កំពង់ចាម៖  ពាក្យចាស់ពោលថា «កុកភ្លេចជុង តែជុងមិនដែល ភ្លេចកុកឡើយ» គឺប្រៀបដូច ជាបុរសម្នាក់ នៅស្រុកត្បូងឃ្មុំ ដែលបានប្លន់សម្លាប់ ជនរងគ្រោះហើយ រត់គេចខ្លួន ចេញពីស្រុកកំណើត អស់រយៈរយៈ១៥ឆ្នាំ តែពេលត្រឡប់មកវិញ ក៏ត្រូវសមត្ថកិច្ច ឃាត់ខ្លួនតែម្តង ។
ករណីខាងលើនេះ បានកើតឡើង នៅចំណុចផ្ទះជនជាប់ចោទ ស្ថិតក្នុងភូមិទួលវិហ៊ា ឃុំជីរោទី២ ស្រុកត្បូងឃ្មុំ ខេត្តកំពង់ចាម កាលពីវេលាម៉ោង ៧យប់ ថ្ងៃទី១៥ ខែមេសា  ។
អធិការនគរបាលស្រុកត្បូងឃ្មុំ លោក សួស ស៊ាងលី បានប្រាប់មជ្ឈមណ្ឌលព័ត៌មាន ដើមអម្ពិលថា ជនត្រូវចោទ ត្រូវបានចាប់ខ្លួន ខណៈរូបគេ មកលេងផ្ទះ ក្នុងពេលបុណ្យចូលឆ្នាំ ដែលឃាត់ខ្លួន តាមដិកាបង្គាប់ ឲ្យចាប់ខ្លួន ពីបទប្លន់ និងធ្វើមនុស្សឃាត កាលពីថ្ងៃទី១០ខែធ្នូ ឆ្នាំ១៩៩៩ នៅចំណុច ខាងលិចស្ពានមាត់ឃ្មង់ ឃុំជីរោទី២ ស្រុកត្បូងឃ្មុំ ខេត្តកំពង់ចាម។
លោកឧត្តមសេនីយ៍ បែន រ័ត្ន ស្នងការនគរបាលខេត្តកំពង់ចាម បានមានប្រសាសន៍ឲ្យដឹងដែរថា ក្នុងឱកាស បុណ្យចូលឆ្នាំខ្មែរនេះ លោកបានដាក់ផែនការណ៍ សំខាន់ៗ ៣យ៉ាង ដើម្បីការពារ សន្តិសុខសុវត្ថិភាពជូនប្រជាពលរដ្ឋ ដែលកំសាន្តពេលចូលឆ្នាំ។ ផែនការណ៍ទី១ គឺការបង្កាបង្ក្រាប បទល្មើសផ្សេងៗ ។ ទី២ គឺបង្ក្រាបបទល្មើស ដែលអាចកើតឡើង ដូចជាល្បែងស៊ីសង និងគ្រឿងញៀន។ ចំណែកផែនការណ៍ទី៣នោះ គឺពង្រឹងការអនុវត្តដិកានេះឯង ដោយលោកស្នងការ បានបញ្ជាឲ្យមន្ត្រីនគរបាលដែល ដែលមានដិកាក្នុងដៃ គ្រប់មូលដ្ឋានទាំងអស់ ត្រៀមចាំព្រោះពេលចូលឆ្នាំដូច្នេះ ជនល្មើស អាចភ្លេចខ្លួន វិលចូលមកមូលដ្ឋានវិញ៕

_______________________
ផ្តល់សិទ្ធិដោយ៖ Lookingtoday