សិស្សធ្លាក់បាក់ឌុប ទម្លាយមូលហេតុ ដែលធ្វើឲ្យខ្លួនធ្លាក់
បាក់ឌុបឆ្នាំនេះ មានអ្នកធ្លាក់ច្រើនសន្ធឹកសន្ធាប់គួរឲ្យកត់សម្គាល់ ហើយអ្នកដែលជាប់ឆ្នាំនេះ ហាក់ដូចជាមានកិត្តិយសបំផុត ដោយសារតែការប្រលងតឹងរឹងមិនតម្រូវឲ្យចម្លងឯកសារ គឺត្រូវពឹងលើសមត្ថភាពពិតរបស់ខ្លួនទាំងស្រុង។ តែសម្រាប់អ្នកមិនជាប់វិញ ពួកគេថាមានមូលហេតុទើបធ្វើឲ្យធ្លាក់បែបនេះ។ តើមានមូលហេតុអ្វីខ្លះទៅ?
យុវជនម្នាក់ ឈ្មោះសាន ដាវីត រៀននៅវិទ្យាល័យព្រែកក្របៅ ខេត្តព្រៃវែង ប្រាប់ថា៖ “នៅថ្ងៃប្រលងដំបូង ខ្ញុំភ័យឡើងញ័រខ្លួន កំពុងមិនចេះផងដល់ឃើញគេរឹតបន្តឹងនឹងភ្នែកអញ្ចឹង ខ្ញុំភ័យមែនទែន។ តែខ្ញុំដឹងថា ខ្ញុំធ្លាក់ព្រោះហេតុអី”។
យុវជនរូបនេះបញ្ជាក់ទៀតថា កត្តាសំខាន់គឺមកពីខ្លួនឯងតែម្ដង។ តាមពិតទៅប្រលង សំនួរមិនសូវជាលំបាកទេ តែដោយសារបានត្រៀមទុកមុនឲ្យបានល្អ អត់សូវទៅរៀន ហើយគិតថា ចាំចម្លងគេឬចាំមើលតាម Facebook ដូច្នេះហើយធ្វើឲ្យការប្រលងនេះផ្ទុយពីការរំពឹងទុកដូចឆ្នាំមុនៗ។
យុវជនធ្លាក់បាក់ឌុបម្នាក់ទៀតដែលជាមិត្តភ័ក្ដិគេតែងហៅថា សី រៀននៅវិទ្យាល័យឫស្សីកែវក្នុងរាជធានីភ្នំពេញ និយាយថា មកពីរូបគេមើលងាយការប្រលងព្រោះរាល់ឆ្នាំធូររលុង គិតថា ឆ្នាំមុនស្រួល មិនដែលឆ្នាំនេះពិបាកឡើយ ម៉្លោះហើយចំណាយពេលវេលាតិច មិនខំរៀនសូត្រ។
សី បន្ថែមថា៖ “បើខ្ញុំប្រឹងរៀនអាចជាប់ តែណាស់មិនប្រឹង។ ខ្ញុំទទួលស្គាល់ការពិតថា សមត្ថភាពមិនដល់ មើលស្រាលពេក។ ម៉ាក់ប៉ាខ្ញុំស្ដីបន្ទោស ថាឲ្យខំប្រឹងរៀនឲ្យជាប់បែរជាធ្លាក់ទៅវិញ។ ខ្ញុំមានអារម្មណ៍សោកស្ដាយ និង បាក់ទឹកចិត្តខ្លាំងដែរ “ ។
យុវសិស្សរូបនេះប្រាប់ទៀតថា ក្រៅពីរៀនបំប៉ននៅសាលា មិត្តភ័ក្ដិសីក៏ជួយបង្ហាត់បង្រៀនផងដែរ ហើយរូបគេផ្ទាល់ប្ដេជ្ញាជាថ្មីថា នឹងខំប្រឹងរៀនឲ្យជាប់លើការប្រលងលើកទីពីរនេះឲ្យខានតែបាន។
មិនខុសគ្នាប៉ុន្មាន សិស្សនៅសាលាអន្តរទ្វីប យុវជន គីមសួរ និយាយថា៖ ” សោកស្ដាយបំផុតពេលបានដឹងថាធ្លាក់។ ខ្ញុំមានអារម្មណ៍ថា ខុសចំពោះខ្លួនឯងខ្លាំងណាស់ បើទោះម៉ាក់ប៉ាខ្ញុំមិនបានស្ដីបន្ទោសអ្វីក៏ដោយ តែផ្ទុយទៅវិញលោកទាំងពីរនៅនាំខ្ញុំទៅញ៉ាំអីដើម្បីលើកទឹកចិត្តខ្ញុំឲ្យប្រឹងរៀនឡើងវិញសម្រាប់ការប្រលងថ្ងៃ ១៣ តុលា នេះទៀត។ មិនស្ដាប់គ្រូពន្យល់ មិនធ្វើលំហាត់ ពឹងផ្អែកលើការចម្លងឯកសារ ទីបំផុតខ្ញុំមិនជាប់។ តែទោះយ៉ាងណាខ្ញុំនឹងប្រឹងរៀនម្ដងទៀត “។
ឆ្នាំនេះ បេក្ខជនប្រលងជាប់មាន ២៣ ១២៦ នាក់ ត្រូវជា ២៥. ៧២ % ។ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានសម្រេចថា សិស្សដែលត្រូវប្រឡងសញ្ញាប័ត្រមធ្យមសិក្សាទុតិយភូមិ (បាក់ឌុប) លើកទី ២ នឹងប្រព្រឹត្តិទៅនៅថ្ងៃទី ១៣ តុលា ខាងមុខ នឹងទទួលបាននិទ្ទេសដូចសិស្សប្រឡងជាប់លើកទីមួយដែរ៕
អត្ថបទ ៖ លឹម សុនា
