អ្នកទោសជិត១ពាន់នាក់ ត្រូវជម្លៀសចេញពីពន្ធនាគារ ដោយសារទឹកលិច
អាជ្ញាធរខេត្តបន្ទាយមានជ័យ ចាត់វិធានការបញ្ជូនអ្នកទោសចំនួន ៨២៣នាក់ ចេញពីពន្ធនាគារខេត្តបន្ទាយមានជ័យ ដែលរងគ្រោះលិចលង់ដោយទឹកជំនន់ ទៅដាក់នៅពន្ធនាគារខេត្តសៀមរាប ៥០០នាក់ និងដាក់នៅពន្ធនាគារខេត្តបាត់ដំបង ចំនួន ៣២៣នាក់។
ការជួយសង្គ្រោះនេះ ចាប់ផ្ដើមឡើងរសៀលម៉ោង ១រសៀល ថ្ងៃទី១០ ខែតុលា ក្រោយពីពន្ធនាគារខេត្តបន្ទាយមានជ័យ ត្រូវជំនន់ទឹកភ្លៀងហូរពីប្រទេសថៃ បុកបាក់ជញ្ជាំងពន្ធនាគារបណ្ដាលឲ្យលិចលង់ មិនអាចអោយអ្នកទោសស្នាក់នៅបាន។
មន្ត្រីនាំពាក្យនិងជាអភិបាលរងខេត្តបន្ទាយមានជ័យ លោក ឈុំ សុវណ្ណារិទ្ធ ថ្លែងថា អាជ្ញាធរខេត្ត បានប្រើប្រាស់រថយន្ត ២០គ្រឿង និងកងកម្លាំងសមត្ថកិច្ចចម្រុះជាច្រើននាក់ ចុះជួយសង្គ្រោះអ្នកទោសទាំងនោះចេញពីពន្ធនាគារ និងអមដំណើរអ្នកទោសយកទៅខេត្តសៀមរាប និងខេត្តបាត់ដំបង។
លោកបន្តថា កន្លងទៅនេះខាងពន្ធនាគារបានប្រើប្រាស់ម៉ាស៊ីនបូមទឹកច្រើនគ្រឿងបូមទឹកចេញ ប៉ុន្តែទប់មិនឈ្នះ បណ្ដាលឲ្យជញ្ជាំងគុកបាក់ធ្លាយទឹកលិចអ្នកទោស៖ «ទឹកវាខ្ពស់ប្រហែលជាង ១ម៉ែត្រ៣តឹក អ៊ីចឹងរបងយើងទ្រេត ខំទល់តែទប់មិនឈ្នះ បណ្ដាលឲ្យបាក់។ ឥឡូវទឹកជ្រៅ ឡានយើងទៅយកអត់កើត មានតែឡានធំដឹកចេញមកពីហ្នឹងមក យើងមិនអាចប្រលែងគាត់ឲ្យដើរមកទាំងហ្វូងបានទេ ទាល់ឡានធំចូលទៅយកមកដាក់ឡាននៅក្រៅនេះ»។
សកម្មភាពកងកម្លាំងសមត្ថកិច្ចជម្លៀសអ្នកទោសចេញពីពន្ធនាគារខេត្តបន្ទាយមានជ័យ ដោយសារជន់ទឹកលិច នៅថ្ងៃទី១០ តុលា ឆ្នាំ២០១៣។ Adhoc Photo</div>
មន្ត្រីអង្គការសិទ្ធិមនុស្សអាដហុក លោក ស៊ុំ ច័ន្ទគារ ដែលចុះទៅដល់កន្លែងកើតហេតុនោះ សម្ដែងការព្រួយបារម្ភចំពោះសុវត្ថិភាពរបស់អ្នកទោស៖ «អ្វីដែលយើងព្រួយបារម្ភហ្នឹង មានស្ត្រី មានអ្នកជំងឺ ហើយចាស់ជរា និងក្មេងតូចនៅក្នុងពន្ធនាគារ ដែលការជម្លៀសហ្នឹងយឺតយ៉ាវដោយសារពន្ធនាគារហ្នឹងទឹកជ្រៅពេក ហើយការចេញហ្នឹងផ្ទៀងម្ដងមួយៗ។ នៅក្នុងពន្ធនាគារនោះ ឯកសារបញ្ជីស្នាមអីត្រូវបានលិចលង់មួយចំនួនដែរ ព្រោះទឹកបាក់នៅខាងជើងក្បែរបន្ទប់ឯកសារ»។
ទោះយ៉ាងណា រហូតមកដល់ពេលមិនមានអ្នកទោសណារងគ្រោះដល់អាយុជីវិតទេ។ លោក ឈុំ សុវណ្ណារិទ្ធ បញ្ជាក់ថា ថ្វីត្បិតការយកអ្នកទោសទាំងនោះមានការយឺតយ៉ាវនិងលំបាកបន្តិចមែន ប៉ុន្តែ អាជ្ញាធរនឹងដឹកជញ្ជូនអ្នកទោសនោះឲ្យអស់នៅល្ងាចថ្ងៃទី១០ ខែតុលា នេះ៕
ប្រភពពី វិទ្យុអាស៊ីសេរី
