ច្បាស់ហើយ! មហិច្ឆតាចង់បាន ឯករាជ្យរបស់ ស្កុតឡែនត្រូវបរាជ័យ
ទីបំផុតគោលបំណងផ្ដាច់ខ្លួនរបស់រដ្ឋមន្ត្រីទីមួយប្រទេសស្កុតឡែន ចង់បានឯករាជ្យពីចក្រភពអង់គ្លេសបានរលាយសូន្យហើយ បន្ទាប់ពីប្រជាជនភាគច្រើនបោះឆ្នោតជំទាស់។
ប្រជាជនស្កុតឡែនដែលមិនគាំទ្រឲ្យផ្ដាច់ខ្លួន នាំគ្នាអបអរក្រោយដឹងលទ្ធផល
លទ្ធផលក្តៅៗនៃការរាប់សន្លឹកឆ្នោតក្នុងមណ្ឌលទាំង ៣២ បានបង្ហាញថា អ្នកយល់ព្រមមាន ១ ៦១៧ ៩៨៩ ស្មើនឹង ៤៥ ភាគរយ ខណៈអ្នកជំទាស់មានដល់ទៅ ២ ០០១ ៩២៦ ស្មើនឹង ៥៥ ភាគរយ។ ដូចនេះស្កុតឡែននឹងនៅក្រោមការគ្រប់គ្រងរបស់អង់គ្លេសបន្តទៀត។
ក្នុងចំណោម ៣២ មណ្ឌលរាប់សន្លឹកឆ្នោត មានតែ ៤ មណ្ឌលប៉ុណ្ណោះ ដែលមានអ្នកយល់ព្រមផ្ដាច់ខ្លួនច្រើនជាងអ្នកប្រឆាំង ក្រៅពីនេះគឺមតិប្រឆាំងនាំមុខគ្រប់មណ្ឌលទាំងអស់។ លទ្ធផលនេះ បានធ្វើឲ្យមនុស្សមួយចំនួនមានការសប្បាយចិត្តដែលបានរួមរស់ក្រោមការគ្រប់គ្រងរបស់អង់គ្លេស ខណៈអ្នកខ្លះទៀតបានសម្រក់ទឹកភ្នែកមិនពេញចិត្តឡើយ។
ចក្រភពអង់គ្លេសមាន ៤ ប្រទេស ត្រូវបានបង្កើតឡើងតាមរយៈសន្ធិសញ្ញាសហភាពឆ្នាំ ១៧០៧ ដែលមកដល់ពេលនេះមានរយៈពេល ៣០៧ ឆ្នាំហើយ។ ប្រទេស ៤ ដែលស្ថិតនៅក្នុងចក្រភពអង់គ្លេសមាន អង់គ្លេស ស្កុតឡែន វេល និងអៀរឡង់ខាងជើង ដែលផ្ទៃដីប្រទេសស្កុតឡែនធំជាងគេលំដាប់ទី ២។
នាយករដ្ឋមន្រ្ដីអង់គ្លេស David Cameron ថ្លែងទៅកាន់អ្នកសារព័ត៌មានក្រោយដឹងលទ្ធផល
ក្រៅពីអ្នកអបអរ ក៏មានអ្នកខកចិត្តនឹងលទ្ធផលដែរ
អ្នកមិនគាំទ្រឲ្យស្កុតឡែនផ្ដាច់ខ្លួនពីអង់គ្លេស ប្រមូលផ្ដុំគ្នាតាមដានលទ្ធផល
រូបភាពផ្ដល់សិទ្ធិដោយ AFP
ដោយ៖ គង់ វិសាល
រូបភាពផ្ដល់សិទ្ធិដោយ AFP
