ភិន សុដាលីស ព្យាយាម លាក់បាំង ស្នេហ៍ប្រេះស្រាំ ជាមួយគូដណ្ដឹង
ភ្នំពេញ៖ តារាស្រីវ័យក្មេងសាច់ម៉ដ្ឋរលោង គ្រងតំណែងតួឯកជាច្រើនរឿង នៅក្នុងផលិតកម្ម មហាហង្ស កញ្ញា ភិន សុដាលីស ត្រូវបានមហាជនដឹងថា នាកំពុងតែមានភាពរង្គោះរង្គើ ជួបផ្លូវបំបែក រហូតអាចដល់អាចឈានដល់ ការផ្តាច់ពាក្យរវាងនាង និង បុរសរូបសង្ហាជាគូដណ្តឹង គឺលោក ប៉ែន តុលា ថែមទៀតផង ។
ចំណងស្នេហ៍ប្រះស្រាំ រវាងតារាប្រុសស្រីល្បីឈ្មោះមួយគូនេះ ត្រូវបានប្រភពពីអ្នកសិល្បៈ និយាយពីមាត់មួយទៅមាត់មួយតៗគ្នាថា ស្រីស្រស់ ភិន សុដាលីស បានផ្ទុះជម្លោះប៉ះសម្តី ប្រកែកគ្នា ជាមួយគូដណ្តឹង រហូតធ្វើឲ្យទស្សនិកជន មួយចំនួន លើកឡើងថា ក្រោយពីមានការលេចឮបែបនេះ ប្រហែលជាអាចធ្វើឲ្យប៉ះពាល់ ជាមួយសម្ព័ន្ធភាពផ្អែមល្ហែមរបស់ ពួកគេទៀតផង ។ មូលហេតុដែលធ្វើឲ្យតារាមួយគូនេះ ជួបភាពរកាំរកូសជាមួយគ្នា ដោយសារតែ លោក ប៉ែន តុលា មានការប្រច័ណ្ឌច្រើនចំពោះគូដណ្តឹងរូបស្រស់ ខណៈដែលនាងចេញទៅសម្តែង និងមានភាពសិ្នទ្ធស្នាល ជាមួយបុរសផ្សេងដែល ជាអ្នកសិល្បៈរួមអាជីព ទើបធ្វើឲ្យពួកគេទាំងពីរនាក់ មានបញ្ហាល្អក់កករ ជាមួយគ្នាបែបនេះ ។
បើតាមប្រភពពីអ្នកសិល្បៈ បានបង្ហើបប្រាប់ឲ្យដឹងថា ថ្មីៗនេះ នៅខាងផលិតកម្ម មហាហង្ស បានរៀបចំពិធីក្រុងពាលីថតរឿងថ្មី ដោយគេដឹងយ៉ាងច្បាស់ថា តួឯកស្រីនៅក្នុងរឿងនោះ គឺកញ្ញា ភិន សុដាលីស ដែលជាកូនស្រីសំណព្វចិត្ត របស់ម្ចាស់ផលិតកម្ម គឺលោក អ៊ិន សុភិន ហើយតួឯកប្រុស នៅក្នុងរឿងនេះ ត្រូវបានគេបាននាំគ្នានិយាយតៗគ្នាមិនដាច់ថា ជា លោក ប៉ែន តុលា ។ តែគ្រប់យ៉ាងត្រូវបានរលាយដូចអំបិលត្រូវទឹក ដោយសារតែនៅថ្ងៃក្រុងពាលីនោះ តួឯកប្រុសក្នុងរឿងគឺជា លោក ជា ខេវិន ទៅវិញ ។ មិនតែប៉ុណ្ណោះ នៅក្នុងពិធីនោះ គេក៏មិនបាន ឃើញវត្តមានបុរសរូបសង្ហាមាឌធំ លោក ប៉ែន តុលា បង្ហាញខ្លួនកៀកកើយផ្អែមល្ហែម ជាមួយគូដណ្តឹងវ័យក្មេងរូបនោះទៀតដែរ។
បើតាមប្រភពក្រៅផ្លូវការ មួយចំនួនបានលើកឡើង ជាលក្ខណៈវិភាគថា គូដណ្តឹងប្រុសស្រីមួយគូនេះ ហាក់នៅវ័យក្មេង ហើយបែរជាភ្ជាប់និស្ស័យស្នេហ៍ ជាមួយគ្នារហូតដល់ត្រូវរៀបចំពិធីភ្ជាប់ពាក្យ ចំណាយលុយរាប់ម៉ឺនដុល្លារ។ តែចំណងស្នេហ៍នេះមានភាពផ្អែមល្ហែមដូចទឹកឃ្មុំ មិនបានប៉ុន្មានផង ក៏ស្រាប់តែលេចឮថា ស្នេហាប្រែក្លាយជាល្វីងជូរចត់ទៅវិញ មិនសូវ យល់ចិត្តថ្លើមគ្នា មានភាពឆេវឆាវខាងប្រុសមានចិត្តប្រច័ណ្ឌ ទៅលើគូដណ្តឹងរូបស្រស់ច្រើន ។ ថាមិនត្រូវបើសិនជា លោក ប៉ែន តុលា និង កញ្ញា ភិន សុដាលីស នៅតែមានបញ្ហាមិនចុះសម្រុងគ្នាបែបនេះ អាចធ្វើឲ្យប៉ះពាល់ ជាមួយសម្ព័ន្ធភាពនាង រហូតដល់ត្រូវផ្តាច់ពាក្យថែមទៀតផងក៏ថាបាន។
ជុំវិញការលើកឡើងនេះដែរ LookingTODAY បានព្យាយាមទាក់ទងទៅ កញ្ញា ភិន សុដាលីស នៅថ្ងៃទី២ ខែសីហានេះ តែលេខទូរស័ព្ទរបស់នាង ពេលខលចូលច្រើនដង បែរជាគ្មានអ្នកទទួល ។ LookingTODAY ក៏រង់ចាំការ ចេញមុខបកស្រាយពាក់ព័ន្ធ នឹងព័ត៌មាននេះ ក្នុងពេលឆាប់ៗដើម្បីឲ្យ មហាជនអស់មន្ទិលសង្ស័យ៕ប្រភព lookingtoday
