន សំអាង

ប្រភព៖​ armedforcesmuseum.com , valuewalk.com , army.mod.uk , wonderslist.com , usatoday.com