បុរសអ្នកជីកជន្លេនលក់ម្នាក់ត្រូវបានប្រពន្ធប្រទះឃើញដេកស្លាប់នៅក្រោមអង្រឹង
ខេត្តកំពង់ឆ្នាំង: បុរសម្នាក់ស្ថិតក្នុងគ្រួសារដ៏ក្រីក្រមួយ
ដែលមានមុខរបរជីកជន្លេនលក់ បានស្លាប់ចោលប្រពន្ធនិងកូន៥នាក់។
បុរសរូបនេះ
ត្រូវបានប្រពន្ធប្រទះឃើញដេកបែកពពុះមាត់ស្លាប់នៅក្រោមអង្រឹង
កាលពីវេលាម៉ោង៨ព្រឹក ថ្ងៃទី២៥ ខែធ្នូ ឆ្នាំ២០១៣
នៅក្រោមផ្ទះរបស់ខ្លួន ក្នុងភូមិស្រះកែវ ឃុំមេលំ ស្រុកបរិបូរណ៌
ខេត្តកំពង់ឆ្នាំង។
បុរសដែលស្លាប់នោះឈ្មោះ ស៊ឹម រឿន អាយុ៣៥ឆ្នាំ ប្រពន្ធឈ្មោះ ម៉ាញ ណាត អាយុ៣២ឆ្នាំ និងមានកូន៥នាក់នៅក្នុងបន្ទុក។
ស្ត្រីជាប្រពន្ធសព បានប្រាប់អោយដឹងថា នៅព្រឹកថ្ងៃទី២៥ ប្តីរបស់គាត់បានប្រាប់គាត់ថា មិនស្រួលខ្លួន និង បានដេញគាត់អោយទៅជីកជន្លេន ដើម្បីយកមកលក់ ទិញអង្ករ ដាំបាយអោយកូនហូប។ នៅពេលដែលរូបគាត់ចាកចេញទៅជីកជន្លេន ប្តីរបស់គាត់បានដេក នៅលើអង្រឹង ក្រោមផ្ទះ ស្រាប់តែនៅពេលដែលគាត់ត្រឡប់មកពីជីកជន្លេនវិញ ឃើញប្តីដេកបែកពពុះមាត់ស្លាប់ នៅក្រោមអង្រឹងនិងបានស្រែកអោយអ្នកភូមិជួយ ក៏ផ្អើលឆោឡោឡើង។
ស្ត្រីឈ្មោះម៉ាញ ណាត បានអោយដឹងទៀតថា គាត់សព្វថ្ងៃនេះគ្មានមុខរបរអ្វីពិត ប្រាកដទេ សព្វថ្ងៃនេះ រស់នៅសង្ឃឹមទៅលើប្តីតែម្នាក់គត់ ដោយគាត់ ដើរស៊ីឈ្នួលធ្វើការអោយគេ ហើយបើគ្មានគេហៅទៅធ្វើការទេ ប្តីរបស់គាត់ បានទៅជីកជន្លេនយកមកលក់ បានប្រាក់បន្តិចបន្តួច គ្រាន់តែដាំបាយអោយកូនហូបតែប៉ុណ្ណោះ។
ចំពោះការធ្វើបុណ្យសពប្តី គាត់គ្មានលុយមួយរៀលទេបានលោកមេឃុំជួយឧបត្ថម្ភ អង្ករចំនួន៦០គីឡូក្រាម និង លុយចំនួន១០ម៉ឺនរៀល និងសប្បុរសជនជួយឧបត្ថម្ភចំនួន១០ ម៉ឺនរៀលផងដែរ។
ស្ត្រីរូបនេះបានអំពាវនាវ ដល់សប្បុរសជន ទាំងឡាយមេត្តាជួយឧបត្ថម្ភដល់ក្រុម គ្រួសារគាត់ផង ពីព្រោះសព្វថ្ងៃនេះជួបការលំបាកខ្វះខាតយ៉ាងខ្លាំង ឥឡូវនេះប្តីស្លាប់ចោលទៀត ធ្វើអោយគ្រួសារគាត់ជួបការលំបាកធ្វេរឡើង៕R/c
ប្រភពពី CEN
