ថ្ងៃទី២៩ ខែ មីនា សូមបិទភ្លើងសម្រាប់ទិវា “មួយម៉ោងសម្រាប់ភពផែនដី”
ភ្នំពេញ:
ឆ្នាំនេះ ទិវា “មួយម៉ោងសម្រាប់ភពផែនដី” ឬ ហៅថា “Earth Hour”
នឹងរៀបចំឡើង ដោយសមាគមអតីតនិស្សិតអាហារូបករណ៍ហ្វ៊ុលប្រាយ
និងសហរដ្ឋអាមេរិក FUSAAC ដោយមានការគាំទ្រពីអង្គការ WWF។
កម្មវិធីនឹងប្រព្រឹត្តទៅចាប់ពីម៉ោង ៥:៣០ ដល់ម៉ោង ៨:៣០ នាល្ងាច
ថ្ងៃទី២៩ ខែ មីនា នៅវិទ្យាស្ថានភាសាបរទេស
នៃសាកលវិទ្យាល័យភូមិន្ទភ្នំពេញ។ សេចក្តីប្រកាសព័ត៌មានរបស់អ្នករៀបចំកម្មវិធីបានឲ្យដឹងថា នេះជាការចូលរួមដោយសេរី ហើយកម្មវិធីសំដៅលើកទឹកចិត្តដល់យុវជនទាំងអស់ឲ្យចូលរួមបង្ហាញពី ឆន្ទៈក្នុងការការពារ ភពផែនដី។ជាផ្លូវការ ក្នុងទិវា “មួយម៉ោងសម្រាប់ភពផែនដី” មានការបិទភ្លើងជានិមិត្តរូបដែលនឹងប្រព្រឹត្តទៅចាប់ពីម៉ោង ៨:៣០ ទៅ ៩:៣០ យប់នៃ ម៉ោងក្នុង ប្រទេសនីមួយៗ។ ក្រៅពីការបិទភ្លើងអាគាររយៈពេលមួយម៉ោងជានិមិត្តរូប កម្មវិធីនេះនឹងមាន សកម្មភាពកំសាន្តបែបអប់រំ ដែលអ្នកចូលរួមទាំងអស់អាចរីករាយជាមួយនឹងការសំដែងសិល្បៈ ក៏ដូចជាការថ្លែងចែករំលែកនូវព័ត៌មាននិង ក្តីព្រួយ បារម្ភពាក់ព័ន្ធនឹងបញ្ហាបរិស្ថាន។ មិនតែប៉ុណ្ណោះ យុវជនអាចសម្តែងឆន្ទៈក្នុងការប្រើអំណាច ឬ ឥទ្ធិពលរបស់ខ្លួន តាមរយៈសកម្មភាពតូចតាច ប៉ុន្តែមានអត្ថន័យសម្រាប់បុព្វហេតុបរិស្ថានក្នុងប្រទេសកម្ពុជា និងនៅលើភពផែនដី ទាំងមូល។
លោក ជា កញ្ញារិទ្ធិ ប្រធានសមាគមនិស្សិត FUSAAC បានមានប្រសាសន៍ថា ៖ “ក្រុមនិស្សិត FUSAAC ជឿជាក់ ថាការផ្លាស់ប្តូរនៅក្នុងសង្គមគួរតែចាប់ផ្តើមពីមនុស្សម្នាក់ៗ។ បុគ្គលគ្រប់រូបមិនគួររង់ចាំ ឲ្យការផ្លាស់ផ្តូរចេញមកពី ថ្នាក់លើទេ វាត្រូវផ្តើមចេញពីខ្លួនយើង។ Earth Hour គឺជាឧទាហរណ៍ដ៏ល្អមួយដែលបង្ហាញអំពីសកម្មភាពដែលបុគ្គលគ្រប់រូបអាច ធ្វើបានដើម្បីបុព្វហេតុបរិស្ថាន ហេតុនេះហើយបានជា FUSAAC គាំទ្រនិងចូលរួមរៀបចំកម្មវិធីនេះ។”
លោក រ័ត្ន ហុក នាយករងនៃវិទ្យាស្ថានភាសាបរទេស ក៏បានលើកឡើងដែរថា ៖ “ប្រជាជនគ្រប់រូប គួរតែខំប្រឹងប្រែង ព្យាយាមឲ្យក្លាយខ្លួនជាអ្នកដឹកនាំដែលស្រលាញ់និងការពារបរិស្ថាន ដើម្បីរួមចំណែកក្នុងសកម្មភាពការពារបរិស្ថាន និង ធនធានរបស់ភពផែនដីយើង។”
Earth Hour មានគោលបំណងលើកទឹកចិត្ត សហគមន៍នៅលើសាកលលោកទាំងមូលឲ្យ ចែករំលែកឱកាស និង ព័ត៌មានស្តីពីឧបសគ្គក្នុងការបង្កើតឲ្យបាននូវភពផែនដីមួយដែលមាន និរន្តរភាព។ Earth Hour មិនមែនត្រឹមតែជា ព្រឹត្តិការណ៍ប្រចាំឆ្នាំតែប៉ុណ្ណោះទេ ប៉ុន្តែវាជាចលនាបរិស្ថានសាកល ដែលមនុស្សគ្រប់រូបមកចូលរួមជាមួយគ្នាសម្រាប់ បុព្វហេតុភពផែនដី។
មនុស្សគ្រប់រូប ស្ថាប័នរដ្ឋ និងឯកជនទាំងអស់ អាចចូលរួមក្នុងកម្មវិធីប្រារព្ធទិវា Earth Hour នេះបាន។ ក្រៅពីការបិទ ភ្លើងអគ្គីសនីដែលមិនចាំបាច់ប្រើរយៈពេលមួយម៉ោងដើម្បីជានិមិត្តរូប ក្នុងការបង្ហាញពីឆន្ទៈក្នុងការការពារភពផែនដី សហគមន៍នីមួយៗអាចធ្វើសកម្មភាពជាច្រើនដ៏ទៃទៀតដើម្បីឆ្លុះបញ្ចាំងពី បញ្ហាដែលខ្លួនកំពុងជួបប្រទះ។ ដូច្នេះគំនិត សំខាន់នោះគឺ សម្រាប់ឲ្យបុគ្គលម្នាក់ៗនឹងធ្វើសកម្មភាពបរិស្ថានផ្សេងទៀតក្រៅពី ទិវា “មួយម៉ោងសម្រាប់ភពផែនដី” នេះ។
លោក ឈិត សំអាត នាយកអង្គការ WWF កម្ពុជា បានមានប្រសាសន៍ថា ៖ “អង្គការ WWF មានសេចក្តី រីករាយយ៉ាងខ្លាំងក្នុងការចូលរួមប្រារព្ធពិធី Earth Hour នេះជាមួយក្រុមនិស្សិត FUSAAC និងវិទ្យាស្ថាន ភាសាបរទេស។ តាមរយៈការចូលរួម និង ប្រារព្ធពិធីនេះឡើងយើងបង្ហាញថា យើងកំពុងយកចិត្តទុកដាក់ចំពោះបញ្ហា បរិស្ថានរបស់ប្រទេសយើង ហើយក្នុងនាមជាប្រជាជននៃសាកលលោក យើងមានឆន្ទៈការពារភពផែនដីដែលយើង កំពុងរស់នៅសព្វថ្ងៃ។ ខ្ញុំសង្ឃឹមថាមនុស្សជំនាន់ក្រោយ នឹងប្រើប្រាស់អំណាច ឬ ឥទ្ធិពលរបស់ខ្លួនដើម្បីស្ថាបនា ពិភពលោកមួយប្រកបដោយនិរន្តរភាព។”
ជាផ្លូវការ ការបិទភ្លើងជានិមិត្តរូបក្នុងទិវា Earth Hour ជាសាកលនឹងប្រព្រឹត្តទៅចាប់ពីម៉ោង ៨:៣០ ទៅ ៩:៣០ យប់នៃ ម៉ោងក្នុង ប្រទេសនីមួយៗ។ សូមគោរពអញ្ជើញប្រជាពលរដ្ឋកម្ពុជាគ្រប់ៗរូប បណ្តាគេហដ្ឋាន ស្ថាប័នរដ្ឋ និងឯកជន ទាំងអស់ ចូលរួមក្នុងចលនាជាសាកលនេះ៕T/L
ទិវាEarth Hourនៅប៉ារីសនាឆ្នាំកន្លងមក
ប្រភពពី CEN
