Google នឹងបិទ Google AdSense ព្រមទាំងសេវាកម្មជាច្រើនទៀត
ដោយគោរពតាមការដាក់ទណ្ឌកម្មរបស់សហរដ្ឋអាមេរិកទៅលើតំបន់ Crimea ក្រុមហ៊ុន Google នឹងបិទមិនឱ្យប្រជាជនរស់នៅលើទឹកដីដែលកំពុងមានភាពភាពចម្រូងចម្រាសគ្នារវាងអ៊ុយក្រែន និងរុស្សីនេះ អាចដំណើរការកម្មវិធី Google AdSense និងសេវាកម្មផ្សេងៗមួយចំនួនទៀតរបស់ខ្លួនបានទៀតឡើយ។
កាលពីចុងឆ្នាំ២០១៤ រដ្ឋាភិបាលអាមេរិក បានបង្ហាញជំហរក្នុងការជំទាស់ថ្មីទាក់ទិននឹងការដាក់ទណ្ឌកម្ម ដើម្បីប្រឆាំងនឹងការអត្តនោម័តិរបស់រុស្សីដែលដាក់បញ្ចូលឧបទ្វីប Crimea ធ្វើជាទឹកដី (ឧបសម្ពន្ធ) របស់ខ្លួន ខណៈដែលអង្គការសហប្រជាជាតិមិនទទួលស្គាល់ ព្រោះដើមឡើយជាទឹកដីរបស់អ៊ុយក្រែននោះ ហើយនេះគឺជាលទ្ធផលជាក់ស្ដែងស្រាប់។ សេវាកម្មដែលក្រុមហ៊ុន Google នឹងបិទមិនឱ្យប្រជាជននៅទីនោះប្រើបានរួមមាន៖ Play Store, AdWords និង AdSense។
ក្រុមហ៊ុន Google មិនអាចប្រមូលប្រាក់សម្រាប់សេវាកម្មពីឧបទ្វីប Crimea ហើយក៏មិនអាចធ្វើការបង់ប្រាក់ទៅឱ្យនរណាម្នាក់ដែលរស់នៅទីនោះដែរ។ ដូច្នេះ ក្រុមហ៊ុននឹងកាត់ផ្ដាច់ សេវាកម្មរបស់ខ្លួនទាំងនេះ ដែលនឹងអាចប៉ះពាល់ដល់អាជីវកម្មរកប្រាក់ពីការផ្សព្វផ្សាយពាណិជ្ជកម្មបាន ជាក់ស្ដែងតាម AdWords និង AdSense ហើយសេវាកម្មសម្រាប់ប្រើជាលក្ខណៈបុគ្គលិកដូចជា Google Play ក៏នឹងត្រូវបិទចោលដូចគ្នា។
របាយការណ៍បានលើកឡើងថា ក្រុមហ៊ុន Google នឹងបញ្ចប់សេវាកម្ម Google Play នៅឧបទ្វីប Crimea មិនឱ្យអ្នកប្រើនៅទីនោះអាចដំណើរការទិញ app ហើយក៏មិនអាចទាញយកកម្មវិធីឥតគិតថ្លៃមកប្រើដែរ។ ការបិទនេះ នឹងប្រព្រឹត្តទៅចាប់ពីថ្ងៃទី១ ខែកុម្ភៈខាងមុខ។ យ៉ាងណា សេវាកម្ម Search, Gmail និង Maps នៅតែអាចដំណើរប្រក្រតីបាន។
ឧបទ្វីប Crimea ដើមឡើយគឺជាទឹកដីរបស់អ៊ុយក្រែន ប៉ុន្តែក្រោយបញ្ចប់សង្គ្រាមត្រជាក់ សហភាពសូវៀតត្រូវបានរំសាយនៅអំឡុងទសវត្សទី៩០ និងបានបន្សល់នូវប្រជាជនដែលផ្ដាច់ខ្លួនពីអ៊ុយក្រែន។ ក្រោយមកអ៊ុយក្រែន និងរុស្សីបានក្លាយជាប្រទេសឯករាជ្យរៀងៗខ្លួន។ ប៉ុន្តែនៅខែមិនា ឆ្នាំ ២០១៤ កន្លងទៅនេះ រុស្សីបានដាក់បញ្ចូលតំបន់ឧបទ្វីបនេះទៅជាទឹកដីរបស់ខ្លួន ខណៈដែលអ៊ុយក្រែនប្រឆាំងដាច់ខាត ហើយក៏មិនមានការទទួលស្គាល់ពីអង្គការសហប្រជាជាតិនោះដែរ។
Google AdSense គឺជាកម្មវិធីបង្កើត និងដំណើរការដោយ Google អនុញ្ញាតឱ្យមនុស្សគ្រប់គ្នាដែលជា Publisher នៅលើគេហទំព័រ អាចធ្វើការផ្សព្វផ្សាយដល់ក្រុមហ៊ុននានា។ Google AdSense នឹងបង្ហាញនៅក្នុងមាតិកាដោយស្វ័យប្រវត្តិដែលមានជា អត្ថបទ រូបភាព វីដេអូ ដើម្បីផ្សព្វផ្សាយផលិតផល ឬសេវាកម្មជូនដល់ក្រុមហ៊ុនទាំងឡាយដែលបានសហការជាមួយក្រុមហ៊ុន Google។ តាមរយៈនេះ Publisher នឹងទទួលបានប្រាក់ផ្សាយពាណិជ្ជកម្មដោយចែកចំណែកជាមួយ Google ទៅតាមគោលការណ៍កំណត់ដោយ Google ផ្ទាល់៕
ប្រែសម្រួល៖ លី ឈៀន
ប្រភព៖ gsmarena,
