គណៈកម្មាធិការជាតិសុវត្ថិភាពចរាចរណ៍ផ្លូវគោកព្រមានអ្នកបើកម៉ូតូអត់បណ្ណបើកបរពិន័យ៦ម៉ឺនរៀល
គណៈកម្មាធិការជាតិមួយនេះក៏អះ អាងថា អ្នកបើកបរភាគច្រើនគ្មានបណ្ណ បើកបរបានន័យថា មិនបានឆ្លងកាត់ សាលារៀនបើកបរមិនចេះច្បាប់ចរាចរណ៍ គឺចេះតែបើកបរបង្កឱ្យមានគ្រោះថ្នាក់ ច្រើនរាល់ថ្ងៃ ។ គណៈកម្មាធិការជាតិ សុវត្ថិភាពចរាចរណ៍ផ្លូវគោកកំពុងតែ រៀបចំវិធានការធ្វើយ៉ាងណាឱ្យអ្នកបើកបរ ដែលមិនទាន់មានបណ្ណបើកបរនោះ ទៅប្រឡងយកបណ្ណបើកបរបន្ទាប់ពីគេ បានរៀនច្បាប់ចរាចរណ៍រួចនោះ ។
លោកព្រាប ច័ន្ទវិបុល បានឱ្យដឹង ទៀតថា តាមច្បាប់ចរាចរណ៍ផ្លូវគោក អ្នកបើកបរដែលគ្មានបណ្ណបើកបរត្រូវ ទទួលរងការផាកពិន័យជាប្រាក់ឬជាប់ ពន្ធនាគារ ។ តែដោយសារអ្នកបើកបរ ម៉ូតូភាគច្រើនមិនទាន់មានបណ្ណបើកបរយើងបានស្នើឱ្យអនុវត្ដត្រឹមតែ ផាក ពិន័យតាមច្បាប់ថ្មីសិនចាំដល់អ្នកបើកបរម៉ូតូភាគច្រើនមានបណ្ណសិន ចាំអនុ វត្ដការបញ្ជូនទៅតុលាការ ។
តាមការឱ្យដឹងពីលោកព្រាប ច័ន្ទ វិបុល គឺម៉ូតូដែលកំពុងធ្វើចរាចរណ៍លើ ផ្លូវសាធារណៈសព្វថ្ងៃនេះមានចំនួន រហូតដល់ទៅប្រមាណជាជាងពីរលាន គ្រឿង តែអ្នកបើកបរម៉ូតូមានបណ្ណ បើកបរតែជាង១៦ម៉ឺននាក់ប៉ុណ្ណោះ ។
បើតាមការពិនិត្យជាក់ស្ដែងសព្វថ្ងៃ នេះនៅមានអ្នកបើកបរម៉ូតូមកប្រឡងយកបណ្ណបើកបរដែរ តែមិនច្រើនទេ ក្នុងមួយខែបានតែប្រហែលជាពី ២.០០០ ទៅ៣.០០០នាក់ ក្នុងពេលដែលម៉ូតូ ចុះបញ្ជីថ្មីមានចំនួនដល់ប្រមាណជា ពីរម៉ឺនគ្រឿងក្នុងមួយខែនោះ ។
បើយោងតាមរបាយការណ៍គ្រោះ ថ្នាក់ចរាចរណ៍សព្វថ្ងៃនេះភាគច្រើនបង្ក ឡើងពីអ្នកប្រើប្រាស់ម៉ូតូដែលបានបើកបរមិនគោរពច្បាប់ចរាចរណ៍បើក ប្រសេចប្រសាចពេញផ្លូវមិនប្រកាន់ស្ដាំ មិនគោរពស្លាកសញ្ញាបណ្ដាលឱ្យ មានគ្រោះថ្នាក់ដល់អ្នកដទៃ ។
លោក ព្រាប ច័ន្ទវិបុល បានបញ្ជាក់ថា ប្រសិនបើអនុវត្ដត្រឹមតែផាកពិន័យ តាមច្បាប់ថ្មីជំនួសការដាក់ពន្ធនាគារ នោះអ្នកបើបរម៉ូតូគ្មានបណ្ណបើកបរត្រូវ ប្រឈមនឹងការពិន័យជាប្រាក់ចំនួន៦ម៉ឺនរៀលហើយបើមន្ដ្រីនគរបាល ចរាចរអនុវតតាមច្បាប់ថ្មីនេះបានអ្នកបើកបរម៉ូតូគ្មានបណ្ណភាគច្រើន ប្រាកដជានាំគ្នាមក ប្រឡងយកបណ្ណបើកបរមិនខាន ៕
ប្រភពពី នគរវត្ត
