ពេល​​ឮ​ពាក្យ​ ថា​ “ប្រហុក” គេ​នឹង​នឹក​ឃើញ​ដល់​ប្រទេស​កម្ពុជា ព្រោះ​វា​ជា​ឈ្មោះ​អាហារ​​មួយ​ប្រភេទ​​របស់​​ប្រជាជន​ខ្មែរ​​​តាំង​ពី​ដើម​ រៀង​មក។ គេ​អាច​យក​ប្រហុក​ទៅ​ឆ្នៃ​ជា​ម្ហូប​ញ៉ាំ​​ផ្ទាល់​តែ​ម្ដង ដូច​ជា​ប្រហុក​ចិញ្ច្រាំ ចំហុយ ឬ​ប្រហុក​ដុត​ជា​ដើម។ មិន​ត្រឹម​តែ​ប៉ុណ្ណោះ​ទេ ប្រហុក​ក៏​ជា​គ្រឿង​ផ្សំ​មួយ​ប្រភេទ​​មិន​អាច​ខ្វះ​បាន​ក្នុង​មុខ​ម្ហូប​ ខ្មែរ​ជា​ច្រើន។

ប្រហុក​របស់​កម្ពុជា

តាម ​​ពិត​ទៅ ប្រហុក​មិន​មែន​មាន​តែ​នៅ​កម្ពុជា​នោះ​ទេ ប្រទេស​មួយ​ចំនួន​ទៀត​ក៏​មាន​ដែរ គ្រាន់​តែ​ហៅ​ឈ្មោះ​ខុស​គ្នា​ប៉ុណ្ណោះ។ ប្រទេស​ទាំង​នោះ មាន​ដូច​ជា ឡាវ មីយ៉ាន់ម៉ា ក្រិក ​និង​ឥណ្ឌូណេស៊ី​ជា​ដើម។

មីយ៉ាន់ម៉ា៖ ប្រហុក​នៅ​មីយ៉ាន់ម៉ា គេ​ហៅ​​ឈ្មោះ​ថា “Ngapi”។ Ngapi ធ្វើ​ពី​ត្រី ​មិន​ខុស​ពី​​ប្រហុក​នោះ​ទេ ប៉ុន្តែ​ Ngapi ក៏​អាច​ធ្វើ​ពី​​​កំពឹស​​​បាន​ផង​ដែរ ដែល​ដូច​ទៅ​នឹង​កាពិ។

Ngapi ជាមួយ​​អម្ពិល​​ទុំ

ឡាវ៖ ​នៅ​ប្រទេស​ឡាវ​ក៏​មាន​អាហារ​មួយ​ប្រភេទ​ដែល​ស្រដៀង​ប្រហុក​ដែរ​​ ដែល​គេ​ឲ្យ​ឈ្មោះ ថា Padaek។

Padaek ពេល​ដាក់​លក់​នៅ​លើ​ទីផ្សារ​

ក្រិក៖ ក្រិក​បូរាណ​មាន​អាហារ​ផ្អាប់​មួយ​ប្រភេទ​ស្រដៀង​នឹង​ប្រហុក​ ដែល​គេ​ហៅ​ថា Garum។ ខុស​ពី​ប្រហុក​បន្តិច​ត្រង់​ថា Garum ធ្វើ​ពី​ពង​ត្រី និង​ថ្លើម​ត្រី មិន​មែន​សាច់​ត្រី​នោះ​ទេ។

Garum ចិញ្រ្ចាំ

ឥណ្ឌូណេស៊ី៖ Patis Ikan ជា​អាហារ​​មួយ​ប្រភេទ​ដែល​ធ្វើ​ពី​ត្រី​ និង​អំបិល​ដូច​ប្រហុក​ ហើយ​អន្លក់​វិញ​ក៏​មិន​សូវ​ខុស​គ្នា​ពី​ប្រហុក​នោះ​ដែរ។

​ ​​​ក្រៅ​ពី​ប្រទេស​ខាង​លើ តើ​ប្រិយមិត្ត​មាន​ដឹង​ឬ​អត់​ថា​មាន​ប្រទេស​ណា​ខ្លះ​ទៀត ដែល​មាន​អាហារ​ស្រដៀង​នឹង​ប្រហុក​របស់​កម្ពុជា? បើ​មាន​ជួយ​ចែក​រំលែក​ផង​ណា!

ដោយ៖ សុខ សុវត្ថិ
ប្រភព៖ សប្បាយ និង wikipedia